Nisy nanota fady ve?

Mankasitraka ny Barea avokoa ny Malagasy tamin'ny zava-bitany nandritra iny fifaninanana eo amin'ny sehatra afrikana iny. Azo lazaina ihany koa hoe mety ny nataony ary hita ny vokatry ny ezaka na dia tena nisy tokoa aza ny fitavozavozana izay tsy afa-miala amin'ny sehatra goavana tahaka ireny. Lasa ihany ny saina hoe fa inona indray moa no mbola naharesy ny ekipa raha lazaina ho mendrika ny nataon'ny ekipantsika?

Tsy misy resaka hoe tsy mahazaka resy fa tena maro dia maro ny nilaza ny fiangarana teo amin'ny mpitsara ny lalao, nisinisy ihany koa ny niteny fa natao izay haharesy ny Malagasy na hoe tsy mahazo mandresy ny Barea. Ny mpilalao sy ny zatra lalao tahaka ireny ihany no mahatsapa fa na inona na inona ezaka ataon'ny iray dia sarotra izany handresy ny mahay izany mbola miampy fitongilanana mankany aminy ihany. Efa hita tsara ny Malagasy fa nahazo toromarika tsy hanao fahadisoana kitoatoa mihitsy fa tsy hitsitsy io fitsarana baolina io. 

Efa tsikaritra ny finiavan'ny sasany saika tsy hanaiky ilay baolina voalohany tafiditry ny Malagasy satria aloha loatra fa tsy nisy azo nokianina ka dia tsy maintsy nekena, tsy tahaka izany koa ny tamin'ireo baolina tafiditry ny Maraokana, indrindra fa ireo baolina roa farany tafidiny. Efa nisy ihany ireo Afrikana nahatsikaritra fa raha vao Maraokana izany dia mahazo tombondahiny eo amin'ny resaka fitsarana indrindra fa amin'ny VAR (Video Assistance Referee).

Fa ny iray izay tsy lefitro ihany koa dia ny mbola nitenenan'ny Filohan'ny Repoblika ihany tamin'ireo mpilalao mialoha ny famaranana, tamin'ny alalan'ny antso findain'ny Filohan'ny FMF, nefa izay no tena antony nanakanan'ny maro azy tsy ho any Kenya: tsy hametraka karazana tsindry indray ho an'ireo mpilalao ireo. Fa ny tena nanafintohina dia ny baiko nataon'ny Filohan'ny FMF hiarahan'ny mpilalao mihiakiaka hoe "Merci Président!". Dia tena tsy maintsy natao mihitsy ve ireny hiaka ireny? Ny tenako no mihevitra hoe tsy mahagaga raha resy isika raha ireny toe-javatra ireny fa mbola tsy mendrika antsika ny hahazo ny amboara aloha! Tsy maintsy mahay manetry tena ary Andriamanitra ihany no isaorana sy ankasitrahana vao mety ho henoin'Andriamanitra ny vavaka naseho nandritra ny fifaninanana. Tsy ho kisendrasendra noho izany ny nahatafiditra ny baolina teo amin'ny minitra faha-80 fa tena hafatr'Andriamanitra mihitsy, noho ilay fitiavana ny 8 santimetatra sy ny 8 kilaometatra. 

Mety hisy hilaza hoe tsy misy idiran'Andriamanitra rangahy ny baolina tahaka ireny, saingy io izy io. Niankohoka nivavaka ny mpanazatran'i Maraoka isaky ny mahatafiditra baolina ry zareo fa nanadino tanteraka izany izy tamin'ny baolina fahatelo tafiditra. Dia iny ny vokany, samia mitsakotsako. Am-bava homana, am-po mieritra!