Ny zavatra soratako ho anareo anio dia notazoniko ho tsiambaratelo ka na dia ny olona akaiky ahy indrindra tamin'izany fotoana izany aza tsy nilazako azy. Eto kosa navoakako satria mety ho tohin'ny tamin'izany ihany.
Voaendaka aho tamin'ny 4 desambra 2009, teny akaikin'ny fandraisana fiara ho any Mahitsy. Olona efa lehibe iray no nanao prise ahy avy ao ambadika dia nosintonina ho any amin'ny lalamby aho. Boaikely ampolony amin'izay no nisintona ny zavatra rehetra taty amiko. Nametraka fitoriana tany amin'ny polisy aho avy eo. Hatreo no fantatry ny maro.
Ny manomboka eto kosa dia tsy nisy nilazako na iza na Iza fa notazoniko ho ahy samirery. Andro vitsivitsy taty aoriana, mbola tsy tapitra ny taona 2009, hitako ry zalahy mpanendaka ahy. Hitako nanao baolina mafibe (tournoi) tao amin'ny COUM 67ha. Na ry zalahy aza hitako kaodikaody ihany. Izy iray ekipa izany no niara-nanendaka ahy ary io fanendahana io no natao fitadiavambola hividianany ireo fitaovana sy fitafiana amin'izany. Ny mahavariana, manamorona na anatin'ny fokotanin-dry zareo ihany ry zareo no mpanendaka.
Azoko natao ny nandeha tany amin'ny polisy nametrahako fitoriana fa tsy nanao aho. Nalahelo aho satria azo heverina avy hatrany fa ny mpitarika azy ireo amin'ny fanaovana ilay baolina ihany no azo heverina indrindra ho naniraka azy ireo hanao izay hahazoana vola ka tsy noferana fa na ny fanendahana aza dia natao ankoatra izay fandikan-dalàna hafa.
Nanomboka teo koa aho no tsy nankafy nijery baolina fandaka intsony. Ka tsy ataoko hahagaga raha nisy tamin'ireo noheverina hamirapiratra rahampitso no voarohirohy tamin'ilay famonoana ireo tovovavy roa anisan'ny vaovao malaza teto Madagasikara. Ataoko fa azonareo avy hatrany ny mahatonga ahy ho tato no nanoratra fa tsy tany amin'ilay tranonkala matihanina.
Fa azonareo atao ny manoratra ho ahy ao amin'ny zo@voicesofordemocracyandjustice.org
Commentaires