Iza no mifehy an'Antananarivo?

Izay nanara-baovao dia naharaka fa niezaka ny hanadio an'Analakely sy ny manodidina ny fiadidiana ny tanànan'Antananarivo fa ho avy eto Antananarivo ny filoha frantsay sy ny delegasiona matanjatanjaka ihany. Efa mahazatra ny eto an-tanàna ny miezaka ny hanadio, manatsara ny tsihy avelatra, na mihatsaravelatsihy hoy ny fiteny mahazatra. Dia tsy maintsy mba mametraka fandaminana kely na dia vonjimaika aza. Saingy tsy nizotra araka ny noheverina ny zavamisy ary tokony hihiratra avokoa ny mason'ny rehetra, indrindra ireo miseho ho manantsaina saingy mbola manandratra ambony ny revy sy ny fety dia miaritra indray ny andro hafa sady mody mimenomenona amin'ny gaboraraka nefa tsy hanao na inona na inona hiatrehana izany.

Ny faran'ny herinandro teo, ilay lazaina ho mandritra ny taombaovao malagasy sy ny Aid-el-Fitri anefa dia tsy nijery andro fety izany ny mpivarotra amoron-dalana fa nanatontosa fitokonana, niara-nientana avy hatrany. Atao hoe miankina aman'aina ilay izy fa dia miara-dia hatrany na dia latsaky ny 2000 isa aza ry zareo. Manaraka izany, satria fantatra amin'ny fiarovany ny mpitondra sy ny mpankahala ireo mpanohitra mikendry ny hiditra kianja 13 mey ireo vondron'olona ireo dia sarintsariny fotsiny ny famoretana fa dia nanaiky tsi-sazoka ny fiadidiana an'Antananarivo.

Inona ny vokany avy eo? Vao maika nahazo vahana, na nomena vahana ireo olona ireo. Raha heverina ho tsy ara-dalàna ny fivarotana amoron-dalana dia vao maika nahazo ampahan'arabe ivarotana aza ry zareo ary tsy ho afa-manenjika na manaisotra ny mpivarotra amoron-dalana intsony ny fahefana eto an-tanàna. Izay no fanehoana fa izay mifehy ny tsena eto Antananarivo, satria efa tsena eto Antananarivo ny fivarotana amoron-dalana ary tena mahazo be mihoatra noho ny manara-dalàna ireo olona ireo, no mifehy ny tanàna.

Fa fiantraikany hafa dia asehon'io hetsika io fa ny fikambanana Tanora Miandrandra ny Hoavy no tompon'ny tanàna, no tena tompon'ny tanàna amin'izao fotoana izao. Manankaja eo anatrehan'ireo olona nahazo fandresena ireo ity fikambanana ity satria izy no miseho ho mpiaro ireo mpivarotra amoron-dalana ireo ary mpandamina ihany koa, satria avy amin'io fikambanana io avokoa ny delege sy ny lehiben'ny tsena eto Antananarivo.

Ny mampalahelo fotsiny dia lasa tanàna tsy voafehy sy tsy sahin'ny mpitandro ny filaminana kitikitihina ny toerana misy ny foiben'io fikambanana io. Manjaka ny fanendahana sy ny halatra sy ny fandrobana amin'iny manamorona ny lalampirenena voalohany mbola tsy mivoaka ny tanànan'Antananarivo iny fa tompon'andraikitra iza no sahy hanao bemidina hanadio ny faritra andalovana sy manakaiky izany lalampirenena voalohany izany?

Noho izany, manomboka izao raha tsy te-hifandona amin'io fikambanana io sy ny mpanohana azy dia tsy maintsy miera aminy amin'ny zavatra rehetra heverina ho atao eto Antananarivo fa na inona na inona kinasa rehefa tsy ekeny dia tsy ho tontosa izany. Mila mihevitra izany izay rehetra mihevitra ny handamina ny tanànan'Antananarivo. Io fikambanana io no iray amin'ny tandroka aron'ny vozona tsy hampiongana na oviana na oviana ny mpitondra amin'izao fotoana izao. Dia saino tsara izay voasoratro fa aza maka an-tendrony.
   

Parodie du delestage à Madagascar

 Voatery natao teny frantsay ny lohateny satria hira amin'ny teny frantsay no henoina saingy tsy maintsy mahay teny malagasy koa ianao.

 

Lozam-pifamoivoizana nivadika ho fanenjehana ny filohan'ny FJKM

Nohararaotina ny lozam-pifamoivoizana nitranga tamin'ny lalam-baovao mampitohy an'Alarobia amin'Ivato tamin'ny voalohan'ny taona hanosoram-potaka sy hanenjehana ilay mpitandrina nampita ny "krismasin'i Herôda". 

Azo lazaina ho tsy nampoizina ny zava-nitranga satria namoizana ain'olona roa. Ny endriky ny fahavoazan'ny fiara kosa no ahitana fa tena karazany nanitsy ilay fiara mihitsy ilay kodiaran-droa. Raha raisina amin'ny hevitra feno ahiahy (tena miiba mihitsy amin'izao voalohany taona izao) dia mety ho nihevitra ny nitondra ny môtô hoe hiala aminy ilay fiara dia hikodia sy hivadibadika any an-tsisiny any, dia raha tany no naratra na namoy ny aina dia velona ny hoe "ka satria nanimbazimba ny tsy azo tsikeraina satria tinendrin'Andriamanitra dia nataon'Andriamanitra nahazo loza tany", izany hoe karazan-doza roa avy hatrany no nisafidianana... dia ny hoe "misy lolo" hatrany moa no nivoitra avy eo.

Fa velona amin'izay ny fanenjehana narahina fanendrikendrehana hoe mamo ilay nitondra fiara dia nofaohiny ny moto, tsy noadinoina moa ilay fiteny hoe "nahavanon-doza". Ny anarana sy ny asan'ilay olona tian-kenjehina moa tsy niala mihitsy satria izy no tena tian-katao lasibatra. Vao maika koa niteraka ahiahy sy mahalasa saina ny naha-haingana dia haingana ny fampitàna ny loza sy ny anaran'ny rain'ny nitondra ilay fiara. Avy eo nesorina tsimoramora ilay hoe mpitondra fiara mamo fa ny mpitondra môtô mamo indray no nalaza kokoa.

Voatery nitsangana niaro ilay olona tena enjehina sy ny fiangonana tarihiny ny olona vitsivitsy-maromaro manana ny lazany sy fanta-bahoaka, tsy mitovy amin'iretsy miafina ambadiky ny kaonty fako nefa afa-manao izay tiany atao na sanatria aza mandika lalàna dia tsy enjehina na samborina. 

Araka ny tohim-baovao hita teny ho eny moa dia nampidirina am-ponja vonjimaika ilay nitondra fiara rehefa nandalo fampanoavana ary amin'ny 28 janoary ho avy izao ny fitsarana azy.

Aza manao krismasin'i Heroda

Lasa Krismasin'i Heroda ny lohatenin'ity hafatra krismasy farany amin'ny maha-filohan'ny FJKM azy ity. Nahagaga fa nisy ny voatsindrona tam-pony rehefa nivoaka ilay hafatra. Ilay fanombohan'ny hafatra fotsiny no tena nalaza ka niteraka sahotaka ho an'ny sasany. Samy manana izay handraisany azy fotsiny ny tsirairay...

Ilay fitsimbadiham-bokatra tao amin'ny tranonkalan'ny CENI (3)

Rehefa nifanindry tamin'ny famoaham-bokatra tao Antananarivo Renivohitra ny antokon'ny fitondrana sy ny antokon'ny fanoherana hoe ry zareo no mandresy dia ny CENI no nanambara ampahibemaso fa ny tao amin'ny fitondrana no nandresy. Rehefa nivoaka anefa ny valiny tao amin'ny tranonkalan'ny CENI dia ny an'ny fanoherana indray no nahazo ny fandresena. Voatery nikatona kely indray ilay tranonkala avy eo ary "nahitsy" ny vokatra avy eo. Nanambara ry zareo CENI avy eo fa nisy nipiraty (nisovoka) ny tranonkala no mahatonga ilay vokatra "tsy izy" teo, ary nampanantena fa tsy hisy intsony ny tranga fisomparana toy ny teo.

Tsy nionona tamin'izany anefa ireo mpandinika, indrindra fa ny avy any amin'ny fanoherana, fa nanao karazana fanadihadiana. Tsy resy lahatra velively tamin'ny resaka "piratage" ny tao amin'ny fanoherana satria tsy ho fotoana fohy velively no hahatafaverina amin'ny tompony ny tranonkala amin'ny trangan-javatra tahaka izany ary olona manampahaizana manokana nokaramain'ny firenena vaventy toa an'i Etazonia sy Rosia (Iran sy Torkia no manaraka azy ireo) no mety ho afa-mitsofoka amin'ny karazan-tranonkala toy izany.

Satria endrika PDF (Portable Document Format) no namoahana ny vokatra tao amin'ny tranonkala dia avy amin'ireo nosintonina tao no nanaovana izany fandinihana/fanadihadiana izany. Namoaka ary ry zareo fa "automatique" no nivoahan'ny vokatra tamin'ny andron'ny 19 desambra 2024 tamin'ny folo ora katroka izay nanome fandresena ho an'ny mpanohitra. Ny ampitson'io kosa vao vita ilay fanovana azy ho amin'ny "vonjimaika alohan'ny famoahan'ny fitsarana ny vokatra ofisialy" ary namerina ny fandresena ho an'ny kandidàn'ny antokon'ny mpitondra.

Mba ho entin'ny CENI manamarina ny fisian'ny fisovohana dia nisambotra ny teknisianan'ny Antoko Tiako i Madagasikara (Jean Luce Randriamihoatra) mihitsy ny zandarimariam-pirenena. Nasiaka dia nasiaka tamin'ny famoahana ireo tsi-fetezan-javatra anefa io olona nosamborina io.
 

Nisy fifidianana angaha teto Madagasikara? Taorian'ny androm-pifidianana (2)

 Mety hisy ihany ny fiverimberenan-teny satria hevitra noraisina antsoratra indray no tendrena ho avoaka. Eto koa dia mialoha ny famoahan'ny CENI ny vokatra feno na dia vonjimaika aza ireto soratra manaraka ireto.

Nikatona fotoana maharitra ny CENI (ny tranonkalany) vao namoaka ny voka-pifidianana Antananarivo Renivohitra ka nampandresy ny antokom-panjakana sy ny kandidàm-panjakana. Ny lalàna anefa mametraka mazava tsara fa tsy misy izany antokom-panjakana izany.

Feno filaharana maka vary sy paty manerana ny tanànan'Antananarivo Renivohitra, hoy ny gazety, ny ampitson'ny fifidianana izay milaza fa takalom-bato no nisy fa tsy safidy malalaka.

Nandritra ny fifidianana, maro ireo olona tratra nitondra taratasim-bato efa voakosoka vokovoko eo amin'ny tandrifin'ny antokom-panjakana.Niely tamin'ny media sosialy izany fanatrarana olona saika na efa nangala-bato izany.

Niezaka hamaly sy hilaza ny tao amin'ny TMH (Tanora Miandrandra ny Hoavy, mavitrika amin'ny fanohanana ny fitondrana ary somary mahery fihetsika aza na andeha atao hoe tia manao "action", Ao Anosibe tsena sy ny manodidina no tena mampalaza an-dry zareo) fa mangala-bato ihany koa ny TIM ary nisy "delege" tratra nanao izany mihitsy aza, saingy fantatry ny olona avy hatrany ilay lazaina ho delege fa olon'ny TMH ary nisy aza ireo nilaza fa efa nasaina nangala-bato sy tratra tamin'izany io olona io tamin'ny fifidianana teo aloha dia izao mbola tratra izao indray.

Maro ny zandary (zazavao hoy ny gazety) nasaina nifidy tao an-drenivohitra na dia tsy nipetraka ao akory aza. Nisy saika tratran'ny olona aza tao Analakely fa nahay nandositra sady nanisy ranomainty ny tanany.

Malaza ihany koa ny ordonnances anjatony (mety mahatratra an'arivony) entin'olona iray izay betsaka PI sy MI (mère inconnue) ka mampiahiahy avy hatrany.

Amin'ireo ordonnances ireo ihany, ny fanampin'anaran'ilay olona ihany no napetraka ho anaran-drainy na anaran-dreniny.

Fijerin'ny olona dia ilay fanampian'ny banky iraisampirenena (findramam-bola) noho ny fahantran'ny Malagasy no lasa fanampian'ny fanjakana entina mampandany ny antokom-panjakana.

Misy olona manao bodongerona ny hifidy ihany na dia tsy manan-jò ho amin'izany aza.

Averina eto indray ilay tenin'ny filoham-pirenena milaza fa tsy afaka miara-miasa amin'ny ben'ny tanàna tsy miaraka amin'ny fitondrana izy. Novoiziny fa tokony ho olona manana vina hanasoa vahoaka fa tsy hanakorontana amin'ny politika na hijery tombontsoa manokana no hofidian'ny vahoaka. Manakana fampandrosoana, hoy izy, ny ben'ny tanàna tsy mitovy firehana amin'ny fitondrana, ka na mannaa vina aza ka sakan'ny ben'ny tanàna dia voasakana izany. Mazava ny fiantefan'izany eo amin'ny mpifidy hoe tokony izay iray loko amin'ny fitondrana ihany no fidìna. Fa merimberin'ny fitondrana ny hoe ny fanoherana dia midika ho fanakorontanana.

Raha nanomboka tamin'ny resaka CENI isika dia faranana amin'izany resaka CENI izany ihany ity lahatsoratra eto ity: Raha tratra aoriana vao navoaka ny vokatra vonjimaika teto Antananarivo dia narosony mialoha kosa indray ny filazana manetriketrika ny vokatra feno. Heverin'ny mpanohitra avy hatrany fa tetika indray io mba hanafaingana ny fotoana sy tsy hahavitan'ny ao amin'ny mpanohitra na izay tratran'ny tsy rariny hametraka fitoriana.

Nisy fifidianana angaha teto Madagasikara? Nialoha ilay fotoana (1)

Niatrika fifidianana i Madagasikara tamin'ny 11 desambra 2024 lasa teo, fifidianana izay ho Ben'ny tanàna sy mpanolo-tsaina.

Raha ny hevitro manokana avy hatrany no lazaina dia sarintsarim-pifidianana no misy satria tsy mitovy ny fiaingàn'izay ho kandidà fa omena vesatra ho "mpanakorontana" ny avy amin'ny mpanohitra. Filazana ankolaka ihany no nentin'ny filoha fa tsy mety aminy ny hifidianan'ny olona kandidà avy amin'ny mpanohitra satria tsy afaka ny hanao na inona na inona izy raha vao tsy manaiky ny Ben'ny tanàna. Raha raisiko amin'ny lafiny ilany dia azon'ny filoha baikoana izany ny Ben'ny tanàna raha vao iray vondrona aminy fa tsy ho afaka ny handà izay tian'ny filoha na mpitondra ambony atao ao amin'ny kaominina na inona izany na inona.

Na izay fotsiny aza dia efa tsy misy antony intsony tokony mbola hanaovana izany fifidianana izany. Na inona na inona mitranga raha hatsaraina ny iray ary haratsiana ny hafa dia tsy hifidy olona olona haratsiana mihitsy izay hifidy afa-tsy hoe tena fantany tsara ilay kandidà ary hosafidiany io na dia iharan'izany fanaratsiana izany aza! Nisongadina izany tamin'ny fifidianana tao Antananarivo Renivohitra ary hita ihany koa izany taty amin'ny kaominina izay onenako.  

Vesatra iray hafa ihany koa ny famoahana vola izaitratra ho an'ny kandidà na andeha atao hoe avy amin'ny kandidà iray mitovy loko amin'ny mpitondra. Tamin'ny tanandehibe sy renivohi-paritany no tena nanjakan'izany fizaran-javatra amin'ny fomba ankolaka izany satria mbola avy amin'ny tapakila aloha izany fa vita fifidianana vao mety hisy ny fizaran-javatra. Tsy fifidianana intsony izany toe-javatra izany fa efa fividianana. Nampahantraina tanteraka ny vahoaka dia ampanantenaina zavatra kely mba hihazonana ny fahefana.

Tsy hahagaga raha mahazo vahana na aiza na aiza izay kandidà miaraka amin'ny mpitondra rehefa mandeha ny fifidianana satria efa tsy ara-drariny intsony izany.

Mbola misy ihany koa ireo tetika hafa toy ny famoahana ny ordonnances nefa rehefa nivoaka ilay izy dia tsy vitsy no sady tsy fanta-dray no tsy fanta-dreny. Tsy azo eritreretina hoy ny mpamakafaka izany olona tsy fanta-dreny izany fa misy zavatra tsy milamina izany.

Azo fehezina noho izany fa tsy fifidianana mihitsy no nitranga fa fampandresena izay atolotry ny fanjakana fotsiny.

Hiakam-panafahana (fanangonan-tsonia)

 Avoaka eto fotsiny ho tahiry...

Endrika PDF novàna ho sary! (jereo amin'ny hihy vaovao na nouvel onglet azafady!)

pejy1

pejy2

pejy3

Tsikaritra miteraka ny finoanoam-poanako!

 Misy zavatra mila soratana kely indray ny fankalazana ny fetin'ny fahaleovantena miharo amin'ny fiandrasana ny voka-pifidianana ho solombavambahoaka. 

Majorité absolue des🍊donc, mais à quel prix? Libertés fondamentales, intégrité, Etat de droit, équité, transparence des fonds de campagne, redevabilité, institutions indépendantes, sincérité et secret du vote, etc. : les principes démocratiques ont-ils été respectés? #Madagascar pic.twitter.com/fCsouVpxXd

— Ketakandriana Rafitoson (@KeRafitoson) June 28, 2024

Mazava loatra fa nanana ny akony manokana ny tao Faratsiho, saingy iny toe-javatra iny indray no nentina nanakonana ny fivadiham-bokatra tany amin'ny faritra hafa ka nanjary nahazoan'ny IRMAR ny maro an'isa mihoatra ny atsasa-manila.

Saingy tsy izay no mahamaika ahy hanoratra fa mba te-hampita ireto resaka tao amin'ny media sosialy ireto. Nalaza indrindra ny tsi-fetezan'ny hiram-pirenena nandritra ny fanaovana ny matson'ny 26 jona 2024. 

Fa ny omalin'io tsy mbola tsikaritry ny maro loatra ilay fivadihan'ny loko tamin'ilay tsangambato fahatsiarovana ireo Malagasy maty ho an'i Lafrantsa nandritra ireo ady lehibe roa tao Eoropa etsy Anosy.

Nisy nilaza moa fa tsy dia nahovoka loatra ny afomanga tao Anosy noho ny erika, lazaina fa vonton'erika ka tsy nirefotra. Soa fa nisy ny "Show Drone" mahavariana ny maso.

---

Dia farany ny nosoratako tao amin'ny Facebook tsy te-hilaza zavatra maro loatra.

 

Ny fifaminganan'ny samy mpanohitra

Lohateny lava: Na ny mody ho namana no tena fahavalo manakana ny fandresena

Mety ho maromaro ihany ianareo no mahatsikaritra fa tsy dia te-hiresaka politika intsony aho. Anjotra aho no kamo satria tamim-pahatezerana no nilazako fa tsy hiara-mirevy amin'ny mpanohitra intsony. Fa mijanona ho anjotra izany.

Matetika rehefa manoratra aho, dia amin'ny farany vao tadiavina ny tena lohateny tsara apetraka amin'ny ranty tahaka itony. Satria rehefa vita ny soratra vao hita ny zavatra tsara itarihana ny mpamaky hamantarany sahady izay tokony ho votoatin'ny lahatsoratra. Tiako kosa eto ny hanohy indray ny resaka politika nosoratana farany taty amin'ny blaogy. 

Nosoratako tamin'ireo ranty blaogy politika roa farany fa misy mifamingana ny samy mpitarika tao amin'ny kôlektifan'ny kandidà, ary olona iray no tena natao izay hanakanana azy tsy handray anjara fifidianana dia i Marc Ravalomanana. Mbola manana ny toerany ilay rangahy ka fomba iray miara-droa no namelezana azy: avy ety ivelany amin'ny famelezan'ny mpitandro filaminana azy sy avy ao anatiny izay ifanaovan-dry zareo samy kandidà mpitarika ao tamin'izany fotoana izany. Mody nanao fandrahonana sy fampihorohoroana ny mpitondra ary mody mamelona tahotra sy manao izay hilaminana anaty "tsy mila gidragidra" kosa ireo mpitarika ao amin'ny fanoherana (vondron'ny kandidà folo) tamin'izany fotoana izany.

Rehefa nandeha ny fotoana dia nizara roa mazava tsara ireo kandidà folo tamin'ny fifidianana ho filoham-pirenena. Isika tsy mahalala izay nahatonga io fivakisana io fa ny naseho antsika dia hoe samy manana ny paikadiny ireto vovonana samy milaza ho mpanohitra ireto. Fa ankoatra izay mety ho hevitry ny tsirairay any dia ny hevitro sy ny eritreritro no nosoratako; niainga avy amin'ny zavatra hita taty am-bala no mivoaka eto; tsy voatery ho marina fa mila tsakotsakoina. Ny vovonana iray nantsoina hoe "Firaisankina (Madagasikara an'ny Malagasy) ary ny vovonana faharoa kosa nantsoina hoe "Kôlektifan'ny Malagasy".

Raha tombanana dia vonona kokoa ho amin'ny fifidianana depiote ny ao amin'ny vovonana "Firaisankina" ary etsy ankilany sy amin'ny ankapobeny kosa dia ny kandidà filoha teo aloha ihany no nirotsaka indray ho depiote ny ao amin'ny "Kôlektifa". Raha ny eo amin'ny samy mpanohitra, ny Firaisankina no manana isan'ny kandidà maro kokoa ary akaiky kokoa amin'ny fahazoana fandresena ao amin'ny Antenimiera miohatra amin'ny Kôlektifa. Ety ivelany no lazaina fa tsy mifanenjika na tsy mifanaratsy ireo vovonana roa ireo, fa rehefa notodihana kosa izay niainana teo dia ireo no tena "mifamely am-pitaka".

Raha ny taty Avaradrano manokana no lazaina, tamin'izay niainako sy tsikaritro, dia ny tao amin'ny Kôlektifa no nanao izay hampisara-bazana na hampizara ny vaton'ny samy mpanohitra ka lasa nanalavitra ny fahazoana poa-droa ho an'ny fanoherana fa dia lasa nifampizara samy mahazo depiote iray aloha amin'izao ny mpanohitra sy ny mpitondra. Raha tsy nandrotsaka kandidà anefa ny kôlektifa dia tena azo nosainina tsara ny mety ho nahazoan'ny Firaisankina toerana roa avy hatrany, raha ny isambato no jerena. 

Inona izany no lesoka? Raha tsy nisy paika manokana tany ambadika tany dia ny fitiavantena no nanimba ny vaton'ny mpanohitra, tsy nahay nanetry tena ihany koa ka mahasanganehana ny mpifidy ary mbola hita ny tsy fahavitrihan'ny mpifidy satria tsy araka ny nantenaina ny isan'ny olona nandrotsa-bato. Mazava tsara ny hevitr'ireo tsy mbola voaentana tsy hifidy dia ny fahazoana fanazavana amin'ny hoe naninona no tsy nifidy tamin'ny fifidianana filohampirenena fa mampifidy indray amin'ny solombavambahoaka? Moa ve dia midika izany fa hiara-hiasa amin'ilay filoha izay tsy nekena ny maha-ara-dalàna azy indray ny mpanohitra? Mbola tsy nahazoana valiny mazava ankoatra ny hoe ifehezana ny mpitondra sy hahazoana ny governemanta no anton'izany mba tsy hanjakazaka ny laoranjy.

Raha ny tsikaritra taty Avaradrano, nanao izay hisintonana ampaha-mpitarika avy ao amin'ny Firaisankina nisian'olana ny tao amin'ny Kôlektifa. Mody ataoko hoe siosio fa tsy azo tsinontsinoavina, ny Firaisankina indray no nanaovana angaredona ankolaka, ary mpanohana mafana fo loatra angamba, avy ao amin'ny Kôlektifa sy avy amin'ny nesorina tsy ho kandidàn'ny Firaisankina no tena mpandrovitra afisin'ny Firaisankina. Ary misy ihany koa ireo tezitra angaha sa ahoana, mamaly bontana ny sasany ka mandrovitra ny afisin'ny Kôlektifa ihany koa. Nisy ny tratranay nandrovitra afisy fa olona "sahirana" anie izany rey olona e! Tena entim-pankahalàna tsotra izao.

Izaho kosa tsy nandrovitra afisin'olona na iza na iza fa mametaka indray hatrany ny afisin'ny Firaisankina amin'ireo toerana nandrovitan'ny sasany. Mila ho isan'andro no mamerina mametaka. Raha misy angamba ny manara-maso dia mety ho mihevitra hoe lasa adala ve sa tsy mba reraka fa afisy sasatry ny rovitina io mbola averina hatrany. Tsy misy karama, tompoko, ny fanaovako izany fametahana afisy izany fa dia entina hanehoana hoe izahay tsy sasatry ny maneho na dia rovitina aza izany. 

Manaraka izany, misy lafiny tsy itoviako hevitra amin'ny kandidàn'ny Firaisankina, indrindra eo amin'ny lafiny kaominina misy ahy, saingy tsy nataoko ho sakana anohanana ny Firaisankina izany satria i Madagasikara no banjinina sady olona manana ny maha-izy azy ihany ilay kandidà no sady maharesy lahatra olona kokoa amin'ny fahaiza-mitarika. Midika izany fa tena nampandeferiko ny hambom-poko manoloana ny fanamby goavana hampandresena ny vovonan'ny mpanohitra matotra indrindra amin'ny fahazoana ny fahefana.

Fahadisoana goavana ny nataon'ny Kôlektifa nanolotra kandidà teto Avaradrano raha tsy hoe tena tsinjony fa izy no hahazo ny poa-droa fa tsy ny Firaisankina. Fahadisoana goavana izany ilay mieritreritra hoe aleo atao izay hahazoana ny toerana iray amin'ilay toerana roa ho an'Avaradrano. Nahalikiliky ireo mpanohana ny Firaisankina ihany koa ny nataon'ny mpanohana ny kolektifa tamin'ny tambajotra sosialy satria ny mpanohitra mitovy aminy ihany no tena norangitiny hisian'ny fifamaliana, lasa mampiditra eritreritra hoe toa ny Kôlektifa indray no tena namingana ny Firaisankina ka ihomehezan'ny mpanohana ny fitondrana fotsiny.