Asa ianao raha nahatsikaritra fa raha nanao fanambaràna voalohany ny tao amin'ny toby CAPSAT tamin'ny 11 oktobra 2025 dia nahateny ny iray tamin'ireo manamboninahitra ambony fa efa tokony ho tamin'ny taona 2023 tamin'ny andron'ny Kandidà 11 no nijoroan-dry zareo tahaka izao saingy tsy nanaiky ireo lehibeny tamin'izany fotoana izany fa hoe aleo hilamina.
Nahare tsiliontsofina momba izany ny mpanoratra, na dia tsy nisy nilaza loatra aza ny momba izany toe-javatra izany. Tsangakevitra saika nijoroana tamin'izany fotoana izany ny tsy tokony hirotsahan'i Andry Rajoelina intsony rehefa fantatra fa nangataka ny zom-pirenena frantsay ho an'ny tenany sy ho an'ny vady aman-janany izy, ary eo anatrehan'ny lalàna velona dia efa tsy mizaka zom-pirenena malagasy intsony ny olona tahaka izany.
Afa-mitadidy ihany koa isika mpanara-baovao fa efa tamin'izany fotoana izany no malaina hidina eny an-kianja ny miaramila, toa tsi-sazoka fotsiny ny fijoroana eo amin'ny kianjan'ny 13 mey. Tamin'izany fotoana izany no nanesorana ny komandin'ny tafika iray ka nosoloina iray hafa mba hampavitrika kokoa ny miaramila.
Raha izay no heverina dia tsy jamba mihitsy ireo miaramila ireo, fa mahita sy misaina, saingy tsy ho afaka ny handray andraikitra raha tsy efa matoky fa maro an'isa sy tsy azo toherina intsony raha mitroatra. Azo heverina fa misy antony matoa tsy niraika loatra ireo mpitarika tao amin'ny miaramila tamin'izany ary efa tsy azo anoharana intsony ny zavamisy matoa nijoro ny tao amin'ny Toby tsy manaiky ny hobaikoan'ny lehibeny intsony ho amin'ny famonoana ny mpiray tanindrazana aminy tsy manana afa-tsy tanampolo.
Nampiasa ny "baïonnette intelligente" ny tafika.
Commentaires