Mety ho gaga ny maro hoe fa naninona no tsy niteny mihitsy nandritra ny tolona? Tsy nandrenesam-peo mihitsy nanomboka ny 25 septambra 2025 ka hatramin'ny androany 14 oktobra 2025. Tsotra ny antony. Niasa tamin'ny alalan'ny fanoroan-kevitra sy fanehoana izany tao amin'ny tambajotra serasera tao.
Tena tolona na dia tsy hita (tsy fantatra) teny an-kianja aza. Niezaka kosa nilaza izay tokony atao, mety nohenoina na tsia. Tena ady sy tolona mandreraka koa ny tolona anjotra. Tsy mifidy fotoana fa na andro na alina dia lasa izao.
Nanoro hevitra koa maninona no mandray ny "Acta Non Verba"? Teny filamatry ny antoko nitondra nandritra ny Repoblika Voalohany izany. Mailaka amin'ny fiteny ny tao amin'ny fanoherana ary nahazo mihitsy ny anaram-bositra "savony vava" aza. Votsa fitenenana kosa ry zareo ka hitany fa tena mety amin-dry zareo io teny filamatra "Asa fa tsy kabary" io.
Nifanandrify androany izany fanombohan'ny Repoblika Malagasy izany (14 oktobra 1958) sy ny fiafaran'ny fitondran'i Andry Rajoelina (14 oktobra 2025), ravan'ny tolon'ny mpianatra ny Repoblika voalohany ary ravan'ny tolon'ny tanora (Gen Z) ny fahefan'ny Filoha Andry Nirina.
Efa novoriana ny sonia tao amin'ny Antenimierampirenena entina manaisotra ilay filoha nandositra nankany Nosy Boraha tamin'ny alahady 12 oktobra 2025 horaisin'ny vorombin'ny Tafika Frantsay ho any La Réunion ka tao indray no nandray fiaramanidina nizotra ho any Dubai.
Rehefa hita fa nihazakazaka ilay fanangonan-tsonia ary nahazo ny fetr'isa kely indrindra azo ekena (110>102) dia namoaka taratasy manambara ny fanafoanana ny Antenimierampirenena ny tao amin'ny Prezidansa. Tsy noraharahian'ny hafa izany taratasy izany ka nataony ho tsy manandanja.
Nanatontosa ny latsabato hanintsanana ny Filoha ihany ny tao amin'ny Antenimierampirenena ka lany tamin'ny latsabato 130 tamin'ireo 131 nandrotsa-bato izany. Mahatsiaro ho voafitaka ny tao amin'ny antoko mpitondra nilaozan'ny filoha sady tezitra tamin'ny fanafoanana ilay andrimpanjakana ka nirohotra hanintsana azy. Latsabatom-pahatezerana valy bontana tamin'ny fanafoanana sa safidy mba hamahana ny olana ateraky ny krizy mianjady amin'ny firenena? Samy maka ny heviny ny tsirairay.
Nandritra izany fotoana izany ny Fitsarana Avo momba ny Lalampanorenana, namoaka filazana fahabangan-toeran'ny Filoham-pirenena sy Filohan'ny Antenimierandoholona, nanambara fa tsy afa-miasa ny governemanta notendrena hanao ny asan'ny Filohan'ny Repoblika, ary manasa ny fahefana miaramila isoloan'ny Kolonely RANDRIANIRINA Michaël tena handray ny asan'ny Filoham-Panjakana.
Tsy fantatra loatra na talohan'io filazana io na taoriana no tonga teny amin'ny kianjan'ny 13 mey ny tao amin'ny toby miaramila CAPSAT nanambara ny handraisany andraikitra. Vita izay dia nizotra teny Ambohitsorohitra ry zareo nanambara fa tsy manankery intsony ny Lalampanorenana nofidiana tamin'ny 11 desambra 2010, miato avokoa ny asan'ireo andrim-panjakana (Loholona, HCC, HDDED, HCJ) fa ny AN (Antenimierampirenena) irery ihany no mbola manohy ny asany. Ho hita eo ihany hoe inona ny antony nitazonany io andrimpanjakana iray io.
Faramparany, amin'ny maha-miaramila azy ireo dia mandray fanapahan-kevitra araka ny tsiliotsofina sy torohay azony ry zareo fa mikaviavia kosa amin'ny fampitan-teny amin'ny vahoaka tsy miaramila. Marina ilay fandresen-dahatra fa mety ho tsy takatry ny vahoaka tsara izay tena tian'ny mpitondra vaovao hahatongavana.
Commentaires