Nalaza androany 22 febroary 2024 tao amin'ny media sosialy ny fandrodanana trano maromaro tao Bemahatazana Antsofinondry, miaraka amin'ny kaominina Sabotsy-Namehana. Efa hatry ny ela no nalaza ity raharaha ity. Raisina ho ohatra amin'izany ny nosoratan'ny mpanao gazety efa nodimandry Ony Rambelo tamin'ny 26 oktobra 2017 tamin'ny 07:18 maraina. Nolazainy fa hafatra avy amin'i Gege Rasamoely tamin'izany fotoana izany io nampitainy io: Nofefen'ny orinasa mbola tsy hita vatana antsoina hoe Meji, saingy fantatra fa Shinoa ny tanindrazany rehefa nolazaina fa novidiny tamin'i Rajabaly Emiraly sy ny société Tricomad izany tany izany.
Tany novidiana tamin'ny taona 1910, fa nisy nangalatra ny kadasitra ny tany tamin'ny taona 1973. Efa nanomboka tamin'izany no nandeha ny ady tany amin'ny tribonaly ary nampigadra ilay mpangala-tany, izay namorona anarana hitovy amin'izay voasoratra teo amin'ny kadasitra. Novidin-dRajabali izany ary voafindra tamin'ny anarany ny tany, araka ny nolazain'ny tompon'ny tany voalohany ihany. Herintaona taorian'izany no namarotany azy amin'ilay société MEJI. Io farany io no nampaniraka zandary 40 mahery sy namefy ny tany tamin'ny boirons sy planches.
Niantso vonjy tamin'ny mpiray tanindrazany aminy i Gégé Rasamoely saingy tsy hay hoe ahoana no hanavotana azy amin'ity raharaha ity. Raha ny hevitr'ireo namoaka ny tao an-tsainy dia tokony ho mpiray tsikombakomba amin'ny mpivarotra ny tany ny mpividy ny tany, toy ny mpangalatra ihany izany rehefa halatra no nahazoana azy tamin'ny voalohany. Saingy noho ny vola sy ny harena ve fa nandeha sy niova tompo sy anarana ihany ny kadasitra. Ao anatin'izany rehetra izany dia mimenomenona amin'ny Facebook ihany no ataon-dRamalagasy... fa misy dia misy ny miaro ny mpividy ny tany sy milaza fa izany manana ny taratasy no tompony ara-dalàna.
Commentaires