Tsikaritra rehefa manara-baovao amin'izao fotoana izao, na aiza na aiza, fa lasa mifankahala sy mifandramatra ara-pitenenana ny olona, mifanompa sy mifanambany. Tsy mifidy firenena izany fifankahalàna izany, na firenena mandroso io na firenena an-dalampandrosoana na firenena mahantra mihitsy koa aza, fa lasa miteraka fifankahalàna amin'izao ny tsi-fitovian-kevitra.
Ny hitako aloha dia ny eto Madagasikara, ny ao Frantsa sy ny ao Eoropa amin'ny ankapobeny ary ny ao Amerika Avaratra, dia tsy adino koa ny ao Amerika Latina amin'ny ankapobeny. Raha ny eto Madagasikara dia fantarina fotsiny ny fironan'ny fantsona famoaham-baovao iray dia miharihary ny karazam-baovao avoakany, misy ny mitsikera hatrany ny ataon'ny mpitondra na inona na inona ataony, misy indray miaro hatrany ny mpitondra amin'ny lafiny rehetra... lasa toy ny fady ny manao elanelam-panahy, tsy fantatra intsony izay marina sy izay rariny.
Ny ivelan'i Madagasikara indray dia misy fironana tena mahavariana eo amin'ny ankavia sy ny ankavanana. Raha milaza tena ho ankavanana ny olona iray dia tondroina avy hatrany ho fasista tsy tia vahiny, tsy tia mainty, tsy tia miozolomana, tsy tia arabo, raha ao anatin'ireo sokajy ireo ilay olona ka taranaka vahiny nefa milaza tena ho ankavanana dia voavidy, mpamadika, adala, tia tena tafahoatra tsy mahalala afa-tsy ny tenany. Raha ankavia indray ilay olona dia tsy tia ilay firenena ipetrahany, te-handrava ny kolontsaina sy ny fahazaran'ny firenena hatry ny ela, mampiditra vahiny betsaka araka izay azo atao satria tombom-bato ho azy ireny rehefa misy ny fifidianana, ao koa ny tsi-fitiavana ny mpanankarena fa mpanambaka sy mpisoloky, mpangoron-karena tsy mahay mizara ho an'ny hafa.
Raha ny tokony ho izy, tia miresaka politika aho. Saingy ankehitriny tsy hita intsony ny elanelam-panahy, tsy hita sy tsy misy intsony ny fifandeferana sy fifanajana tsotra rehefa samy mahalala ny hevitry ny mifampiresaka aminy, lasa mifanindry no betsaka. Lasa hita matetika ny fifanenjehana ara-politika, mifampiandry kendry tohina amin'ny zavatra mitranga rehetra. Mbola manana ny hoavy ve ny demôkrasia raha tsy maintsy andalovana ny fitiavana hamaly faty? Dia raha tsy miresaka politika dia anjakan'ny mpanambola mikendry toerana politika eto hatrany? Sa haninona ialahy rehefa tsy manam-bola? Ahoana ny hevitrao?
Commentaires