Raha ny tokony ho izy, efa ao anaty fampielezan-kevitra isika, saingy mandeha ila izany fifidianana izany. Ny vao teo amin'ny fitondrana farany teo ihany no mihazakazaka manao izany, sady efa manantena ny handresy avy hatrany indray mihodina fotsiny. Nahoana tokoa moa no tsy ho izany no hitranga rehefa jerena ny zavamisy? Na tsy dia mpanara-baovao loatra intsony aza ny tena dia nahatsikaritra fa tsy nisy famindram-pahefana mazava teo amin'ny filoha farany sy ireo filoha vaovao. Fampiomanan-tsaina avy hatrany ny filazana hoe "veloma vetivety" ry fahefana ary tahaka ny misy baiko lavitra izany mihatra amin'ireo mpikarakara fifidianana sy heverina ho tompon'andraiki-panjakana nanankinana andraikitra mba tsy hokitihana mihitsy ny momba azy.
Fa ny lafiny iray nisongadina dia ny fiezahana ny lafiny rehetra hiantohana fa ho tafaverina tsimoramora ho eo amin'ny fitondrana indray ka esorina avy hatrany ireo heverina ho tsy hanampy amin'ny fiverenana izany fa mitady hampitovy lanja ny olon-drehetra. Tratran'izany antsojay izany ny Filohan'ny Antenimierandoholona Herimanana Razafimahefa, izay efa voaongana amin'izao fotoana izao na dia tsy mifanaraka velively amin'ny lalampanorenana aza izany fomba fanonganana izany satria mikaonty avokoa na dia ny andro iray aza.
Avy amin'ity Filoha naongana ity ihany koa no nivoahan'ny marina fa tratran'ny terivaimanta izy tsy handray ilay fahefana hitazona vonjimaika ny fitondram-panjakana fa hankinina amin'ny olo-mahatoky izany. Rehefa nitroatra ary ranamana dia nanambara ny nafenina ambadika tamin'ireny filazana fa tsy handray ny fahefana ireny noho ny antony manokana. Rehefa nivoaka izany dia nambaran'ny namany senatera fa "marary saina" izy ka miteniteny foana, mila esorina avy hatrany amin'ny toerana tsy zakany. Efa maharaka avokoa anefa ny mpanara-baovao fa olo-mahatoky vao notendrena ho senatera farany teo no hasolo ny toerana ary tontosa indrindra izany omaly 13 oktobra 2023.
Fa omaly no nivantana indrindra ny fihantsiana ankoatra ilay kandidà milaza ny tenany ho "Bruce Lee". Teny Ampasapito no nitranga ny raharaha, raha nilaza hifamotoana amin'ny mpanaraka azy ny Collectif de Candidats" (Teny Frantsay koa ilay izy!) miisa 11, dia romodromotra miala avy any ny mpanohana ny volomboasary notarihan'ny depioteny eny amin'iny faritra iny, sy ny vadiny. Nibahabahandalana, niedinedina amin'ny tanana roa samy manao V, nisintontsintona ny findain'olona maka sary azy, ary tsy menatra mamelaka tehamaina sy mamely totohondry ireo miakanjo fotsy, na dia mbola anaty fiara fitateram-bahoaka aza izany.
Miandry toromarika hatrany ny olona amin'izay tokony hatao fa tsy namaly bontana avy hatrany. Nihamaro nihamaro hatrany manko ireo tonga amin'ny fotoana na dia teo aza izany fihantsiana te-hanakana ny fiaingana teny amin'ny "rond-point" Ampasapito izany. Nisy mpitandro filaminana vitsivitsy tonga hampisaraka ny roa tonta, fa tsy nisy ny fisamborana ireo olona efa nanao herisetra.
Tsy te-hanoratra lava mihoatra izay intsony fa raha ny taty amin'ny fanoherana angamba no nanao ny toratoraka sy ny herisetra efa ampolony no voasambotra raha kely indrindra ary efa nisy ny baomba mandatsa-dranomaso sy tifitra bala fingotra. Midika izany fa tsy handeha am-pahamarinana velively ny fifidianana nokinasa amin'izao fotoana. Faramparany, maro ireo mitaraina fa nisy naka mialoha ny fotoana ary efa nisy nanasonia ny kara-pifidianany ary tsy tranga maningana izany fa nisinisy ihany ankoatra ireo maro dia maro, amin'ireo mifanerasera amiko, tsy nahazo kara-pifidianana mihitsy.
Commentaires