Barea mahazo famaranana... ny mpamosavy no tia misoavaly olona

Horakoraka ny an'ny Malagasy mpijery raha vao tafiditra ilay baolina tao anatin'ny dimy minitra farany (115 minitra) tamin’ny fanalavam-potoana nandritra ny lalao nifanandrinan'ny ekipam-pirenena malagasy mpilalao eto an-toerana sy ny ekipam-pirenena sodaney mpilalao ao an-toerana. Nandritra ny lalao manasa-dalana amin'ny fiadiana izay ho tompondaka eto Afrika ho an'ny mpilalao ao an-toerana no nisian'izany horakoraka izany. Tany Dar-es-Salaam renivohitr'i Tanzania no nisian'ny lalao ary ho voarakitra an-tantara fa sambany ny ekipam-pirenena malagasy no tafiakatra amin'izany famaranana izany amin'ny lalao CHAN na dia efa nilalao folo aza ny Malagasy nanomboka ny minitra faha-76. Tranonkala akaikikaiky no nahatafiditra ny baolina ary nampitaintaina hatramin'ny farany ny lalao.

Tamin'ny fahitalavitra no nanarahan'ny mpijery ny lalao. Maro ireo nanaraka tany amin'izay be olona toy ny toeram-pisotroana sy ny toeram-pirevena, tsy te-hijery irery fa mba hiara-mitaintaina amin'ny besinimaro, mba misy iresahana, tsy miteny irery eo am-pijerena, miaritra teny ratsy sy ompa, mihomehy amin'ny rabirabin'ny ankizy amin'ny fihetsika hitany maso ao amin'ny fahitalavitra. Saika ankalamanjana avokoa ny ankamaroan'ireo toerana nijerena ny lalao, fa nisy koa ny nanaraka hatrany am-piangonana, tsy fanao izany ary heveriko ho tsy mety ihany koa satria manimba ambiansy, voafetra loatra ny fihetsika azo atao am-piangonana nefa ny olona tsy azonao ferana amin'ny lanonana tahaka itony. Tsy sarotiny kosa aho raha ny rindrina ivelan'ny fiangonana no atao lafika amin'ny vidéo-projecteur noho ny haavon'ny rindrina ahafahan'ny rehetra mijery tsy misy takona any ivelany.

Ho anay ambanivohitra dia eo amin'ny toerana malalaka ihany izahay no mifaly sy miravo. Izay mahazo ny lalambe kosa afaka  mihazakazaka mandeha arabe, mitondra ny fitaovana entina itabatabàna na alina aza ny andro.

 

Fa mahatohina ny maro kosa, amin'ireo mpanara-baovao ny fisoavalian'ny sasany ny toe-javatra tahaka itony isehosehoana sy hanandratan-tena. Mahasosotra ihany koa ny fisolelahana atao amin'ireny misoavaly ny ezaky ny mpilalao ireny. Tahaka izany koa ny amin'ny valisoa omena ireo mitondra ny voninahim-pirenena ireo izay tena kely loatra raha oharina amin'ny vola alefan'ny CAF ho an'ny federasiona tsirairay. Ny manahirana dia toa ny mpijery sy ny mpanara-baovao indray no sarotiny kokoa ary mitady hanao takomaso kosa ny mpiandraikitra ka mahatonga ahiahy fandrao ry zareo no mitavana ny hatsembohan'ny ekipa. Hamaranana ny fitantarana dia tsy aritra ny miteny hoe ny mpamosavy no tia misoavaly olona, izany hoe misintona ny voninahitra sy ny fahamendrehan'ny hafa ho an'ny sasany. Mbola resabe moa hatramin’izao ny hoe mety ve ny fiantohan’ny fanjakana ny sarandalan’izay handray fiaramanidina hanatrika ny famaranana hihaonana amin’i Maraoka sa tsia… ?