Misy mbola tsy voatantara ny teo anelanelany teo. Ny alahady 17 desambra 2023 maraina dia nisy nahatsikaritra ny fiaran'ny zandary nijanona amoron'arabe somary manoloana ny kianja lehibe fantatra eto Isahafa ary somary eo avaratra atsinanan'ny sekolim-panjakana (EPP) eto Isahafa.
Afaka kelikely, indreto ry zalahy nodidiana nandrefy tany fa miaraka amin'ny shinoa manondrotondro ilay tanin'olona nisy olon-kafa milaza ho tompony, izany hoe raha jerena dia miezaka mivarotra ilay tany amin'io shinoa io ry zalahy sa ve hoe io fa efa vita refy tsara ilay tany?
Voatery nanatona sy niresaka tamin'ny zandary tao anatin'ilay fiara voalaza tetsy ambony ny prezidàn'ny fokontany sy olona vitsy manontany ny antony itondrany mpividy tany eto amin'ny toerana efa fantatra fa ifandirana tsy fantatra mazava izay tena tompony. Namaly anefa ireo fa efa naheno "renseignements" ny amin'izay zavatra izay hitranga androtr'io. Ny olona kosa anefa mihevitra fa nirahina teo ireo hiambina an-dry zalahy iretsy sy hiditra an-tsehatra raha sanatria misy ny fifampikasihan-tanana.
Nandritra izany fotoana izany anefa, hay teo atsimon'ny kianja lehibe ry zalahy nandrefy tany no nitoby nitondra fiara roa sy moto efatra tany ho any. Ankevitry ny efa vita ny resaka tamin'ilay shinoa matoa niainga ry zalahy. Nohararaotin'ny prezidàn'ny fokontany io fotoana io mba hanazavan'ireto zandary ireto amin'ny fokonolona izay hivory ny hariva ny anjara asany marina ao anatin'ity raharaha ity. Tsy nanaiky izany loatra moa ry zareo.
Ny atoandro dia niverina nankao amin'ny prezidà indray ireo zandary voalaza etsy ambony iretsy niangavy taminy hanafoana ilay fivoriam-pokonolona amin'ny resaka tany. Somary nahagaga ihany ilay fangatahana fa rehefa nanontaniana ny antony dia hoe sao dia hikorontana ao ianareo dia ho lasa fanohintohinana ny filaminam-bahoaka no hitranga ary azo atao ny fisamborana amin'izay fotoana izay. Tsy nekena moa izay fiangaviana izay fa ny natao dia ny namindra ny toeram-pivoriana mahazatra teo aloha ho lasa ao amin'ny tokotany filalaovan'ny mpianatra ao amin'ny EPP satria lasa tafiditra tao anaty tany nofaritan'ireo nandrefy tany izany toeram-pivorian'ny fokonolona izany.
Notanterahana ny fivoriana izay resaka tany rehetra eto Isahafa no lohahevitra voalohany, resaka lalana mampitohy an'Isahafa amin'i Lazaina no lohahevitra faharoa ary ny resaka fandriampahalemana no fahatelo.
Nisy ary ny paika (tsiambaratelo) hotanterahana amin'ny fomba hanohizana ny tolona fiarovana ny tany eto Isahafa. Nifanao tora-po manko ny olona fa matoa tontosa izao zavatra izao dia misy amin'ny fokonolona no niray tsikombakomba tamin'iretsy vahiny mpamabo iretsy. Nanjary tafavoaka fa tsy afaka ny hifampatoky intsony ka tsy maintsy singanina ny olona hanatontosa izay tokony atao fa antsoina ihany ny daholobe rehefa misy ny ilàna izany.
Paika notanterahana ary ny handrefesana ny tanin'ny EPP araka ny laharana parcelle mifanaraka aminy, satria hafahafa ihany ilay hoe tafiditra ao anatin'ny faritra noraofin'ilay olona mpamabo ny biraom-pokontany sy ny efitra iray an'ny sekoly ary ny tranompokonolona navadika ho sehatra fanaovana lanonana.
Notanterahana tokoa izany ny herinandro nanaraka an'io ihany ary tsikaritra tao fa tena nisy ilay fihoarana tamin'ny fandrefesana (tamin'ny decametre fa tsy fandrefesan'ny topographe manara-penitra) nataon'iretsy mpamabo. Nisy ny "huissier de justice" nandrakitra an-tsoratra izany zava-nitranga izany.
Tamin'ny alin'ny 24 desambra mankany amin'ny 25 desambra nisy nanala an-tsokosoko ny "piquets" hazo porofon'ny fihoarana. Efa nifameperana tamin'ny fokonolona mazava anefa ny tsy hanalana ireo piquets ireo mihitsy satria porofon'ny zavatra tsy ara-dalàna natao ireo. Noho izany, izay manahy ny amin'ny zavatra mety hamandrika azy no hanala azy ireny fa tsy ny fokonolona na oviana na oviana.
Dia mitohy amin'ity fiantsoana ny mpanao gazety ity ny raharaha amin'izao fotoana izao.
Aucun commentaire:
Enregistrer un commentaire