Eny e! teny frantsay moa no nanaovanareo ny anaranareo fa zakaina eny ihany izany. Izay ve ny fotoana mety ka nidirana indray tamin'ny Coliséum Antsonjobe? Raha niainga tamin'ilay hoe tsy miditra herisetra araka izay azo atao dia tokony ho tamin'ny nanolorana voalohany ny Coliséum dia efa notairina izany satria maridrefy hamantarana ny hamaroan'ny mpanaraka io toerana iray io.
Tsorina kosa fa tsy nitsanga-menatra ny mpitaky ny ara-dalàna manohitra ny barofo ataon'ny eo amin'ny fitondrana raha ireo olona tonga tao anaty fanentanana zara raha misy ora roa ireny araka ny fijeriko. Avy amin'ny fandaharana "Angaredona" iarahan'ireo fampahalalam-baovao mirona amin'ireo vondron-kandidà manohana ny fifidianana madio ihany no nisy izany fanentanana izany. Fantatro tsara fa tsy zoto fa adidy ny nahatongavana teny. Tsy zoto satria mety ho nisy zavatra hafa natao, toa ahy, tsoriko izany, fa fandresen-dahatra sy adidy kosa fandrao ny tsi-fahatongavako no maha-banga ny toerana sy manala baraka ilay tolona ho tolon'ny vitsy an'isa te-hanakorontana fotsiny.
Resy lahatra ny olona satria tsy niditra herisetra mihitsy ny mpitarika ary nanao izay hialana amin'izany. Hitako ho kanosa aza indraindray fa vao misy zandary manatona fotsiny dia iny fa mirifatra tahaka ireny nanao ratsy ireny. Izay no efa nanoratako tao amin'ny tambajotran-tserasera teo hoe raha manaiky hosamborina eny an-kianja ny kandidà dia mirodana ho azy ny fitondrana. Vao teny am-pikabariana teny Manakambahiny tamin'ny zoma 20 novambra mijery izay mety ho fahatongavana mpitandro filaminana avy any Tsimbazaza dia kivy ny tena. Tsy hanao raha ireto raha izao.
Fandrisihana ny kandidà no nataon'ny vahoaka tonga teny Antsonjobe ny Asabotsy lasa teo. Vahoaka tsy tia gidragidra, vahoaka tsy nentanina hoe hisy fizaram-bola na akanjo na raoby na tee-shirt, vahoaka tsy nalaina fiara hatrany amin'ny fokontany misy azy fa dia vahoaka nandrera-tena tamin'ny dia an-tongotra aza noho ny tolona iaraha-manana.
Nihabetsaka tokoa ny olona tonga satria niha-sahy ary mahatsapa fa tsy azo atao intsony ny mihemotra. Ireny no lazaiko hoe feno toy ny atodim-borona, feo fa mbola misy banga ho toy ny rivotra iainan'ilay zana-borona ho foy fa tsy feno toy ny boatin-tsardines tsy mendrika ny maha-olombelona sy mety ho tsy azo iainana.
Fa satria miha-mahazo vahana hatrany ilay tolona, dia mivoaka ny efa noahiahian'ny maro amin'ny hoe misy natao handoto rano fotsiny ao anatiny ao. Efa nifanarahan'ny rehetra fa fifidianana madio no takiana ary efa mivandravandra fa mitongilana tanteraka any amin'ny vao nitondra farany teo ny rafitra rehetra na ara-panjakana na ara-pifidianana, fa dia mbola nisy ihany ny nisolantsolana hanao izay haharava izany fitakiana izany.
Dia nisy ireo tao amin'ny tambajotran-tserasera nanambara avy hatrany fa namono tena ara-politika izy afa-tsy hoe efa izy mihitsy angaha no nampanantenaina omena ny toerana rehefa tsy afaka intsony i "Vazaha". Toy ny tamin'ny tolon'ny 1991 izay niainana ihany ka nahavaky ny Hery Velona ho Rasalama sy Rabearivelo izay samy sekoly nanaovana ny fanomanana tolona. Dia iny fa nisintaka tamin'ny alalan'ny fanaovana propagandy nanomboka androany alahady 22 oktobra ny kandidà iray nanambady "vazaha".
Ny fampitamberina zavatra toy izany no entina mampahatsiahy ihany koa fa nandritra ireny tolona 1991 ireny dia ny Hery Velona Rabearivelo alias MFM na Mpitolona ho amin'ny Fampandrosoana an'i Madagasikara (Mpitolona ho amin'ny Fanjakan'ny Madinika teo aloha) no nataon'ny Hery Velona Rasalama fahavalo mihoatra noho ny Mandatehezana Miaro ny Sosialisma Malagasy (MMSM) sy ny AREMA mpitarika azy tamin'izany fotoana izany. Na mety ho misy aza ny rariny ho an'ny MFM, ny fiatahana tamin'ny besinimaro tamin'izany no nametrahana azy ho Mpamadika koa aza atao mahagaga raha efa mandeha sahady ny esoeso amin'izao fotoana izao hoe samy Agrume daholo na ny laoranjy na ny voasary makirana fa ny iray mamy ary ny iray marikivy.
Amin'izao fotoana izao dia tokony hihamazava amin'ny olona kokoa ny tanjon'ny Vondron'ny Kandidà ambiny amin'izao fotoana. Tsy misy fifidianana amin'ny 16 oktobra 2023 ary efa tokony hipetrapetraka avokoa ny paika rehetra ho amin'izany fa ny dinika izany efa tsy raharahian'ny mpitondra na oviana na oviana.
Commentaires