Ny tsikaritra niainana!

 Raha Antananarivo sy ny manodidina samy nahita ny fiakaran'ny rano. Tamin'iny ihany koa no nahitana ireo hadalan'olombelona rehetra napongatry ny rano. Nihomehezan'ny olona ireo nanorina trano teny amin'ny tanimbary, na ireo olona nanototra tany ny tanimbary dia nananganana fonenana na fiangonana (Ambohimandroso/salanitra). Tamin'iny faritra Ambohitrinimanga iny no nisy nanangana trano tamin'ny faritra tondraka rehefa miakatra ny rano. Mazava loatra fa tsy mponina teny hatry ny ela matoa tsy mahalala izany ka mila mandinika hoe mbola hipetraka eny ve? Raha any Antananarivo anefa toa tsy misy mieritreritra ny toa izany fa dia izay hanorenana trano ihany no mahamaika.

Ny fisesin'ny orana/erika no nahitana fa tafakatra hatramin'ny 3 metatra ambony ny fisongan'ny rano rehefa avy orana. Mety ho mahazatra izany any amorontsiraka atsinanana ohatra (efa nahatsikaritra haavon-drano aho raha nandeha fiara tamin'ny RN2) ary mila misaina izany ihany koa izay olona mihevitra ny hanorintrano ambanivohitra aty afovoan-tany fandrao mora tondraky ny rano ny toerana. Ny tondraka anie tsy maninona loatra raha mampiasa trano misy vararay ny rehetra, araka ny vahaolana efa nalefako tato amin'ny bilaogy ihany. Mbola mametraka an'iny aho fa miandry tsikera avy amin'ny mpahay azy kokoa. Tanatin'ireny orana ireny no mampitobina tsara ny anaran-toerana hoe Anosy (Avaratra) sy/na Anosiarivo hita aty amin'ny manodidina.

Rehefa tondraka ny rano dia nalahelo avokoa ny mpiompy trondro satria vaky ny dobo. Maro ny manararaotra manjono, manihika ary manarato, nefa na dia amin'ireo manao izany aza dia mbola misy ihany koa ny mifangalatra; mangalatra ny haraton'ny hafa satria tsy mijanona miandry ny tompon'ny harato fa lasa mody dia saika haka izay azo rehefa tonga ny maraina. Nisinisy noho izany ny nivarotra trondro araka ny habeny. Tsy dia ahitako rano be manao ahoana aty aminay fa rehefa nisy iny fiakaran'ny rano iny dia mipoitra amin'izay fa hay maromaro ihany ireo mpanjono/mpiompy trondro aty na dia tsy malaza aza izany. Na izaho ihany koa no mety ho tsy dia liana amin'ilay taranja.

Talohan'ny orana izahay tena nijaly rano, vovo no fatsakanay ka lalindalina mihitsy vao midona amin'ny rano ny siny plastika (seau) ary misintona fotaka aza rehefa tsy voadio tamin'ny fotoanan'ny maintany ny vovo. Fa amin'izao fotoana izao kosa tsy mbola nahita rano akaiky toy izany tanaty vovo aho tao anatin'ny efa-taona mahery niainana taty ambanivohitra. Zara raha midina ny tady dia efa heno ny fitobaky ny rano donin'ny siny plastika. Midika izany fa betsaka ny rano.

Eny Andranofotsy kosa (tanimbaribe manelanelana an'Isahafa amin'i Lazaina) efa nidina ihany ny rano, mahazo rano tsara izay somary avo kokoa fa mbola difotra ihany ireo amin'ny ivaiva kokoa. Tsy mavo tahaka ny teo aloha intsony ny rano fa amin'ilay endriny madio. Na izany aza, tsy haiko na mbola ho avotra amin'izany ny vary na tsia... mbola tsy mamoa manko fa mbola vao noketsaina noho ny fahataran'ny orana.

Resaka hafa indray, vantany vao hitan'ny sekoly katolika fa nidina ny rano ary maina ny andro dia nampidiriny nianatra avy hatrany avokoa ny mpianatra. Ry zareo irery no nisokatra raha mbola maka sy manatitra lesona sy devoara kosa ny an'ny sekoly tsy miankina hafa, sady didiana fa tsy maintsy olon-dehibe no maka sy manatitra izany. Ny sekolim-panjakana moa dia manaraka tsara ny daty hoe 31 janoary 2022 indray izany no miditra mianatra ny mpianatra.