Iray volana mahery izao no nitranga ilay voina tsy manampaharoa teto Madagasikara nitranga teny Ambohimalaza, sampanana mivily mankany Imerinkasinina. Noho ny toe-javatra mifamahofaho tsy ahafantarana izay nitranga tokoa na iniana anafenana izay tena nitranga sy ny antony mahatonga ny voina dia nanoratra ihany ankehitriny.
Ny fitondram-panjakana midrikina hatramin'izao fa famosaviana amin'ny alalan'ny fanapoizinana no nitranga tamin'io fotoana iray efa nahafatesana olona mihoatra ny telopolo amin'izao fotoana izao io. Misy kosa ireo mihevitra fa tsy izany velively fa trangan-tsakafo efa tsy tokony nohanina intsony ny tao ka niteraka aretina (fahapoizinana ihany koa) antsoina hoe "Botulisme" izay tsy maintsy anaovan'ny fitondram-panjakana fanambaràna eo amin'ny sehatra iraisampirenena amin'ny alalan'ny OMS (Sampan'ny Firenena Mikambana misahana ny Fahasalamana) ny fisiany.
Efa niteraka fisamborana olona, izay heverin'ny mpanoratra ho lasibatra tsy fidiny, ity raharaha ity satria endrikendrehina ho izy no nandraraka ny poizina. Nohazonina amponja ihany koa, araka ny resabe mandeha, ny mpitsabo amin'ny alalan'ny otra iray, nahasitrana olona marary tao amin'io lanonana namoa-doza io. Satria manjavozavo ny raharaha hatramin'izao dia lasa ny ahiahy fandrao tena iniana novonoina mihitsy ireo olona ireo ka lasa sorona amin-javatra tsy takatry ny sain'olombelona tsotra, ka noho ity ramatoa iray ity nahasitrana dia nohazonina izy fandrao sitrany koa ny hafa. Ahiahy io fa tsy milaza velively fa izany no marina.
Manginy fotsiny ireo fahafatesana tany amin'ny faritany toa an'Ambositra, Mahajanga, Toamasina sy izay tsy nisy niresaka.
Ankehitriny, ireo olona any ampitan-dranomasina ihany no tena mahasahy miteny sy miresaka fa ny eto an-toerana kosa mangina fandrao tratran'ny fiampangana ho manakorontana ny filaminam-pirenena tahaka ilay Mpitandrina iray izay tsy hitako moa ny zava-nosoratany, ka voatery nanao fialantsiny novakiany an-taratasy mba tsy hampidirana azy am-ponja.
Ohatra amin'ny fahasahiana manao zavatra ity vehivavy iray ity, efa mihoatra ny 15K (15000) sahady ny nizara ny zava-nosoratany tao anatin'ny fito ora.
Commentaires