Dieny mialoha aho no manoratra fa rehefa manao ny tsy mety ny olona iray, nefa vahiny lazaina ho mizaka ny zom-pirenena malagasy izy dia vahiny ihany eo anatrehan'ny fiaraha-monina ary vahiny mitady hanjakazaka amin'ny malagasy amin-kafetsena.
Tena lasa anjakazakam-bahiny mihitsy ve i Madagasikara amin'izao fotoana izao? Vao tsy ela isika no nitantaràna ny tany iray ao Bemahatazana Sabotsy Namehana, nisy nangalatra ny kadasitry ny tany dia migadra ny mpangalatra nivarotra ilay tany fa ilay mpividy kosa tsy voakitikitika mihitsy satria "vahiny" Karana mpanambola malaza ary "taratasy ara-dalàna" no nividianany azy. Dia io "vahiny" io indray no nivarotra tamin'ny "vahiny" hafa, tsy mitovy fiaviana aminy fa samy Aziatika, Shinoa ilay vahiny iray faharoa ary lazaina ho mizaka zom-pirenena malagasy.
Izay mahatsikaritra ny vaovao fanadihadiana dia mahita fa mikirakira finday ilay shinoa iresahana amin'ny mpisolovavany, izany hoe tsy mbola mahafehy ny teny malagasy na teny frantsay izany izy fa mety ho ny "google translate" no miasa be. Trano maro no narodana satria izay no tian'ilay tompontany vaovao atao, hanaovany fanorenana angamba. Izay moa no fandehan'ny raharaham-pitsarana dia izay no izy amintsika amin'izao fotoana izao na dia tsy rariny aza izany toe-javatra izany.
Tsy mandingana herinandro akory dia mivoaka indray ity toe-javatra any amin'ny toerana ambanivohitra antsoina hoe Soahonenana ao amin'ny Kaominina Merimandroso (tokony Imerimandroso no izy fa dia izay moa no mihatra izao!). Notapahan'ny vazaha frantsay lazaina fa mizaka ny zom-pirenena malagasy ny lalam-bahoaka miditra ny tanàna azon'ny fiara andehanana satria ao anatin'ny taniny hoe io lalana io. Mila hohamarinina tsara fa tsy dia azoko loatra fa toa ilay tanàna mihitsy (noho ny tsy fahaizan'ny olona mampita ny vaovao?) no lazainy fa azy ka nametrahana io karazana vavahadim-pandoavam-bola na "portique de péage" io rehefa dinihina amin'ny sary.
Amin'ity raharaha ity, tena mihetsika am-pilaminana ny olona, efa nanatontosa fitoriana teny amin'ny fitsarana ihany koa fa resy. Izay no fetran'ny tsy fampiasana herisetra azo ampiharina, fa azo atao ihany koa ny fihetsika tsy misy herisetra hafa toy ny mibahana ny lalana mankao aminy ihany koa na anoloana na ambadika satria ilay nataon'ilay vazaha ihany no ampiharina aminy, fa hahasahy ve ny olona? Eo amin'ny faritra ny tany tsy azy no hanaovana izany satria efa tsy lalam-bahoaka intsony izany io fa tadiaviny ho azy irery.
Ny fihetsiky ny Malagasy maharikoriko
Amin'ireo raharaha roa ireo dia misy fihetsika na fisaina tena maharikoriko ahy ataon'ny mpiray tanindrazana. Voalohany amin'izany dia ny fanesoana hoe nihetsika izahay teo hoe tsy mila vazaha nakorainareo ka iareto ao ny anareo. Na manao ihany koa hoe efa vazaha no nofidinareo ka anareo ihany io. Toa mampihevitra avy hatrany fa nifidy ireo olona ireo ary nifidy ny mpitondra ankehitriny. Na hoe izahay tsy hitolona ho anareo fa ianareo tsy nanampy anay tamin'ny tolona nataonay. Tena very tanteraka ny fihavanana malagasy sy ny fifampitsinjovan'ny mpiray tanindrazana. Adinon'ireo mpiteny sy mpihevitra izany ve ilay fitenenana hoe "mitohy ny tolona"? Moa tsy ny tahaka izao no anaovana tolona ho tombontsoan'ny besinimaro?
Ny fisaina na fihetsika faharoa tena maharikoriko dia ny fitanilàna avy hatrany any amin'ilay vahiny satria tsy hanaotao foana mihitsy ireo vahiny ireo fa misaina fa ny malagasy no dondrona sy vendrana. Mety ho marina ny vahiny eo amin'ny porofo ara-taratasy fa natao mandeha ila ny fampiharan-dalàna, teto izao tsy noraharahina mihitsy ny "servitude de passage" fa mandehana any an-tanimbary raha handeha. Toa heverina avy hatrany fa tsy afa-mampiasa bisikileta sy sarety ary fiara sy môtô ny malagasy fa tadiaviny ho izy ihany no mampiasa ilay lalana (izay no nahatonga ny hevitro etsy ambony). Sa ve hoe ambanivohitra izany toerana izany ka tsy idiranay lalina fa efa azy ny tany? Aleo hatreo ny soratra aloha!
Aucun commentaire:
Enregistrer un commentaire