Araka ny nolazain'ny nanangana azy voalohany dia feno 24 taona ny tambajotra malagasy "namana serasera" talohan'ireo malaza fantatsika ankehitriny sy zary mahazatra antsika. Ny 19 oktobra 2002 tokoa, araka ny voalaza, no nitsangana ny tranonkala. Ny zavatra niainako kosa no azoko lazaina. Tamin'ny voalohany dia "mailing list" na "yahoogroupes" no nidirako. Dia nisy ireo Malagasy manerana izao tontolo izao niditra tamin'izany vondrona izany. Asa tsy nisy niresaka ve sa ahoana fa "nangataka kintana" tsirairay ireo olona tao, izany hoe nangataka ny hiala amin'ny vondrona.
Avy eo nisy resaka politika mafana tao amin'ireo Malagasy diaspora ireo. Ny tsy zakako tao anatiny tao dia ny lainga nafafy tao anatiny, mifanohitra tanteraka tamin'izay niainan'ny Malagasy no niadian-kevitra tao. Nanomboka tamin'izay aho no namoaka vaovao isan'andro manana ny lohateny hoe Maresaka arahina daty. Tankina ny lainga nifafy. Avy eo nahita sy tafiditra tamin'ity sehatra ity amin'izay. Nifanontany tamin'izany hoe maninona raha mitambatra ny Serasera.org sy ny Serasera.com fa samy Malagasy izao ihany. Nanaka-dresaka ilay tao Italia fa tsy nanaiky araka ny tatitra ny tao Soisa satria samy manana ny tanjony. Ankehitriny, ity mbola mijoro ity sisa mbola mitsangana, noho ny fitiavana ny teny malagasy.
Mijoro fa sehatra hafa indray no tena ahafantarana azy amin'izao fotoana izao: ny Tononkira sy ny Radio Vazo Gasy. Azo atao ihany koa ny miteny ny Baiboly Katolika sy ny Baiboly DIEM, nandray anjara tamin'ny fampidirana andininy tamin'izany ny tena. Azo ambara hoe nisy fananganan-javatra tao anatin'izany. Nisy fitadiavana namana tao, nisy fanaovana dinika izany hoe fiadian-kevitra, nisy ny karajia raha te-handany andro angaha sy mifampiresaka mivantana, nisy koa ny sehatra blaogy roa samy hafa. Tena hoe natao ho an'ny Malagasy daholo ny zavatra natao tao e!
Niroborobo tany am-piandohana fa efa takon'ny media sosialy vahiny manerantany amin'izao fotoana izao io sehatra io. Miditra amin'ny alalan'ny solon'anarana fa mbola tsy nahazatra ny Malagasy ny nilaza tamin'ny teny anarana. Inona ry no tokony atao mba hampisy hatrany ny fifampidinihana sy fifampiresahan'ny samy Malagasy e? Arahabaina izany nahadingana izany taona maro lava dia lava izany. Ny Manaraka dia firariantsoa... mba haharitra hatrany sy hahita lalam-baovao ahafahana mamaha-tena.
Fanamarihana: Efa nahavita manontolo ity lahatsoratra ity aho vao nahita ity fitantarana ny amin'ny fahaterahan'ny Serasera.org ity. Manambina azy manokana ny volana oktobra fa 3 oktobra 1999 no nijoroan'ny tambajotra voalohany indrindra izay niovaova endrika mihitsy aloha!
Commentaires