Vaovao ny taona, ifampiarahaban'ny mpianakavy sy ny mpiara-monina, ka miarahaba anareo rehetra noho izany vanin-taona izany ary mirary soa ho anareo indrindra. Hotsarovana amin'ity fiandohan'ny taona 2023 ity ny fahatapahan-jiro nihatra taminay nanomboka ny 1 janoary tamin'ny 5 ora hariva ka hatramin'ny 3 janoary tamin'ny 5 ora hariva mahery... izany hoe naharitra 48 ora be izao raha enina ora izany fahatapahana izany telo taona lasa izay.
Noho izany fahatapahan-jiro maharitra nihatra taminay izany dia tsy naharaka ny resabe tamin'izay nitranga teto akaikinay izahay (mifanila amin'ny kaominina Ambohimanga Rova tsinona izahay!), koa aza atao mahagaga raha tena tratra aoriana tokoa ny fitantarako izay fahazoako ny resaka izay tsy hanafosafo na handambolambo velively. Tsy mitovy amin'ny maro amin'ny olona fantatro ao amin'ny media sosialy ny hevitra satria hitako fa nanjaka ny fandisoam-baovao ka tafiditra amin'izany ny gazety amin'ny teny malagasy toa ny gazetiko ohatra! (io no hitako Facebook!).
Inona ny fiandohan'ilay resabe?
Namoaka ranty tao amin'ny Facebook ny iray amin'ireo (rahalahy) ao amin'ny Tarika Christophe Ratrema fa nanao diabem-panafahana nitety ireo doany rehetra tao Ambohimanga Rova dia avy eo namarana izany tamin'ny fiderana lehibe niarahana tamin'ny tarika sy ny Koraita ary ny Ampifitia.
Avy amin'io fitenenana io no niteraka ny fandrangitana rehetra sy ny filazana fa nanimbazimba ireo Doany tao ny tarika sy ny Fifohazana izay tondroin'ny LGDI avy hatrany ho sekta moa izany.
Nampiana 08 janoary 2023: ny nosoratan'i Xavier Ratrema:
Fotoana manan-tantara ny andro androany 29 desambra teny Ambohimanga izay niarahana tamin'ny tobim-pifohazana teny an-toerana! nanao diabem-panafahana nitety ireo doany rehetra avy eo nofaranana tamin'ny fiderana lehibe niarahana tamin'ny Tarika Christophe Ratrema, Ny Koraita, ary ny Ampifitia. Maro ireo olo-manakaja nanotrona sy nandray anjara! Dingana lehibe ho amin'ny fifohazam-panahy no vita! Mbola nanamarika ity taona ity! Taona 2022 famangian'Andriamanitra manokana Sal 29:4 [ampidiriko eto ity fa tsy tao anaty ranty "Ny feon'i Jehovah be hery; Ny feon'i Jehovah be voninahitra."]
Ahoana hoy ny Gazetiko?
[Lohateny: Doany eny Ambohimanga Rova, niteraka resabe ny fandroahana devoly nataon'ireo andiana mpivavaka]
Nanatanteraka fandroahana devoly tamin’ireo doany tao amin’ny Vohitr’Ambohimanga ireo kristiana notarihin’ireo mpihira evanjelika dia ny tarika Christophe Ratrema sy ny Koraita ary ny Ampifitia ny 29 desambra 2022 lasa teo.
Nanaraka izany ny fanehoan-kevitra notsongaina avy amin'olona vitsivitsy milaza fanamelohana izao fihetsika manimbazimba ny kolontsaina malagasy izao.
Ahoana hoy ny La Gazette de la Grande Ile?
Nahazo habe tsy hay refesina intsony ny ranty nataon'i Xavier Ratrema tamin'ny 29 desambra 2022. Novizanin'ny mpikirakira Facebook tanteraka ity filohan'ny fikambanan'ny mpihira evanjelika ity. Anisan'ny nanameloka ny fanimbazimbana ireo alitara masina fanaovana fomba ireo ny gazety sady manaja ny maha-lahika ny firenena.
Amin'ny ankapobeny dia fanamelohana ilay fihetsika no nalaza tao amin'ny Facebook.
Fa inona no nitranga tao Ambohimanga Rova tamin'ny 29 desambra 2022?
Herinandro mialoha ny fotoana dia efa nahita ilay afisy tao amin'ny Facebook aho. Voalaza mazava tsara fa ny Fifohazana FJKM sy ny Kaominina Ambohimanga Rova no miaraka mikarakara ilay "Ambohimanga Rova Midera" izay lazainy fa "Fiderana goavana". Voasoratra anelanelan'izany fa "Vavaka sy Fiderana an'ilay Tompon'ny Tompo sy Mpanjakan'ny Mpanjaka ho fanasitranana ny firenena" no anton'ny fotoana.
Notanterahana tokoa ny fotoana fa mbola nisy zavatra nokarakaraina teny an'elanelany teny. Voatery adika manontolo eto ny fandaminana sy izay notanterahana:
Ny hetsika Ambohimanga Midera dia hetsika nokarakarain'ny Kaominina ary nangatahina fiaraha-miasa tamin'ny fifohazana. Zavatra niarahan'ny roa tonta nidinika teo amin'ny iray volana ny zavatra ho atao. Ka toy izao:06 ora-7 ora: Vavaka fanomanam-panahy hiatrehana ny DIABE Vavaka mangina mitety vohitra (tsy mihira, tsy miresaka, tsy mandroaka devoly)
7 ora-8 ora: Fandaminana sy fanomezana ny toromarika rehetra. Ny zavatra tsy azo atao rehetra mba hifanajana. TENA HENTITRA TAMIN'NY IO ZAVATRA TSY AZO ATAO IO NY TOMPONANDRAIKITRA NANAO FANDAMINANA (Nizara tarika 11)
8 ora-10 ora: diabe mitety tanàna ka mifarana teo amin'ny tokotaniben'ny Kaominina.
8 ora-8 ora 30mn: Fanolorana ny rano ho an'Ambohimanga izay namboarin'ny Fifohazana rehefa simba tsy nandeha nandritra ny 2 taona mahery.
10 ora-11 ora 30mn: fanompoam-pivavahana ho an'ny Firenena. Notronin'ny Ben'ny Tanàna, ny Filohan'ny senat, BMF, ireo Mpitandrina sy Raiamandreny Toby.
11 ora-12 ora: Fandraisam-pitenenana.
12 ora-15 ora: Hira fiderana niarahana tamin'ny Ny Koraita, Ampifitia, TCR
[Mariho fa:]
Tsy nisy fandravana doany
Tsy nisy fidirana doany fa nandalo ny faritra misy doany.
tsy nisy fandroahana devoly nitabataba fa vavaka mangina
Inona avy izany ny fandisoam-baovao tsikaritra?
1- Ny filazana fa ny Tarika Christophe Ratrema no nitarika ny diabem-panafahana tamin'ny alalan'ny fandroahana devoly tany amin'ireo doany.
Voalazan'ny afisy fa ny Fifohazana FJKM no niaraka nikarakara tamin'ny Kaominina Ambohimanga Rova ny fotoana. Ny fanazavana ambanimbany dia nanoritra mazava tsara fa ny Kaominina no nila vonjy tamin'ny Fifohazana FJKM tamin'ny alalan'ny tobim-pifohazana teo an-toerana. Fanontaniana: Fa naninona no nila vonjy ny Kaominina ary nahoana no ny Fifohazana FJKM no nangataham-bonjy?
2- Ny filazana fa nisy ny fidirana tamin'ny doany sy ny fandroahana devoly natao tany amin'ireo Doany nandalovana. Voafandrika tamin'izany miharihary ny Gazetiko sy ny LGDI izany notononiko etsy ambony... Fandrika nataon'ny sasany anefa io toe-javatra io ilazana fa nanimbazimba sy nanao izay tsy mendrika ny Fifohazana FJKM.
Izay tsy mahafantatra no ilazana fa tsy manao fandroahana devoly amin'ny toerana na zavatra ny Fifohazana FJKM fa amin'ny olona ihany. Ny fanamarihana etsy ambony nametraka fa tsy nisy ny fandravana doany ary tsy nisy fitabatabana fandroahana devoly teny.
Dia inona izany no anton'ilay fandrangitana?
Samy tsy misy mahalala isika fa dia efa misy mivoy mafy dia mafy moa io, miaraka amin'ny fanasoketana ny Fifohazana FJKM mazava loatra. Ny voamariko kely fotsiny dia fanomezana rano (fatsakana) ho an'ny Kaominina avy amin'ny Fifohazana no mila nanaovana fihetsiketsehana be amin'ny fitetezana tanàna. Ankilan'izay dia "fidiovana" no andehanan'ny olona eny amin'ireny doany ireny ka anatin'ny fomba idiovana indrindra ny rano.
Sao... averiko indray... sao dia nisy fandrahonana nahazo ny Kaominina tsy hanamboarana ilay fatsakana ka voatery niantsoana vonjy tamin'ny Fifohazana? Sao dia ilay fitetezana tanàna nifanindran-dalana na nifanindry fotoana tamin'ny fanomezana ny rano ho an'Ambohimanga (samy amin'ny valo ora) no hirika iray hamantarantsika fa nisy karazana "diversion" natao mba ijerena ilay olona miakanjo fotsy mandeha manakaiky doany hiambenan'ny mpiandry doany ny tanànany fa tsy hanelingelina kosa ny fotoam-panolorana ny rano? Tsy mandehandeha foana ny karazam-pandaminana toa izany fa nisy tolo-tsaina tao ambadika tao.
Koa noho ny fahavitan'ny fanolorana rano ho an'ny Kaominina no tena nanaovana ny Fiderana fa tsy ilay fitetezana tanàna loatra izay tsy nasiana hira an-dalana na resadresaka fa samy nangina fotsiny. Natao izao ho fahatsiarovana ny fotoana nanaovana tabataba be tato amin'ny aterineto malagasy.
Raha tsy ampy telo metatra niala ny vatan-drindrin'ny fiangonana FJKM nisy ahy ny nandalovan'ny mpanao famadihana nitety tanàna niaraka tamin'ny mozika mafy be dia holazainareo ho adala aho raha mitabataba hoe tena fanaovana tsinontsinona ny hasin'ny fiangonana mihitsy izao 1/2
— Jentilisa (@jentilisa) January 4, 2023
Maro izahay no teo fa nijery fotsiny no nataonay, tsy nihantsy ady izahay ka hoe tsy azonareo andalovana ny lalana mankaty am-piangonana. Mandalo ry zareo fa tsy hoe hiditra sy hanao fomba ao am-piangonana. Fa ilay resaka nitarina lavabe teto kosa an! eisy aho e! (2/2)
— Jentilisa (@jentilisa) January 4, 2023
Aucun commentaire:
Enregistrer un commentaire