Accéder au contenu principal

Andro faha-2 taona 2022. Taratry ny ho endriky ny taona?

 Mandingana taona vaovao araka ny fanisanandro gregôriana indray isika. Ny andro voalohany aloha fanaovana fety iny ka hifaly hatrany ny olona na inona na inona mety ho fahasahiranany. Nanao ahoana ny faran'ny taona? Tsy nijery na niraharaha ny kabarin'ny filoha aho. Miala tsiny fa izay no marina. Tsy fantatro marina hoe tamin'ny firy tokoa no nanomboka izany kabary izany ary inona sy inona ny votoatiny.

Ny tsikaritro fotsiny. Manodidina io ora lazaina fa hanaovany jeritodika ny taona 2021 io dia indroa misesy no nahery ny tselatra sy ny varatra niaraka taminy.Hitako mihitsy ny fitresaky ny lanitra tamin'izany ora izany. Nipaipaika kely ny orana ary maty tokony ho roa segondra teo ny jiro fa niverina avokoa izany ankoatra ny tao am-piangonana (FJKM Isahafa), mazava loatra fa nipika ny "compteur" ka tsy maintsy nakarina vao nirehitra indray. Ny nahagaga ny maro dia tsy nety tapaka mihitsy ny jiro. Misy ny nihevitra fa nahazo baiko ny Jirama fa tsy azo tapahina io jiro io mandritra ny kabarin'ny mpitondra.

Vitsy ny olona tonga nanao faran'ny taona, tsy nisy loatra ny fanentanana natao satria efa "mahazatra" ny fisian'ilay faran'ny taona tao. Na vitsy aza dia tanora no betsaka tao, tsorina kosa indray fa io no tsy mahazatra. Ny fahita dia olondehibe sy ny ankizy no tena betsaka tany aloha tany fa vitsy kosa ny tanora. Tamin'ity indray mitoraka ity indray... tany am-piangonana no nahitana ny maro tamin'ny tanora ary avy eo ny ankizy. Vitsy ny olon-dehibe tonga ary azo isaina amin'ny rantsan-tanana ilany aza.

Ny alahady voalohany taona kosa indray, vitsy tsy toy ny mahazatra hatrizay rehefa tonon-taona tahaka izao no namonjy fiangonana (FJKM) satria maro no marary any an-trano na any amin'ny hopitaly. Izay tsy salamalama dia efa tsy handeha any am-piangonana mihitsy. Ireo vao noraisina ho mpandray tapabolana lasa izay, sy ireo manana ny fahasalamana sy zatra mandeha no namonjy ny fotoana. Tena tsy haiko hoe nisy zanaka am-pielezana tonga ve tao? Ny hitako izany fa tsy haiko izay any an-toeran-kafa.

Mafy ny andro androany raha izay no ilazana azy. May ny mpamadika ho herinaratra tao Andekaleka. Olona telo no maty nilatsaham-potaka tany Andapa tany araka ny namana Facebook iray. Na izahay tato an-trano sy ny teto amin'ny manodidina aza moa dia nahatsikaritra fa nisy filatsaham-potaka teto: Ny tato aminay nipoaka mafy dia mafy ny tao an-dakozia (nisokatra ny varavarankely) ary nisy hazavana mena volon-daoranjy hitako avy teo anilan'ny trano niaraka tamin'izany. Feno fitarainana amin'ny fahatapahan'ny jiro ny tambajotra sosialy roa be mpikirakira indrindra teto Madagasikara.

Izaho kosa ao anatin'izany andro faharoa amin'ny taona izany, izay nitontona andro alahady, dia mihevitra sahady fa ho endriky ny andavanandron'ny taona izany... ary tena ho mafy ny taona raha izay fomba fijeriko izao, enga anie mba ho diso hevitra aho. Fa irariana mba ho soa ho anareo ny taona vaovao.

Commentaires

dadandry a dit…
Arahabaina nahatratra ny taona vaovao Zoky a! Ankoatran'ny firariantsoa momba ny fahasalamana (izay mandeha ho azy @ izao vanom-potoana izao) dia maniry aho ny mba ifohazan'ny Malagasy rehetra @ tori-maso lava mahazo azy rehetra.
jentilisa a dit…
Fotoana mihitsy izao satria very anjavony ny resaka any amin'ny media sosialy rehefa be loatra ny olona ao!

Posts les plus consultés de ce blog

Tany mampitsiriritra loatra maha-te haka?

Hatramin'ny fotoana nifindranay nankaty Isahafa tamin'ny taona 2016 dia tsy nisy taona voadingana ka tsy andrenesana olana ara-tany. Raha ny samy eto an-toerana moa maninona fa olona any ivelany hatrany no te-hamabo azy ho an'ny tenany na ho an'ireo mpiray tombontsoa aminy.    Midadasika mora anorenana rahateo ilay izy ka izay mahita dia mihevitra avy hatrany fa tsy misy tompony, na raha misy tompony aza dia tsy raharahiana fa alaina ihany. Noho izany toe-javatra izany dia lasa zatra amin'ny fomba fiasan'ireo mpaka tany ny mponina, efa nisy niharan'ny fitoriana ho nanao herisetra ka saika nidoboka, fa nisy koa ny nidoboka kely mihitsy ho fandrahonana hoe manana ny hery raha miseho manohitra ny fakanay io tany io. Asa efa vita vaksiny amin'izany ve ny mponina ka na teo aza izany dia mbola nivondrona ihany ny olona hiaro ny tany. Tanin'ny voanjo saingy alohan'izany dia tany manan-tantara satria kianja nanaova-matso miaramila amin'ny fomba tandr...

Kianja Isahafa: fananana iombonana, fananana manokana

Filazana mialoha: Ny lahatsoratra etoana dia fampahafantarana sy fanentanana. Raha sanatria misy loza na voina mahazo ahy, indrindra amin'ny resaka raharaham-pitsarana mety tsy ho ampoizina, dia azo heverina ny mety ifandraisany amin'ity fampahafantarana sy fanentanana sy ny tohiny. Ny tanànan'Isahafa dia fokontany iray ao anatin'ny kaominina Anosy Avaratra distrikan'Antananarivo Avaradrano. Teo amin'ny tantaran'i Madagasikara, teo amin'io Isahafa io no nanaovana fanazarantena sy matson'ny tafika voalohany indrindra naorin-dRadama Rainy. Vavolombelon'izany ny tsangambato na ny orimbaton'Isahafa, avy eo ampidirana atsinanan'ny tanàna.   Feno 200 taona amin'ny 4 avrily 2022 ho avy izao ny nananganana izany orimbaton'Isahafa izany izay fanaovan'ny miaramila fianianana fa tsy hihemotra amin'ny ady ka manaiky ny hovonoina (hodorana velona) izy raha sanatria mihemotra na mitsoaka ady. Mifanindran-dalana amin'izany ihany koa...

Manoloana ny rivodoza na loza voajanahary hafa

  Tamin'ny taona 2017 nandalovako tany Colombo, Sri Lanka, no nandalovan'ny rivodoza tao koa. Tanàna amoron-dranomasina io, ka mazava loatra fa mafy ny rivotra entin'izany rivodoza izany. Fa tsy nisy loatra ry zareo ny fotodrafitrasa potika a! Ny hazo sy ireo fafana lehibe rantin-dokambarotra ireny dia ekena hoe miondrika na tapaka mihitsy fa vitsy ny trano simba na niala tafo. Anisan'ny tratra tamin'izany ny tao amin'ny efi-pilanonana sady fitazatazanana ranomasina ilany ambony havia amin'ny sary hitanao. Tsy niandry na nangataka fanampiana fa tapakandro ihany raha be dia tafaverina amin'ny laoniny ny tafo izay nikipaka manontolo ny ilany. Nihomehy ahy ilay namana malagasy avy any ampitan-dranomasina tafaraka tamiko tao nahita ny tahotro tamin'izany sady nampahery hoe aza matahotra ianao fa tsy maninona izany aty e! Hay moa izany efa natao ho afa-misedra rivodoza avokoa ny fanorenana any amin'ireny tanàna ireny.  Ny taty amintsika saika hanorina...