Voamena

Telo taona izay ny 26 janoary 2009 [sary]

2012-01-26T20:08:00.000+03:00

Te-handray anjara kely indray amin'ny tsiahin'ny tantara ny tena noho ity andro iray mipetraka ho tantaran'i Madagasikara ity. Misy ny haino aman-jery no milaza azy ho androm-pisaonana. Izany tokoa ve? Teto no nanomboka ny sahotaka teto Antananarivo ary tsy mety mitsahatra ny krizy hatramin'izao fotoana izao.

Mba hamoaka sary vitsivitsy indray ny tena hanaovana jery todika ny zava-nitranga.

Ny maraina, efa nafana noho ny fitsenana an-dRavalomanana omalin'io ny toe-draharaha teto Antananarivo.

Indreo ny maro amin'ny Tanora Gasy Vonona, miomana sahady amin'ny alalan'ny fanentanana. (tsindrio ny sary rehetra izay tiana hohalehibiazina ny mahita azy)

Indro ny Ben'ny tanàna efa tsara aro, fa misongadina eto ny fahamaroan'ny tovolahy sy ny lehilahy. Efa vonona hisedra izay hitranga rehetra ve ry zareo? Raha ny sary dia tena tolon'ny tanora tokoa izy ity. Sa ahoana?

Efa nirohotra tokoa ireto vahoaka ireto, mety ho tezitra tamin'ilay "fifidianana ankolaka" nitranga tamin'ny fitsenana an-dRavalomanana.

Kabary fohy no notontosaina dia lasa izao, hanafaka ireo tanora telo nosamborina any amin'ny fitsarana no antony nialana. Ny siosio anefa dia efa nanambara fa efa nampodiana ireo tovolahy ireo. Dia inona moa izany no tena andehanana any Anosy? Ankoatra ny Fitsarana dia inona koa no misy any?

Tao anatin'ny heriny indrindra ny Tanora Gasy Vonona teto raha ny hamaroan'olona nidina an-dalambe no jerena. Teto izy araka ny fijeriko no nisandratra indrindra. Ny Iraka nolazaina tamin'ny mpitolona dia hanafaka mpitolona tazonin'ny Fitsarana.

Fa manontany tena ihany aho hoe taiza ho aiza ny fiara rehetra no voasakana tsy handeha intsony, tsy hita intsony na tapikany iray aza.

Feno ny toerana, indrindra fa ireo natokana ho an'ny mpandeha an-tongotra. Moa va tsy andian-jatovo no tena hitanao? Hatreto mbola any amin'ny TGV ny fon'ny tanora. Tsy mandainga ihany koa ny vato mihoatra nyt 60% azony teto Antananarivo.

Hatreto, nitodika tany amin'ny Fitsarana ny mason'ny mpanara-dia. Avoahy tao izao namanay tazonina ao izao.

Ary tsy nitondra basy ry zalahy hatreto hay an! kibay ihany. Mety ho izay angaha no tsy naharesy tosika ny olona? Izaho kosa mihevitra fa efa nifanarahana hatry ny ela ny zavatra atao.

Hay moa efa raikitra ny fanafihana ny radiom-pirenena sy ny televiziona nasionaly.

Kisendrasendra fotsiny ve? Toa misatroka avokoa ny ankamaroan-dry zalahy tena nandravarava ny fananam-panjakana? ary heverina fa anaty vondron'olona manana ny toerany anaty fiaraha-monina, sa izaho no diso fijery?

Tsy mitovy fitafy loatra amin'iretsy nanafika ny radiom-pirenena iretsy kosa ireo nitazana, be no misatroka fa mafana kosa ny andro, sa ahoana? Firy ny isan'ny vehivavy hitanao amin'ity sary ambony eto ity?

Tsy efa nisy nanomana kosa ve izao toe-javatra izao? Ka ireto no mpanatanteraka ny iraka?

Nihatakataka teny ampita ireo sady tsy nanara-dia an-dRajoelina "any amin'ny digue" no tsy te-handray anjara amin'ny fanimbana ny fananam-bahoaka.

Izay vao nivoaka ny faritry ny TVM sy RNM ireo miaramila nihitsoka tao. Fa taiza ireo teo? Namela fotsiny ny hafa hanimba sa nandray anjara tany amin'ny tsy hita maso tany? Ary an'iza aloha ity kamiao miloko fotsy ity fa tsy an'ny tafika ny fijery izao an!

Miaro ny ainy dia manao ny marika V sa efa fandresen-dahatra ao anaty ao? Samy faly na ny mpitolona na ny zandary sa ahoana? Nanomboka teo ny fandrobana sy ny fanimbana zavatra maro nanerana ny tanàna, indrindra fa izay mety ho fananan-dRavalomanana.

Fandalovana teny 67ha tamin'ny fotoana nahamay indrindra ny MBS Anosipatrana. Tsy hita tsara ilay fiara fa ireo zatovolahy somary ambonimbony hitanao dia ambony fiara ireo. Saiky vory teo avokoa ny avy eny Ankasina, na ny avy eny ambany tanàna, hotarihana ho eny Ankorondrano. Fiara iray no nitarika ireo olona ireo. Tsy tazantsika ny fiara ka aleo koa tsy lazaina hoe an'iza ilay izy na mitondra an'iza...

Rehefa noheverina ho voatafika avokoa izay nokendrena rehetra dia nitodi-doha nankeny amin'ny kianjan'ny 13 mey indray ny Ben'ny Tanàna. Vao niepoka tao anaty fiara indrindra izy fa nosintonin'i Dolin Rasolosoa hipetraka. Matanjaka tsara kosa ny fiarovana, tsy tahaka izay hita teny Ivato izay mora gorobahina. Heverina, sady mifanaraka amin'ny efa nokabariany rahateo izany, fa ireo vondron'asa misahana ny fiambenana efa nalaza tamin'izany fotoana izany no nokaramaina sy nampiandraiketana ny fiarovana tamin'ity andro iray ity.

Ireto ireo nanara-dia azy hatramin'ny farany tamin'ity andro ity. Ireto ireo tsy ho resinao lahatra intsony fa na inona na inona hitranga, maminy hatrany i TGV.

Tazana eto ny lohany sy ny faran'ny laharana, ireto no tsy reraka na niainga an-tenantenan-dalana.

Noana izahay, hoy ny antsoantson'ireto mpanara-dia mahafatra-po ireto. Mandehana maka atsy amin'ny Magro Behoririka atsy hoy ireo mpikarakara ny hetsika. Nisy indray no nihazakazaka nankao Behoririka, hibata izay zakany sy azony entina mody.

Nandeha ny fanetanana nataon'ireto anaty fiara ireto ny handehanana ao amin'ny kianjan'ny 13 mey indray fa hanao fanambarana ny Ben'ny tanàna. Nolazain'izy ireto ihany koa fa maty (teo am-panafihana ny MBS) tao Anosipatrana ny maritiora TGV voalohany ka mba handrasana ny razana.

Ny sary maraina teny Ivato 21 janoary 2012

2012-01-22T00:27:00.002+03:00

Fanazavana,
Raha te-hahita ny andinindininy momba ny nitranga androany ianao dia karohy amin'ny alalan'ny tenifototra #21112 any amin'ny media sosialy dia hiavaka ny vaovao an-tserasera momba ity fitsenana androany ity.

Eo anoloan'ny La Hutte Canadienne Mamory Ivato no miverina ny ankamaroan'ny fiara fitaterana izay eny Andranomena indray no maka olona hafa hankaty Ivato. (Tsindrio ny sary rehetra raha tianao ny hijery azy lehibe kokoa).

Efa maromaro ny fiara mivezivezy "eto am-pahatongavana", misy ny mpitolona mahasahy mikiririoka anaty fiara fitaterana, tsy nahitana mpitandro ny filaminana mpandamim-pifamoivoizana loatra teny an-dalana.

Maro ihany koa no nanomboka dia an-tongotra hatreto raha nanam-bintana nahazo fiara hankanesana taty.

Mizotra mandeha mafy ihany koa ny fiaran'ireo mpitandro ny filaminana, finday no nakana sary ka lasa ny fiara fitaterana indray no tena hita.

Araka ny tena idirana ny tanànan'i Mamory no mahamaro ihany koa ny olona. Sary maraina efa hitataovovonana izao an!

Efa miara-mizotra ihany fa tsy mbola tena tafatambatra ireo mpandeha an-tongotra maro. Mbola efajato ny sarandalana niainga hatreny Andranomena nandehanako hatreto.

Solontena mbola vitsivitsy tazana avy any amin'ny faritra. Tsy menatra ny alaina sary.

Toy izao ny arabe ety raha mbola malalaka ny lalana.

Be mpivezivezy izy izany an!

Fa mampaninona moa izany ilay saina Amerikana e? Mba manana koa ry zareo ireto an!

Teto vao hitako hoe fa maninona ary izany sary alaiko izany no ratsy? Hay moa mbola mila fanitsiana kely ilay finday.

Efa mihateritery ny fifamoivoizana na dia midadasika aza ny arabe.

Ny fiara mitondra an-dRalitera...

Ny teto akaikin'ny sonomobile no nientana indrindra ny olona. Ny Faritra Betsiboka no betsaka teto raha ny sora-baventy no jerena.

Mety ho efa eo akaikikaiky ihany koa ireo mpiandry kendritohina.

Ireto izany no azo lazaina fa lohalaharana amin'ireo mpitsena teny Ivato satria manakaiky kokoa ny vavahady. Ny atsasa-dalana no navela hifamezivezen'ny fiara.

Ireo no mpitandro ny filaminana teto am-bavahady. Efa nisy entona nandatsa-dranomaso teto ny maraina nanalana ny olona efa tafiditra tao talohan-dry zareo. Ny ankolafy Ravalomanana irery izany no tsy mahazo manitsaka ny parking rehefa hitsena olona.

Toy ny dian'ny miverina indray aho manomboka eto. Hatreo amin'ny vavahady, tamin'ny mitataovovonana.

Sono-mobile, ireo mpitotorebika maka ambiansy angaha no marina kokoa.

Mihamaro tokoa ny olona raha nampitahaina tamin'izaho nandroso. Fenofeno kokoa ny lalana.

Fotoana fohy dia fohy nialoha ny fahatongavan'ny delegasiona mafonja teny an-toerana.

Efa avy nandalo ireo delegasiona dia somary naka toerana ambony indray aho hakana sary kely ny toerana.

Tsiahy sy tsiahy ve? natao halaina sary tokoa ilay sora-baventy.

Fa matetika ny mpaka sary tsy dia hita amin'ny sary alainy loatra ka dia mba nanararaotra kely teto. Manana tanan-telo ve ilay rangahy io?

Farany ilay hafatra nampivadika ny tantara ny 21 janoary 2012.

ony indray a

Nahoana no misaritaka?

2012-01-05T22:50:00.002+03:00

Miarahaba ny mpamaky etoana indray nahatratra ny taona vaovao 2012. Tsy maintsy atao mandrakariva ny mirary soa rehefa voalohan'ny taona tahaka izao ka enga anie ho salama tsara ianareo rehetra ary hahazo izay iriana ka mahasoa ny tsirairay. Izay no vita fa hanoratra zavatra kely, tsy zavatra ankapobe fa manokana momba ny tolon'ny mpanohitra ny fanonganam-panjakana niseho tamin'ny 2009.

Somary gaga ihany ny tena raha nahare hoe nisy fifamaliana tao amin'ny kianjan'ny finoana tao fa nisy ny vondron'olona mitarika ny mpitolona hanao "action" na hivoaka ny kianja ka hidina an-dalambe. Nisy kosa ireo nisiotsioka azy ireo ho mariky ny tsy fankasitrahana izany fitarihana izany. Tsorina fa fifanoheran-kevitra anatiny izany tranga izany ka mila fandrindrana fa tsy tokony hisy kosa ny fifanenjehana na ny avy amin'ny andaniny na ny avy amin'ny ankilany samy ao anatiny ao. Ny tenako raha mpanatrika fivoriana tamin'ny voalohany dia tsy nanao izany loatra intsony taty aoriana. Tsy hoe niova hevitra fa ny fivelomana tsy maintsy tandrovina ihany...

Na izany aza dia manan-kosoratana ny amin'izany ny tena na tsy mpanatrika na ny eny Behoririka na ny eny Ampandrana Bel'air aza. Tsy hoe izay mpankeny amin'ireo toerana ireo ihany tsy akory no resy lahatra fa ireo no manam-potoana amin'ny tranga sy ny toerana misy ny tolona fa ny hafa kosa amin'izay fotoana mampalalaka na fotoana heveriny ho tena zava-dehibe ihany no tonga raha antsoina. Tsy atao mahagaga loatra raha ny olona retirety no maro an'isa manatrika eny satria malalaka tsara ny fotoan'izy ireo. Ny hafa kosa miasa.

Amiko, efa tsy mety intsony ny endriky ny tolona amin'izao fotoana izao na ny fomba fanaovana azy. Teny Ambohijatovo, faritra azo lazaina fa afovoan-tanàna satria akaiky toeram-piasana maro dia nety indrindra raha atoandro ny fanaovana ny fivoriana ka noravana mialoha ny fidiran'ny mpiasa sy ny mpianatra ny zavatra rehetra. Izay ihany no fotoana tena mety amin'ny rehetra raha te-hanao tolona andavanandro fa tsy toy ny amin'izao fotoana izao izay amin'ny telo mety mbola tsy hanomboka hatrany.

Raha tsy diso ny fitadidiako dia efa nanoso-kevitra momba izany ny tena saingy toa tsy nisy mpihaino, na niniana tsy nohenoina satria nanelingelina teti-panorona hafa. Tiako ho fantatra indrindra hoe iza tamin'ny mpitarika no nikiry hampihemotra io ora fanombohan'ny tolona andavanandro sy ny firavany io? Amiko manokana manko dia karazany nanimba ny lalan'ny tolona ny fiandrasana ny mpitarika tahaka ny tsy ho avy raha tsy tamin'ny roa na amin'ny roa sy sasany vao hikabary amin'ny olona.

Misy zavatra iray hitako banga tanteraka mahatonga ny tolona ho "malemy" tahaka izao. Nisy tsindry niala tamin'ny olona noterena [= ny eo amin'ny fahefana] rehefa nahemotra ny fotoana fanombohan'ny fivorian'ny daholobe. Tamin'ny fivoriana atoandro dia tsy toerana itodiana ny kianja fivoriana fa toerana andalovana sy ihaonana ka mety hisy ny zavatra hafa azo atao rehefa avy eo iarahan'ny besinimaro manatanteraka, eo no tokony hampafana vay ny tolona fa tsy eny amin'ny kabary loatra. Izay no tena nampiroborobo vetivety an'Ambohijatovo.

Nihavitsy amin'izay ny olona rehefa fantany fa toa hihaino kabary sisa no ataony, ary hita fa nihanihemotra hatrany ny fanombohan'ny fotoana. Lasa fitodiana ilay kianja ihaonana satria efa fantatra sahady fa tsy hisy intsony atao rehefa vita ny kabary fa na mody na ilaozana miady hevitra amin'olon-kafa. Efa mba nanoso-kevitra (an-tserasera) ihany ny tena hoe aza atao lava re io fotoana na kabary io fa mahamonamonaina, saingy araka ny nitenenako (na nanoratako) no vao maika nahalava sy nahabetsaka ny olona niady hikabary.

Faramparany, aleo manoso-kevitra indray hoe ataovy indray na indroa isan-kerinandro re io fivoriana io raha be mba hazotozoto kokoa ny olona handeha fa tsy hoe handeha tsy fidiny sao manjary simba ny tolona. Tsy adalan'ny sasany tsy akory raha nanomboka ny tolony isaky ny Asabotsy izy vao nivadika isan'andro. Ankehitriny aiza ho aiza ny tolona? tsy atao mahagaga raha misy kosa ny tsy mahandry intsony fa ny fandaminana azy io hanana hery, ny fitadiavana ny tetikady rehetra hampazoto ny olona izao no tadiavina fa tsy fampanatenana poakaty sady lazaina fa hoe "baiko avy amin-dRavalomanana" na ny toy izany no entina handemena ny sain'ny olona.

Trafon-kena ome-mahery io ka ambava homana am-po mieritra. Aza ny tenako no ariana fa ny teniko hoy ny fiteny Malagasy izay, ary aoka tsy hifanavakavaka sy hifampiampanga fa ny fiaraha-mientana sy ny fahombiazana no tadiavintsika izao.

Hainon'ny Bilaogera # écoute du président

2011-12-16T11:37:00.000+03:00

Hitantsika any ambadimbadika any fa nanatontosa izany hoe "écoute du président" izany ny PHAT. Anarana amin'ny teny frantsay... izay tsinona no tsaratsara kokoa sy manintona kokoa vokatry ny fitaizana na fampianarana ho amin'ny teny frantsay, hany ka io teny frantsay io no mora ampiasaina kokoa. Ny tena kosa, noho ny fandalàna ny teny malagasy, na dia tsy manintona loatra aza ny teny malagasy ankehitriny, dia mba mandika azy ho amin'ny hoe "Hainon'ny mpamaham-bolongana" na "Hainon'ny Bilaogera".

Raha nanao io fizarana vola izay miendrika propagandy mialoha ny fotoana io ny PHAT dia tahaka ireny hoe mihaino ny vahoaka sahirana na ny vahoaka madinika ery. Dia tahaka ny hoe mitsinjo azy ireo tokoa ary manome vahaolana ho amin'izany. Betsaka ery ny faly amin'ilay fihetsika ary mirehareha hoe izany no tena filoha mihaino ny feom-bahoaka sy mahalala fa sahirana ny vahoaka. Mihaino tokoa angamba izy fa ilay vahaolana kosa tsy ekeko velively. Ny zavatra hitako dia fampiankina-doha ny olona hanatena vola sy fanampiana lava no atao ary mametraka ihany koa hoe tsy ny olona rehetra no omena na dia efa mihoatra ny 3/4 n'ny mponina eto Madagasikara aza no miaina anatin'ny fahantrana fa izay tsongaina ihany.

Nosoratako teo ampihainoana vaovao

Haino Aman-Jery iray nilaza ny vaovao antoandro no nandrenesako fa natao tao anaty valopy ny vola fanampiana avy eo ary tsy misy maribola mipetraka fa izay ao anatiny ao fotsiny. Mazava loatra fa toy ny hoe tsy misy mangarahara ny vola zaraina. Eo dia efa manahirana satria ny totalin'ny vola zaraina no nolazaina, tsy misy ny kaonty mazava na rosia nandraisana ny vola sy ny sandany, araka ny eritreritro fa tsy nanatrika tao ny tena. Rehefa tsy mangarahara anefa ny fitantanana dia resaka fanodinam-bola avy hatrany ny ao an-tsaina na dia tsy voatery hisy aza izany; tsy maintsy mipetraka ny ahiahy e!

Nolazaina moa fa misy avy lavitra mihitsy ireo olona ireo no nandeha tao amin'ilay toerana. Nandeha inona izany ireo olona ireo nankao? sa notaterina manokana? Efa voakaonty anaty fandaniana ve izany? Raha io isa io sy io maribola io no kajikajiana dia mahazo 225.000 Ariary eo amin'ny ankapobeny izany izay mangataka. Lasa ny saina: hahatsangana varotra va re izany? sa ho lasa hanaovana fety amin'ity faran'ny taona ity fotsiny ihany? Tsy hametraka tsikera be loatra momba ny toerana nanaovana ny fanampiana izay miankina amin'ny fiangonana aho satria tsy te-hametraka adihevitra hiteraka fisaraham-bazana ara-pivavahana loatra na dia heveriko fa tena tsy mety mihitsy aza ny safidin'ilay toerana.

Dia mety ho avy ny filazana hoe izy ary manampy fa taiza ny nataon'ny taloha? dia tsotra: ny an'ny taloha ny zaza rehetra tany amin'ny sekoly fanabeazana fototra no nahazo na any amin'ny sekoly tsy miankina na miankina amin'ny fanjakana. Ny sekoly sasany no mety ho niavona tsy te-handray fa tsy nanavahana ny nanomezana azy dia ireny antsoina hoe "kits sclolaires" ireny ka tafiditra amin'izay ny aron'akanjo miloko maitso antitra ireny. Ny tsy anavahana saranga tahaka izany no tadiaviko satria olona an'hetsiny no nahazo fa tsy 300 na 3000, ary manerana an'i Madagasikara fa tsy Antananarivo sy ny manodidina irery.

Ka inona ary no mba hainon'ny bilaogera? Ny feon'ny fieritreretany no henoiny ka zarainy aminareo...

Vita Afomanga -Miverina delestazy

2011-12-15T21:19:00.001+03:00

Manana hafetsifetsena tanteraka ny mpitantana ao amin'ny JIRAMA ao ka! andro vitsy mialoha ilay afomanga teo iny dia mody tsy nasiana delestazy mihitsy ny teto an-tanàna, mety ho maro manko ny ompa hoe ny jiro tsy arehitr'ialahy koa izahay no mody tambatambazana amin'io afomanga io. Noheverina ho nahita ny vahaolana tampoka ry zareo (ary sao dia misy ilay vahaolana fa mba lalaovina isika e? nahoana no vita ihany ny tsy nampanao delestazy?) Kanjo ankehitriny miverina miaina soa aman-tsara amin'izany delestazy izany indray. Manahy aho fa misy fika masiso izao...

Ny sary dia nalaina tetsy 67ha ambadiky ny FJKM Salema Vaovao nanaovana ilay fivoriana fahatezerana manoloana ny ataon'ny JIRAMA

Repoblika faha-tetezamita

2011-12-12T16:06:00.000+03:00

Raikitra indray ny resaka hoe tokony sa tsy tokony ankalazaina ny faha-herintaona nahaterahan'izany repoblika fahaefatra izany. Dia lasa adihevitra tsy izy ny fanontaniana hoe ka Repoblika fahaefatra ary isika izao sa mbola tetezamita? Ny fantatro hatreto dia mbola anaty tetezamita tanteraka isika nefa ny mpitondra tetezamita manao fety repoblika fahaefatra. Tetezamita saingy tsy manana fandaharam-potoana matotra amin'ny fikarakarana ny fifidianana isan'ambaratonga. Ka rehefa tsy manana fandaharam-potoana matotra amin'izany nefa mifety zavatra tsy mbola tonga dia hafahafa ihany.

Dia hoy aho hoe ianao mpitondra tetezamita izay natao ho toy ny vonjimaika ihany ve no hankalaza tsingerintaona tsy izay hampaharitra anao ela indrindra eo amin'ny fifidianana no katsahinao? Tokony ho menatra aza ianao fa tsy mety mampita ary karazany mikendry ny tsy hampita na oviana na oviana ny fahefana. Angamba aza efa fantany fa tsy ho lany izy dia miezaka hatrany ny manalava fotoana.

Fa tsetsatsetsa tsy aritra efa ela no saiky soratana fa eto vao tadidy. Isqika angamba efa nandre ihany ny hoe isaky ny folo taona izao, hono, dia misy krizy hatrany eto Madagasikara ka dia tadiavina ny ialana izay krizy miverimberina isaky ny folo taona izay. Dia hoy aho hoe dia hitany tokoa ny vahaolana fa reehfa tsy tiana hierina isaky ny folo taona ny krizy dia aleo maharitra folo taona e! sa ahoana? hahaha

Ny mitam-piadiana ihany no mahazo valiny mahafa-po

2011-12-10T15:52:00.001+03:00

Asa tokoa na hanao ahoana na hanao ahoana ny tohin'ny tantara eto Madagasikara. Toa tsy mba mety malaza ny zavatra tsara na misy fikarakarana ho amin'izany rahampitso. Ny voamarika, mety ho namoaka ny vaovao tany amin'ny valan-tserasera ananako rehetra aho ( réseaux sociaux) faramparany teo saingy izay nosotarako tao anatin'ny herinandro dia nahatratra ny antsasaky ny mpamaky taoriana kelin'ny fandrobana lehibe tamin'ny 26 janoary 2009. Efa ambavahoana ve sa efa tafalatsaka tanteraka ny toe-draharaha teto Madagasikara raha nihoatra lavidavitra ihany noho ny mahazatra ny mpamaky amin'ny bolongana anankiroa?

Raha nanoratra ny momba ny rotaka teny Behoririka nandrobana ny Shinoa aho dia nilaza mazava fa tsy hisy tohin'ny fihetsiketsehana izany... dia hitantsika fa dia any amin'ny Fitsarana ihany no mitohy ny raharaha, toa tsy efa noadinoin'ny olona tanteraka ny momba azy iny. Raha nanoratra indray ny raharaha halatra diadema (satroboninahitra) teny Andafiavaratra aho dia mbola toy ny teo aloha ihany ny eritreritro, tsy hisy setriny avy amin'ny vahoaka hilaza ny fahatezerany izany eo.

Miezaka ny maneho ny hatezerany ny fikambanan'izatsy na ny fikambana'izaroa fa tsy mahataitra ny sarambambem-bahoaka akory. Valalabemandry, rahoviana vao ho valalabemifoha? saingy rehefa valalabemifoha toa fahapotehan-javatra ihany no vita...Nofaranana tamin'ny sarinady teny amin'ny seranam-piaramanidina Ivato ny raharaha dia vita. Na izany na tsy izany, tsy ho olona kely na olon-tsotra no hanao ireny zavatra ireny fa olona manana ny lanjany sy ny hajany eo amin'ny fiaraha-monina... saingy ho aiza kosa ary ny sain'izay manampahefana miandraikitra izany?

Fa tonga eo amin'ny raharaha Polisy sy Fitsarana tany Toliary amin'izay aho fa ity vao raharaha angamba, hoy ny maro! Fifampitifirana eo amin'ny polisy sy ny mpiandry ny fonja! Miverina tany amin'ny fiandohan'ny krizy ity zavatra ity. Ny Asabotsy 21 marsa 2009, vantany vao vita ny fianianan'ny PHAT teny Ivato dia nisy ny andia-miaramila nanafika ny fonjaben'i Tsiafahy nanaisotra ireo lazaina ho gadra politika, misy tokoa ny gadra politika fa mifangaro amin'ny mpanao politika migadra noho ny fandikan-dalàna mihatra eto Madagasikara. Fanjakan'ny manam-basy izao ka izay manana izany no manana ny fahefana. Ho tonga aiza? tsy lasa lavitra, hoy aho. Mahita ny vahaolana haingana ny mpanao politika : afahana ilay takiana hivoaka ny fonja noho ny fanariana na fivarotana basy nataony... Afahana tsy misy didim-pitsarana (araka ny reko ho navoakan'ny minisiteran'ny Fitsarana) dia vita ny resaka. Hay ve azo atao ihany izany? Nefa efa nisy fatiolona an! Ary mpitsara ilay izy... nodarohin'ny araka ny tatitra.

Zavatra tsikaritra, rehefa ny manana fitaovam-piadiana sy ny mahazo alalana hitazona fitaovam-piadiana no mitaky dia ekena avy hatrany izany, eny fa na dia mifanohitra amin'ny lalàna sy ny didim-pitsarana aza. Tonga any amin'ny vahaolana politika avy hatrany ny raharahan'ny mpitondra fitaovam-piadiana. Izay zavatra tsy eken'ny mpitondra fiadiana dia tsy ekena tsy satry. Izay izany no mahatonga ny filazan'ny lehiben'ny antoko mpitam-piadiana telo eto Madagasikara manao fanambarana manohitra ny fahatongavan'ny filoha voafidim-bahoaka farany hatrany raha vao manambana ny ho tonga ilay olona: Mba ho ekena ny fitakian-dry zareo dia mitsivalana "tsy satry" ny mpitondra fahefana sivily.

Dia ahoana ny fitakian'ny Mpitsara? Sarotra ny hilaza hoe ho tontosa ny fitakiany fa ny roa andro itokonan-dry zareo fotsiny no avela ho tanterahiny dia miverina miasa indray ry zareo manomboka alarobia. Ny "fitakiana politika" mitaky ny fanesorana an'izatsy na izaroa dia azo eritreretina 99% fa holavina avy hatrany. Sarotsarotra ihany ny handresen'ny 1% izany hoe ny hamaliana ny hetahetany na dia tany an-toerana tany Toliary aza ny Minisitra takiana hiala. Ny SMM anie niseho nandrahona fa rehefa manapaka ny hafa dia manaiky foana aloha hatreto e! Dia inona ny vokany? Lonilony amin'izay iharany fotsiny fa tsy ho afaka mankaiza... Ny fety aloha karakaraina.

Reraka avy nanao sarinady?

2011-12-08T10:49:00.001+03:00

Fa misy ny Haino Aman-Jery (HAJ) mety hanorisory ny mpitondra sasany na sivily na miaramila, na dia eo ampanaovana ny asany ara-dalàna aza ireny HAJ tsy miankina ireny. Ny andron'ny fihetsiketsehana teny Ivato iny ihany. Tsy lavitra loatra izany toerana antsoina hoe Ambohimamory izany, nisy fanafihan-jiolahy fa tsy nety tonga teny mihitsy ny mpitandro ny filaminana, araka ilay vaovao izay azonao jerena eto. Nivilana ny fefy na vavahady vy... ireny mihitsy no nahatonga ny anarana hoe famakiana trano satria misy zavatra potehina na vakiana, fa tsy laharam-pahamehana ireny satria tsy mampidi-doza ny "filaminana" amin'izao fotoana izao. Koa iza no mbola tsy mety resy lahatra fa sarinady iny teny Ivato iny hatramin'izao?

Olom-boatendry Mifampifidy?

2011-12-07T22:52:00.001+03:00

Dia variana amin'ny fihetsiketsehana tokoa ny olona fa dia fifidianana sarintsariny no natao dia tahaka ireny hoe nisy fifidianana tena izy ireny tokoa tao amin'ny kongresin'ny tetezamita tao. Olomboatendry ranoiray no any amin'ireny lazaina ho kongresy sy Filankevitra rehetra ireny ka tsy dia misy dikany loatra sady tsy maneho ny endrika demokratika velively ny fifidianana birao sy filoha any amin'ireny andrim-panjakana ireny. Mbola endrika fitaka iray hafa ihany koa no nolalaovina teo anatrehan'ny vahoaka.

Ka iza sy iza avy no tiana hofitahana amin'ny resaka fifidianana tahaka ireny? Inona ny fifanarahana vita tany ambadika tany tamin'ireo antokon'olona nifidy an'i Mamy Rakotoarivelo? Sa karazandrazan'ny tohin'ny soridalana vita tany an-drenivohitry ny tany Afrikana taloha ireny ihany dia mba omena fahafaham-po kely tao anaty faharesena ny ankolafy Ravalomanana? Ny Malagasy sy ny Fiarahamonina Iraisampirenena izany no tadiavina fitahina ilazana fa efa tena mandeha tokoa ny marimaritra iraisana sy ny fiaraha-mitantana? Tsy nisy fifidianana avy amin'ny vahoaka ny nahatongavan'ireo olona ireo tao ka tsy misy dikany koa noho izany ny sarintsarim-pifidianana atao ao anatiny. Sa ireo olona rehetra anaty andrim-panjakana ireo izany no atao hoe fahefana? Nefa tsy avy amin'ny vahoaka ianareo na inona na inona filazanareo an!

Voromby Ivato fanodinan-dresaka

2011-12-07T22:27:00.001+03:00

Nalaza indray izao voromby nambara ho tsy ara-dalàna izao. Fitaka sy fampisehoan-kery taoriana fikarohana satroboninahitra heverina ho nandamoka ihany anefa iny hazolava (antso vonjy) sandoka iny. Nokendrena mihitsy mba ho voromby avy any Afrika Atsimo no nolazaina ho manao zavatra tsy ara-dalàna teto Madagasikara sy mandika ny lalàna iraisam-pirenena momba ny fifamoivoizana.

Fantatry ny mpitandro ny filaminana fa tsy ho hita intsony ilay satroboninahitra very dia mitady zavatra hafa hanodinana ny sain'ny olona ry zareo. Dia iny hitan'ny besinimaro ho nanao fihetsiketsehana iny ary nidehaka aza ilay tompon'andraikitra fa tafapetraka atsasakadiny mialoha ny nipetrahan'ny voromby teo amin'ny seranana ny mpitandro ny filaminana rehetra nanemitra ny seranam-piaramanidina. Izany hoe tsy azoko loatra fa noterana tsy hahazo hipetraka an-tany izany io voromby io mandra-pahatongan-dry zareo.

Manjary lasa manoratra ny tena hoe raha tena mahavita ataovy izay ahitana haingana ny satroboninahitra (raha tsy efa nanaovana ceremonie na rituel any ivelany any amin'izao fotoana izao angamba) satria efa nilaza ihany ianao fa tsy maintsy ho hita iny ary hanatona any amin'izay mitazona azy ianao. Izay Afrikana Tatsimo rehetra izany izao dia mety heverina fa mpikarama an'ady daholo. Mbola ilay nitaizana ny miaramila hatramin'ny andron'ny revolisiona fankahalana ny Afrikana Tatsimo mpanavakava-bolonkoditra ihany ve no iainana hatramin'izao fitondran'ny ANC an'io firenena io hatramin'izao sa tsy maty lolo ilay resy tamin'ny 1942 tamin'ny fanafihana niainga avy ao?

Sahiran-tsaina ihany angamba ry zareo hoe hanao fetibe sy handefa afomanga amin'ity fahaverezan'ny satroboninahitra ity ve ka dia notadiavina ny fanodinana ny saim-bahoaka tahaka itony. Fa sao dia tratran'ity fitapitaka ity ihany koa aloha ianao mpamaky io e?

Satroboninahitra Ranavalona Reniny Nangalarina

2011-12-04T22:36:00.001+03:00

Toy ny fahatezerako tamin'ny 6 novambra 1995 indray ny fahatezerako amin'izao fotoana izao. Tamin'izany fotoana izany Rova iray manontolo no nopotehina. Ankehitriny kosa izay sisa tavela indray no nangalarina. Ny nahavariana dia izay nisy sanda indrindra ary iny ihany no nangalarina. Tsy te-hiampanga na iza na iza aho sady manentana ny rehetra tsy hanameloka be fahatany ihany koa. Fa raha misy ny milaza fa fanakorontanana ataon'ny mpanohitra io dia afaka milaza ihany koa ny mpanohitra fa fitadiavam-bola tafahoatra ataon'ny mpitondra io na mba hevitra hafa ihany koa. Afaka manao lahatsoratra manokana ho amin'izany ihany koa aho.

Ny satroboninahitra kely nalaina tao amin'ny tahirin-kevitr'i Grandidier tsy fantatsika izay manjo azy amin'izao fotoana izao.

Fa lasa ny saina. Nahoana moa no tsy azo alaina sary ireny vakoka ireny e? Amin'izay very ny fitadidiana ny endriny? Amin'izay rehefa ovaina ilay vakoka dia tsy misy mahafantatra intsony ankoatra ny tena mpahalala? Neniko ny hendry tafahoatra ka rehefa hoe tsy azo alaina sary dia tsy nahasahy naka sary tokoa. Izao mba iza avy no manana ny sary?

Misy koa ny satroboninahi-dRanavalona fahatelo miteronterona eo amin'ny Mozean'ny Tafika ao Paris nalain'i PHGCOM sary tsy avoakako eto fa tsindrio ny rohy azafady!

Noho ny hatezerana dia hamoaka ny sary nangonin'ny hafa. Ifonako dia ifonako ilay nanoro lalana ahy hahita ireo sary ireo fa tsy tantiko ny tsy hamoaka ireo sary ireo. Aleo mba ho hitan'ny rehetra!!!

Ny diadema

Ity ilay satroka heveriko no nisy nangalatra

Marihina fa tsy misy ahy ireo sary ireo!!!

Tsy hitako izay itsenana azy

2011-11-23T09:59:00.001+03:00

Miala tsiny raha elaela tsy nanoratra teto. Efa nisy ny fikasana hanoratra fa ny fitadiavana mahazaka maniraka, hoy ny fiteny izay. Tsy afaka ivalamparana loatra ny zavatra tsy idiram-bola tahaka itony, na dia tena iondanana tokoa aza. Tery ihany hanoratra fandrao miandry ny hevitra na fomba fijery andrasan'ny mpamaky.

Raha ny resaka rotaka tetsy Behoririka aloha dia efa nanoratra ny momba azy io ihany aho any ambadika any. Ny nahatery hanoratra dia ny filazan'ny mpitarika iray etsy amin'ny Magro fa Hitsena an-dRatsiraka ary hitaona ny mpiara-mitolona aminy hitsena ity olona ity iray ihany koa. Izaho dia tsy mankasitraka velively izay fanentanana izay. Manabe isa ny olona tonga eny izay tsy tohanana akory izany no sady fanakiviana mihitsy, fijeriko izay, ireo mpitolona ireo. Tsy ho amin'iny olona iny no nitolomana ary ny manaraka tantara dia mahafantatra fa anisan'ny atidohan'ny nanonganana ny filoha voafidy farany teto Antananarivo izy.

Ny fiantraikan'ny fanentanana tahaka ireny dia ny manao izay hahavitsy hatrany ny olona sisa manatrika eny amin'ny Magro. Tsy manakana ny fahatongavan'ilay olona sy izay vahaolana entiny aho, saingy ilay hitsena azy kosa dia tsy ao aho izay. Raha ho an'ny mpanohana an-dRatsiraka kosa dia normal izany hoy ny fitenenana.

Ny Anay dia Tsotra Ihany

2011-11-16T15:29:00.001+03:00

Indraindray dia tsy te-hamelona radio maraina izany fa voasintona hihaino ny lazaina fa adihevitra hatrany. Rehefa adihevitra anefa no tenenina tahaka ny haka lagy vao maraina manao izay tsy hampazoto miasa fotsiny. Raha vao tsy mahara-baovao dia tahaka ireny inona ireny tokoa, saingy raha vao mahita ny lohatenin-gazety fotsiny dia mihomehy irery amin'ilay adihevitra heno vao teo fa dia tena resaka diso adiresy sy fanenjehana ranoiray.

Eo am-piandrasana ny famoahana ny mpikambana governemanta avokoa ny rehetra amin'izao fotoana izao. Rahampitso no fe-potoana amoahana izany lisitra izany araka ny tondrozotra. Eo no ifantohan'ny resaka amin'izay lazaina fa adihevitry ny samy mpihaino. Avy hatrany dia ny fanamelohana ny ankolafy izatsy na izaroa ho mihoatra ny lazain'ny tondrozotra sy lazaina ho "mpanakorontana" ahatsiarovana ny fahavalon'ny revolisiona sosialista tamin'ny fotoan'andro ho "mpanohariana" no misesika sy ifandimbiasana iantsoana.

Raha jerena ny antontan'isan'ny mpiantso sy ny firehana ananany androany dia olona roa monja no nanana ny firehan'ny mpanohitra fa ny ankoatra izay ireo manameloka ny ankolafy Zafy sy Ravalomanana ho mpitady seza sy tsy mahalala afa-tsy ny tombontsoan'ny tenany avokoa. Izany hoe raha araka ny mpiantso no heverina dia tokony hahazo ny 95% any ho any ny mpanohana ny tetezamita ankehitriny raha raikitra ny fifidianana. Asa aloha raha izay tokoa ny ho fandehany rehefa avy izay fifidianana izay. Enga anie hisy izany...

Ny tsy zakan'ny mpiantso izay "mitovy hevitra avokoa" dia ny tsy fanekena ny fanasahana ny isan'ny minisitra eo amin'ny mpanohitra sy ny mpanohana ny fitondrana, ary indrindra indrindra, tsy tokony hahazo minisiteran'ny fiandrianam-pirenena mihitsy ny avy amin'ny fanoherana. Tahaka izay sitrapon'ny mpanohitra foana ve no tanterahina? Efa be izay fandeferana nataon'ny PHAT izay ka mapy izay (efa matetika loatra koa nandrenesako izay feo izay). Eo indray ny tsy fanekena tsotra izao ireo mpikambana natolotry ny avy amin'ny fanoherana fa tahaka ny hoe fiantsiana raha ireo olona ireo no tendrena ho minisitra. Angamba ny tadiaviny dia olona mpanohana ny FAT tahaka ny nanoloran'i Zafy Albert an'i Beriziky izay olon'ny Leader-Fanilo koa no tadiaviny ataon'ny mpanohitra.

Fa ny somary mampihomehy amin'ireo mpihaino ireo, izay mpiantso isan'andro ny ankamaroany, dia manana fomba fiteny mitovy avokoa izy ireo eo ampanombohan'ny resaka. Io nataoko lohateny io izy: Aorian'ny arahaba dia mandeha amin'izay ny fanombohan-dresaka hoe ny ahy dia tsotra ihany, ny anay dia tsotra ihany. Na olona rendremana aza lasa mahatsikaritra izay fanombohan-dresaka izay. Misy moa no fantatra fa mamaky teny ny zavatra lazainy. Dia eo ny mahalasa ny eritreritra fa dia saiky fehezanteny iray na roa ihany no miova isan'olona. Tsianjery anie izany. Vao nijery ny lohatenin-gazety hoe misy tsy eken'ny PHAT ny lisitra nalefan'ny PM dia hoy aho anankampo hoe fa iza tokoa no manakana ny fananganana ny governemanta araka ny tokony ho izy?

Loza manambana?

2011-11-15T14:56:00.001+03:00

Nahita ny zava-nitranga tamin'ny faran'ny herinandro dia variana ihany. Hetsika sosialy tsy hay tohaina ve? Ny andaniny miasa handaminana ny tanàna mba tsy ho korontana (fa tsy gidragidra) no ahitana an'Antananarivo sady mampihatra lalàna, ny ankilany kosa miavo-tena hamelomana ny tenany sy ny vady aman-janany eny amin'ny toerana tsy manara-dalàna.

Resaka fivarotana amoron-dalana sy tafiditra anaty lalana eto Antananarivo ihany izany tononina eto izany. Ny alahady lasa teo teny Mahamasina dia nisy ny fifandonana teo amin'ny polisy kominaly sy ny mpivarotra amoron-dalana noho ny resaka fandraofan'entana. Io fandraofan'entana io no tena fototr'ilay gidragidra satria heverin'ny mpivarotra tsy manara-dalàna ho fangalarana ny entany izy io. Ny maraina anefa hakan-dry zalahy vola 500Ar ireo mpivarotra ireo ho toy ny fiantohana fa tsy esorina amin'ny toerany amin'io andro io. Nisy ny naratra ary nisy ny fisamborana tamin'io fotoana io.

Nitohy ny alatsinainy izany gidragidra izany, araka ny nambaran'ny gazety, ka teny Analakely indray no kianja nifandonana. Hitako tsipalotra fa teny ambony kamiao daholo ry zalahy mpandroaka entana fa tsy hitako nandeha an-tongotra nandroaka entana ny folakandro nandalovako teny. Tsy nahalala aho fa efa nisy zavatra nitranga teny Analakely (Ambodifilao, Soarano, Behoririka) tamin'io fotoana io fa ny mpivarotra kosa teny amin'ny toerany ihany. Antokon'olona tsy manara-dalàna no mivondrona ka sarotra ny raharaha rehefa tsy miditra fanapahan-kevitra hentitra mety mahatonga firohotana tsy ampoizina ihany koa anefa.

Izay no loza manambana: mivondrona ny olona efa nampianarina hivondrona efa ho telo taona izao ary miaraka amin'ny herisetra. Ny mampiavaka azy ny vondron'olona "sahirana" saingy ao anatin'ny tsy manara-penitra amin'ny zavatra ataony no mivondrona fa tsy sarangan'olona antonony izay tsy hita intsony. Mbola misy fanantenana kokoa ireo noho ny saranga antonony tsy mahay mivondrona

Mitambatra ny lisitra Zafy sy Ravalomanana?

2011-11-11T08:09:00.001+03:00

Araka ny hita an-gazety androany dia nanome lisitra iraisana hatolotra minisitra indray ny Ankolafy roa tonta Zafy sy Ravalomanana. Misy ny milaza fa nahazo antoka tsara ny lehiben'ankolafy Ravalomanana vao nanaiky nanome lisitra.

Ny eritreritro dia hoe tsy tamin'ny nanolorana praiminisitra tokoa ve no tsara nanaovana izany raha hanambatra lisitra ihany fa nahoana no aty amin'ny fanolorana olona maro indray vao hanambatra lisitra? Inona moa ny olona raha tsongaina hofidiana avokoa ny avy amin'ny lisitra Zafy dia ajanona ny lisitra Ravalomanana?

Voasoratra fa omena seza Praiminisitra lefitra iray ny ankolafy Ravalomanana. Koa raha izay ihany no azony dia manakory? Mety misy fifanarahana tokoa any ambadika any fa tsy maintsy lasa ihany ny saina. Mbola miahiahy loatra manko ny ankamaroan'ny olona no misy izao fampitambarana lisitra izao. Enga anie tsy ho fahadisoana miampy fahadisoana intsony izao fihetsika izao. Atoa Mamy Rakotoarivelo moa no nanasonia avy amin'ny ankolafy Ravalomanana ary Zafy Albert kosa ny avy amin'ny ankolafy Zafy.

Voakarama sa diso mafana fo?

2011-11-10T16:12:00.002+03:00

Raikitra hatrany ny adihevitra raha vao misy ny fotoana azo anaovana izany eny amin'ny fampielezam-peo. Mahavariana fa mitady ho hay tsianjery isaky ny olona miantso ny zavatra hambarany. Izany hoe efa fanta-peo avokoa ny ankamaroan'ireo miteny sy zavatra lazainy. Lasa mankaleo indraindray ny mihaino azy fa tsy mitoetra intsony ny tena adihevitra raha izay no heverina ho kinendry amin'ireny fandaharana ireny.

Azo ambara fa tsy fifandresen-dahatra intsony no mipetraka fa samy mamoaka ny heviny sisa. Ny mampalahelo amin'ny fandaharana dia izao. Rehefa misy ny zavatra tsy zaka amin'ireo mifanohi-kevitra amin'ny sasany dia mandrahona amin'izao hoe fantany tsara iny olona iny fa mpanao izatsy na mpanao izaroa, ohatra: mpividy fanamiana miaramila, mpampirevy miaramila hahazoana vaovao... Mivadika fandrahonana ankolaka ny raharaha fa dia mahagaga tsy manitsy ny karazan'olona tahaka ireny ny mpanentana amin'ny fandaharana.

Ny mampiavaka ny fandaharana ihany koa tao ho ao dia saiky vehivavy ny ankamaroan'ireo miditra, izany hoe lasa vehivavy indray ve izany no tena mpiady hevitra politika? tsikaritra amin'ireo tena mpiverimberina misolelaka amin'ny fitondrana ankehitriny ireny anefa dia ny fananjehana hatrany ny ankolafy iray... izay rehetra miteny dia ambara ho mpanakorontana na mitady fanakorontanana. Raha ny resaka famoahana gadra politika ny resaka dia lasa fandre ny hoe "tsy omby avoaka am-bala" izany fa misy lalàna. Tsy mety tsaroan'ireny olona ireny ve fa efa nisy ny toe-javatra tahaka izany indrindra tamin'ny 21 marsa 2009 raha "navoaka am-bala" tsotra izao ny "gadra politika" tao Tsiafahy ka nafindra tetsy amin'ny Resto Gasy? Rehefa raharaham-pitsarana anefa dia tsy mandeha maningana sahala amin'izany ny raharaha fa lasa fanombohan'ny fomba fanao izy ireny. Sady mazava tokoa anie fa fampitoniana ny olona tokoa na fampitoniana ny raharaha politika mafanafana tokoa ny famoahana ny gadra politika indrindra fa ireo nosamborina nandritra ny fotoam-pihetsiketsehana politika.

Toetr'andro hafahafa

2011-11-10T15:37:00.000+03:00

sary: phytospiritualité

Somary nahagaga ahy ny toetr'andro tao ho ao. Maraina mangatsiaka dia mangatsiaka mahatonga anao hamoaka akanjobà mihitsy. Rehefa mitataovovonana anefa dia indro fa mahamay mampanala akanjo, eo angamba vao mitank'orana. Manomboka folakandro dia indro fa mandrahona indray ary midina ny hafanana ary matetika dia miafara amin'ny orana tsy dia betsaka loatra izany. Tsy tsaroako niainako izany toe-javatra izany fa maraina mafana dia mafana no miditra takariva manorana. Lasa fahavara-dasa tsy tsaroana indray angamba rehefa samy nahatsapa ny olona teto Antananarivo fa tsy nangatsiaka mihitsy ny ririnina tamin'ity taona ity. Sa tsy nahatsikaritra izany ianao?

Mpanakorontana ny Magro

2011-11-08T09:05:00.003+03:00

Efa re siosio talohaloha tany ny famoahana didy fa hakatona na tsy azo ivoriana intsony ny etsy amin'ny Magro Behoririka. Velona indray ny filazana fa miteraka korontana amin'ny fiainam-bahoaka eto Antananarivo, eto Madagasikara, ny fivoriana etsy amin'ny Magro. Lazaina ihany koa fa miady ho amin'ny "fantome" fotsiny ireo mivory etsy amin'ny Magro. Asa! valifaty amin'ny filazana ny fitondrana FAT ve dia hoe "fantome"?

Nivoaka an-gazety fa nampanantsoina teny amin'ny prefe ihany koa ny mpitarika ny Magro amin'io fivoriana mbola mitohy etsy amin'ny toerana iray zary malaza io. Namaly ny mpitarika iray avy ao fa tsy mahalala ny fisian'izany fampiantsoana izany velively, ary tahaka izany ihany koa ny namana mpiara-mitarika aminy avy ao. Resaka fampiomanana ny handravana azy daholo ve izany rehetra izany?

Raha izany fanakatonana izany tokoa no tadiavina atao dia na inona na inona fanazavana atao dia fanakanana ny fitakiana am-pilaminana tsy ho azo tontosaina intsony izany ka sanatria sanatria manery ny mpikatroka avy ao hiditra amin'ny fitakiana an-kerisetra izay tsy vahaolana velively ho an'i Madagasikara, tsy manamora amin'ny fivoahana ny krizy velively. Tsy maintsy hijerijery eo na dia ny olona tsy mpankeny aza fa raha tonga tokoa izany fanakanana izany dia vanja milevina ho an'ny mpitantana ankehitriny izany.

Tsara ihany koa ny manamarika fa efa niova mihitsy ny mpitarika eo amin'io toerana iray eo amin'ny Magro io. Vitsy dia vitsy sisa ireo mpitarika voalohany no mbola tavela ao. Saiky efa lasana avokoa ireo mpanao politika mba napetraka ho lohany hatreny Ambohijatovo. Heveriko fa ireo mpanentana ankehitriny ao ireo no nipoitra avy eny amin'ny "olo-tsotra" manan-kevitra. Karazana olom-baovao indray ireo satria tsy olom-baventy tamin'ny politika na dia mety ho mpikatroka politika teo aloha ihany. Fandraisana andraikitra izany ary manamarika fa mihavao ny ankolafy iray heverina ho "lany andro" araka ny fomba fitenin'ny sasany.

Famotehana sy Fanakanana izay Hanorina

2011-11-07T10:10:00.000+03:00

Ezahina hatrany ny mampita izay azo ampitaina hapetraka ho tantara avy amin'ny fomba fihevitry ny tsirairay nandritra izao vanim-potoana izao. Misy izy ireny raha henoina mampihomehy, saingy mampatahotra indrindra rehefa fantatra fa olona lazaina ho mpamakafaka amina haino aman-jery no milaza azy amin'ny mpihaino. Tsy tsapany angamba fa miteniteny foana izy... raha ny fomba fijeriko azy aloha!

Ny andron'ny fiandrasana ny fanendrena praiminisitra. Nitaintaina avokoa ny rehetra, ary nilaza ranamana fa hafahafa ihany raha ora vitsivitsy mialoha ny fanendrena no mbola tsy azo verika mihitsy izay hotendrena. Eo amin'ny sehatry ny fanaovan-gazety izay misy azy dia marina izay filaza izay. Fa ny nanahirana ny nihaino azy dia ity. Tsy eken'ny sainy mihitsy raha olona avy ao amin'ny ankolafy Ravalomanana no voatendry. Manjary hiverina indray ny Silo ao Toamasina, hoy izy, manjary hiodina indray ny tiko sy ny magro. Tena nihomehy valaka aho nandre ilay izy nefa niakatra tsimoramora ihany koa ny fahatezerana.

Fa tsy mahazo mampiasa vola eto Madagasikara mihitsy ve izany ny Malagasy no izany no fomba fiteny? Amin'izao fotoana izao: ampihimamban'ny karana ny zavatra ilaina andavanandro eto Madagasikara. Aiza ho aiza ny vidin-javatra amin'izao fotoana izao? Manao ahoana ihany koa ny kalitaon'ireo entana afarana rehetra ireo? Moa va mba misy mahatoraka izay nopotehina sy norobaina? Tsy mahagaga isika Malagasy raha tsy mety tafarina fa izay miezaka sy manatsara ka mahomby amin'izany aza moa potehina ary sakanana.

Efa ampy izay nanapotehana sy nandrobana ny fananana Malagasy izay. Efa noezahina ihany ny nanadino azy. Fa ilay fisainana hanakana izay fampiasam-bola Malagasy izay, satria mahita ny lalam-bola karana no tena tsy lefitro. Natao hiankina amin'izay avoakan'ny karana ve ny mpamongady malagasy? Tsy sanatria tsy fitiavana karana no mahatonga ahy hanoratra fa ilay fomba fisaina hoe malagasy tsy mahazo mampiasa vola eto Madagasikara no tena nahaletra. Tsy mahagaga raha tsy mety mahaleo tena ara-toekarena isika fa tsy mety manana fisainana handraharaha eo amin'ny sehatra iraisam-pirenena, ankoatra ny fanondranana andramena.

Efa tsy nilaza ilay hoe fa dia nahoana moa no nasaina nanatitra dosie ny ankolafy Ravalomanana nefa, raha ny fomba fihevitr'ity lazaina ho mpamakafaka sady mpanao gazety ity, tsy horaisina ny avy any aminy, izay endrika fanavakavahana sy tsy fahavononana hahazaka ny hafa, intsony moa aho amin'izany. Tena mbola lavitra izany lalana izany.

Ravalomanana indray

2011-11-07T08:55:00.002+03:00

Hiezaka ny tena hanoratra vaovao isan'andro eto. Heverina ho mihoatra ny iray aza izany araka ny vaovao sy adihevitra azo. Misy radio fiantsoan'ny mpihaino isan'andro, isa-maraina, mba henoiko indray hahalalako izay hevitry ny hafa na voakarama izany na tsia, na mafana fo izany na tsia.

sary: Stahlkocher

Fantatsika fa nilaza hivoaka ny sori-dalana (tondro zotra) ny ankolafy Ravalomanana noho ny tsy fankasitrahany ilay fomba fanendreny ny praiminisitra Omer Beriziky amin'izao fotoana izao. Raha nandeha ny fanontanian'ny mpanao gazety hoe tsy karazany manao veto ve izy fa fisintahana no ataony fa tsy manakana ny fanatanterahana izay efa voasonia izy. Mikoropaka noho izay fanapahan-kevitra izay avokoa ny hafa rehetra ary raikitra indray ny fanenjehana ilay olona ho tia tena sy ny karazany.

Rehefa mandeha anefa izay fanenjehana sy ny karazany izay dia milaza fa henjana ny politika fanorona mipetraka. Mametraka ny fisintahana hoe tahaka ny ahoana ary ny herin'io ankolafy nisintaka io. Voalaza manko fa mitady hihaona amin'ilay mpitarika ny ankolafy any Afrika Atsimo any mihitsy ilay praiminisitra voatendry. Fa iza, hono, ingahy Ravalomanana no ny praiminisitra indray no mihazakazaka mandeha any! Voalaza ho namoaka taratasy ihany koa Atoa Manoro Regis fa raha vao tsy miditra ao amin'io governemanta io ny ankolafy Ravalomanana dia lasa governemanta mandeha ila hatrany ny toe-draharaha ka ahiana tsy hahazo fankatoavana hatrany na dia eken'ny SADC.

Noho ny tsy fitokisana ny mety hataon'ilay praiminisitra voatendry no nitakiana ny hanatanterahana ny andininy faha-20. Maromaro no miantso hoe avelao ho any rehefa tsy hiditra fa ny mpanentana no mamerina hoe efa izay no natao hatrizay fa mbola nikatso teto hatrany ny toe-draharaha. Dia mihodikodina eo ny adihevitra aloha. Na mandeha aza ny fanenjehana sy malaza indray Ravalomanana.

Angovo , solika toa samy olana eto Madagasikara

2011-11-04T17:53:00.001+03:00

Hoy ny fitenenana malagasy izay hoe : "Akaiky vilany feno arina". Raha ny olona avy eny ambanivohitra sy ny zatra ny fiainana ambanivohitra, na ireo mbola niaina tamin'ny fakana na fividianana kitay dia mahalala tsara izany fomba fiteny izany. Ny zatra fatana solika na gaza na elektrika (solika, etona, herinaratra) kosa mety tsy hahatsikaritra loatra ity arina lazaina. Arina ilay maintimainty amin'ny vodin'ny vilany sy ny sisim-bilany iny. Mety tsy ho hita tsara ilay izy rehefa amin'ny fatana solika, ohatra, fa tratran'ny maintimainty ihany ny tanana rehefa kasihana ireo faritra nolazaiko ireo.

Tsy dia ny hanazava ny teny malagasy loatra no anoratana etoana, fa mba te-hilaza hoe rehefa misy ny olana dia ny akaiky ihany no hita voalohany na ny iharany ihany no tena mahatsapa. Tsy hahafantatra na inona na inona ny olona raha tsy ny mahita sy ny iharan-javatra no miteny. Matetika anefa ny Malagasy no tsy mba miteny loatra izay manjò azy rehefa mahita fa samy iharany daholo ny manodidina. Na samy mimenomenona daholo ny olona fa tsy lasa lavitra fa menomenona am-pitoerana no betsaka. Noho ny fisian'ny fitaovam-pifandraisana anefa dia re ihany ny olana isan-karazany mianjady amin'ny olona ankehitriny.

sary: Clicgauche (2007)

Ny delestazin'ny Jirama indray no malaza amin'izao fotoana izao. Tsy nanavahana fotoana hoe rehefa be mpampiasa jiro amin'ny hariva, tahaka ny mpitranga fahiny, no tena mampirongatra azy fa na dia ny maraina vao mifoha aza na rehefa miditra ny mpianatra sy ny mpiasa mbola io ihany izy. Misy aza ny faritra no maty jiro adiny 8 na 12 na mihoatra aza nefa eto an-drenivohitra eto Antananarivo izany. Tsara anefa ny manamarika fa raha ny vanim-potoana ankehitriny dia tahitahiana mandrakariva Antananarivo ka na dia zavatra tokony omena tanàna hafa aza dia ampandeferana handambolamboana ny mponina an-drenivohitra. Koa rehefa ny eto Antananarivo no tratra tahaka izao dia tsy voafehy intsony ny olana na dia avy matetika aza ny orana isan-kariva.

Antananarivo fotoana vitsy ihany no mimenomenona fa ny any amin'ny faritra any betsaka no tsy mba velona jiro afa-tsy ora vitsivitsy monja. Mampisy elanelana eo amin'ny samy malagasy izay toe-javatra izay. Fa ny tiako soratana indray no adino na dia resaka angavo ihany koa aza.

tobin-dasantsy ivoariana iray

Raha eto Antananarivo no jerena dia voafehy tsara ny solika, manana amby ny eto Madagasikara. Rehefa mandeha mankany ivelan'Antananarivo anefa mety ho tsy tsikaritrao fa miezaka ny mameno araka izay tratra ireo mpamilin'ny fiara fitaterana andehananao. Fitsinjovana ny fiverenana iny fa tsy misy olona hiteny aminao hoe tsy ampy ny solika any amin'ny faritany any. Iray volana lasa aho izay nandeha tany Mahajanga tany. Rehefa tonga teo amin'ny "parkazy" dia gaga fa ny vidin'ny gazoala ihany no nipetraka eo amin'ilay tobin-dasantsy akaiky azy indrindra. Nihevitra aho fa gazoala ihany no amidiny.

Rehefa nisakafo ka nijery ny vaovao tao an-toerana vao gaga fa hay tsy nisy solika nanerana ny tanàna fa nilaharana izany. Andro fahatelo nilaharana solika ireo mpamily fiarakaretsaka (mpanjifa lasantsy) sy môtô. Dia tamin'io vaovao io ihany koa no nahalalana fa manana olana tahaka izany ihany koa ny any Antsiranana sy ny ankamaroan'ny faritra avaratr'i Madagasikara. Tsy fantatry ny any Antananarivo velively anefa izany tsy fisian'ny solika any amin'ny faritra izany. Vao haingana teo indray dia mbola niverina indray io tsy fisiana solika io (Antsiranana) fa tsy henonao raha tsy noho ny jiro tapaka sady tsy afa-nampiasa gropy. Fa mbola tsy re eto Antananarivo ihany izany. Nosy-Be izany moa dia efa fahazarana ny tapaka jiro ka tsy mitaraina intsony angamba ny olona na heno ihany ny fiantraikany rehefa mitroatra milaza ny fahatezerany ny olona.

Rehefa mitroatra tsy misy afa-manoatra

2011-11-02T13:01:00.000+03:00

Tsy haiko loatra fa lasa miresaka zava-misy maneratany aho nefa dia mbola amin'ny teny malagasy ihany no anoratana izany. Amin'izao fotoana izao mba maharaka zava-baovao iraisam-pirenena kely aho noho ny fanarahana tsy fidiny ny FRANCE 24 ka mahita kely ny fandaharana "Les observateurs" milaza ny zavatra malaza aty amin'ny aterineto (Vu sur le net).

Dia malaza indray ny rotaka any Shina noho ny fifandonana eo amin'ny vahoaka sy ny polisy. Inona ny nahatonga izany? Lehiben'ny polisy tao amin'ny tanàna iray afovoan'i Shina tao nandona ka nahafaty olona dimy (lozam-pifamoivoizana). Nahatezitra olona io tranga io ka dia velona ny rotaka. Velona ny fifandonana. Matoa nitroatra ny olona dia mety ho mizaka ny tsy rariny hatry ny ela na ny famoretana hatry ny ela ka rehefa maro no mivondrona dia ny polisy indray no sahirana.

Matetika tokoa ny mpitandro ny filaminana no mihoa-pahefana, fa tsy mbola nahitako na nandrenesako ny filazana izany moa ny aterineto. Lasa tombatombana fotsiny sisa hoe mety ho raharaha mikombona mangina io ka dia ny fihetsehan'ny olona ihany no ahafahana maneho fa manaraka akaiky ity raharaha ity ry zareo. Tsy hoe Lehibe-na polisy no tafiditra anaty raharaha dia ampanginina.

Ny mahavariana ahy manko dia izao : mihevitra aho fa ny polisy shinoa no henjana indrindra amin'ny fifehezana rotaka nefa mba tratran'ny be noho vitsy ihany. Tamin'ity indray mitoraka ity ihany koa dia ny avy ao amin'ny polisy mihitsy no niaingan'ny olana ka tonga dia ao anatin'ny mpifandona ny polisy. Ny ezaka ataony amin'izao fotoana izao dia ny tsy hiitaran'ny hetsika any amin'ny tanàna hafa. Itony no porofo fa na iza na iza tsy afa-manjakazaka, eny fa na dia ianao aza no mpitana ny fitaovam-piadiana.

Lasa ihany ny saina hoe fotoanan'ny gidragidra sy ny fidinana an-dalambe ve izao? Malazalaza ny any Etazonia fa tsy hay nafenina ihany koa ny any Shina izay firenena matanjaka amin'izao fotoana izao.

Bolongana Dinamika

2011-11-01T00:19:00.000+03:00

Niverina tato indray nanoratra fa misy zavatra mahaliana ny navoakan'ny blogspot na blogger ka mahatamana anay efa nisafidy ny hamoaka izay vetsovetsom-po amin'ny alalany. Araka ny nolazain'ny namana Valy atsy ambadika atsy dia tsy voatery amin'izay endrika atolotra anao voalohany, na hitanao voalohany ihany no azo ijerena azy ity fa misy fomba hafa azonao isafidianana sy manintona anao ihany koa.

Ireo endrika azo isafidianana (Jereo ambanin'ny anaran'ny bolongana indrindra):

Ny anarana hitanao eo ambanin'ny anarana voamena izao dia ny classic izay ahitana voalohany indrindra ny lahatsoratra na votoaty nivoaka farany. Ilaina ihany ny mijery any ambany fandrao efa misy lahatsoratra hafa nivoaka ihany koa.

Ny flipcard manaraka etoana indray dia misy karazany efatra ka ny roa ihany no aseho sary etoana. Io ambony io dia mifantina ny votoaty na ny lahatsoratra isaky ny daty nivoahany.

Ity manaraka ity kosa dia mamoaka ny votoaty na lohatenin-dahatsoratra na lohatenim-botoaty manasongadina kokoa izay nivoaka farany. Ny roa ambiny izay tsy naseho sary dia manavaka araka ny label sy ny mpanoratra, mbola iray ny mpanoratra eto ka tsy ilaina loatra ny mampiseho azy. Rehefa maromaro ny mpanoratra vao tena mahaliana ny aminy.

Ity manaraka ity kosa indray dia mamoaka ny votoaty na lahatsoratra ho toy ny amin'ny gazety. Raha maromaro ny lahatsoratra mivoaka ao anatin'ny iray andro no tena mahaliana indrindra ny aminy.

Ny mosaika (vakivakim-bato nomontsanin'i Mosesy) eto ambony kosa indray dia mety indrindra ho an'ny sary, ankoatra ny snapshot izay tsy navoakako eto ny dika petaka noho ny tsy mbola fisian'ny sary amin'ny bolongana.

Ary ny sary navoakako farany kosa indray dia manasongadina ihany koa ny fotoana. Izay nosoratako rehetra dia araka ny fijeriko fotsiny fa samy manana ny tiany ny tsirairay. Ny mampiavaka ity Bolongana Dinamika ity dia afaka mifidy soa aman-tsara ny endrika tiany ijerena ny bolongana ny mpamaky fa tsy voatery ho izay endrika tian'ny mpamaham-bolongana ihany no iaretana.

Ho an'ny mpamaham-bolongana namana kosa indray dia andramo ihany sao mba mahaliana anao ity zava-baovao ity.

Hanenenan'ireo!!!

2011-10-31T19:04:00.000+03:00

Efa ela no nangidihidy ny tanako hanoratra momba ny zava-nitranga tany Libya izay nanonganana ny mpitondra tany. Somary nanahirana ihany ny nandika ireo lahatsoratra niresaka momba azy ka nilazana hafaliana amin'ity fahafatesana. Tsy dia mahazatra ny Malagasy loatra izany, eny fa na dia ireo lazaina ho fahavalo aza no maty, fa toy ny manana toe-tsaina mpamosavy. Ny mpamosavy ihany manko no faly amina fahafatesan'olona.

Fanamarihana no ilazana fa fitondram-panjaka no naongan'ny filoha Muammar Al Gaddafi tamin'ny 1969. Teto indray dia mbola fanonganam-panjakana hatrany no misy na dia iniana afenina amin'ny anarana revolisiona aza, saingy revolisiona tokoa ve ny tolona niarahana tamin'ny daroka baomba tandrefana (Frantsay sy Amerikana)?.

Miresaka daroka baomba ihany isika. Efa nisy tranga fanonganam-panjakana tany Guatemala tamin'ny 1954 izay nampian'ny Amerikana tamin'ny fanafihana avy eny an-habakabaka ihany koa. Moa ve tsy ny fiverenan'ny toy izany io nandarohana ho potika tanteraka ny tanànan'i Sirta, Libya io? Nefa lazaina fa ho fiarovana ny sivily no handarohana baomba tranona sivily maro... andeha atao hoe angamba noho ny fisiana mpiady amin'ireny trano ireny saingy raha fanorenana goavana kosa no mirodana toy ny baoritra hafahafa ihany.

Olona iray no nenjehina sy novonoina dia tanàna iray manontolo no potika. Na dia eo ary tsy azo odiana tsy fantatra aza ny lesoka ananan'ity olona iray ity, mba manana toetra sy fisainana tsara kosa izy, indrindra fa amin'ny fampivelarana ny Afrikana, tahaka ny fanomezana zanabolana ho an'ny Afrikana manokana mba ho mora ny sadam-pifandraisana fa tsy hiaritra ny fitsentsefan'ny Tandrefana sy ny Aziatika fotsiny.

Nanafintohina ny Afrikana maro ny fomba namonoana ilay mpitondra Afrikana, ho toy ny biby na olona tsy misy hasiny na voalavo araka ny fifampitenenan'ny samy Libyana... Nefa nampahatsiahy ny fomba namonoana an'i Ernesto Che Guevara tany Bolivia izay baikon'ny mpiasan'ny CIA ny nitifirana azy teo an-tenda mba ilazana fa maty nandritra ny ady ilay raisin'ny revolisionera mitampiadiana rehetra ho maherifo.

Eritreritra ny ahy fa afaka fotoana vitsivitsy monja dia hahatsiaro izay nataon'i Muammar Al Gaddafi ny Libyana ary hanenina tamin'ny nanaovany azy ka ho menatra tamin'ny revolisiona nataony.

Resaka ifankahitana

2011-06-09T23:12:00.002+03:00

Source: www.mydago.com

Raha amin'ny teny anglisy dia tahaka izao votoatiny ary tahaka izao kosa ny valinteny avy amin'ny ankolafy Ravalomanana.

Tantara tsy fanadino

2011-05-27T00:07:00.002+03:00

Nisy ihany ny hafetsifetsena namoahana ny vaovao tamin'ity indray mitoraka ity. Avy amina horakoraka an-dalambe amin'ny alina ny fomba nilazana fa nekena ny tondrozotra ary nankatoavina ny mpitondra malagasy. Ho fitadidy:

Tapaka aterineto teto Madagasikara

2011-03-16T02:36:00.002+03:00

Niditra andro fahaefatra tamin'ny fahatapahan'ny aterineto ny mpanjifan'ny moov.mg teto Madagasikara ary nambara fa nisy fiantraikany tamin'ny mpanjifan'ny orinasan-tserasera hafa izany fahatapahan'ny aterineto izany. Andro faharoa tamin'ny andro niasana ary ity omena anareo ity raha andro fahaefatra nahatapahana kosa. Ny Asabotsy maraina teo manko no tsikaritro ho tapaka voalohany ny aterineto ka tsy nahazoako afa-tsy moov.mg tamin'io andro io.

Lahatsary Vaovao horohorontany japana!

2011-03-11T23:55:00.002+03:00

Ireto lahatsary manaraka ireo dia avy amina Mpamaham-bolongana iray antsoina hoe Toronto Star ary tsy nierako ny famoahana azy eto fa azy manontolo.

Rango-pohy teny Ivato, Inona no tena marina?

2011-03-10T02:34:00.004+03:00

Atolotra anao etoana ny angom-baovao an-tserasera hita ny andron'ny 9 marsa 2011, anjaranao ny manampy izay tsy tafiditro.

Fanaratsiana sy fanatsarana

2011-03-08T02:28:00.002+03:00

Samy mpamaky gazety avokoa angamba isika rehetra. Niniako notazonina ity tantara iray ity ho tahiry eo amin'ny tantaram-pirenena ihany koa na dia maharikoriko aza ny mieritreritra azy indraindray.

Antananarivo: Asabotsy 12 marsa, hihetsika tokoa ve?

2011-03-06T01:57:00.001+03:00

Resaka iraisampirenena hatrany, resaka an-tserasera anivon'izay tian'ny mpiserasera horesahina no nivoahan'izao resaka olona vitsy dia vitsy izao!

Ny nahafinaritra ny andron'ny 4 marsa 2011

2011-03-05T03:45:00.004+03:00

Miala tsiny indrindra raha somary karazana dokambarotra no soratana manaraka. Tsy izany fa mba tiantsika indraindray ny zavatra atao hoe maimaipoana. Tsy miresaka vidin-javatra "mora" aho eto fa ilay fanandramana ataona orinasa iray eto Madagasikara raha mba mahaliana ny olona ihany ny hanara-baovao eo noho eo amin'ny alalan'ny valan-tserasera. Lalana iray amin'izany ny ataon'ity orinasa iray ity na dia nisinisy ihany aza ny somary kivy tamin'ny tolotra vaovao nomeny.

Tsy ny fanaraham-baovao eo noho eo ihany no ilaina amin'izany fa ianao mba mampita vaovao ihany koa raha mahatsikaritra any amin'ny andalovanao any.

Fikasana hamono hoe?

2011-03-04T01:50:00.002+03:00

Araka ny fitadidiako dia fanindroany izay no nandrenesako fa nisy nikasa hamono ny FAT Andry Rajoelina. Ny itovizan'ny fikasana dia samy amin'ny andro maizina avokoa.

Zavatra hafa ambadiky ny mody atao hoe fanonganam-panjakana

2010-04-19T01:06:00.001+03:00

Volana nanamarika manokana ny atao hoe fanonganam-panjakana na tsy fanonganam-panjakana ity volana avrily 2010 ity. Ahafahana mitaratra ny any ambadiky ny sehatra tsy hitan'ny besinimaro ireny zavatra hita maso na atao ho talaky maso ireny. Fitadiavana ny antony ao ambadik'ireny karazam-pihetsiketsehana ireny noho izany no ataoko eto fa tsy hianina fotsiny amin'ny hoe sarimihetsika io na sarintsariny io. Tsy ho sodokan'ny aseho ivelany aho fa mampitodika ny rehetra kosa ny fiantraikan'ilay toe-javatra sy izay tohiiny nanaraka ilay toe-javatra aroso eo anoloana.

Mety ho tsy voamarikareo tsara angamba ilay nosoratako tamin'ny faran'ity herinandro ity ihany tao amin'ny lahatsoratra mitondra ny lohateny hoe "Mpitarika mpamadika" teny amin'ny faramparany manao hoe :"Na dia maro aza ny zavatra tiako hosoratana toy ilay "tsy fanonganam-panjakana" dia hatreo ihany aloha ny soratana", dia saiky hanoratra aho tamin'izany fotoana izany hoe misy hatrany ireo minia manely tsaho na mamorom-baovao tsy azo hamarinina afa-tsy ireo izay mety ho nandray anjara taminy heno eny anelakela-trano eny. Noheveriko ho tsy dia maika loatra ilay hevitra nitambolona tato anatiko tato ka nahatonga ahy nampandefitra ny lahatsoratra mikasika izany. Ity sarintsarina fanonganam-panjakana nitranga tamin'ny alahady 18 avrily ity indray no nahatery ahy hambosaka izany ho anareo mpamaky hajaina.

Ny mpanara-baovao rehetra dia mety hahatadidy fa ny andron'ny zoma 2 avrily no nisy fiambenana mafy dia mafy ny Lapan'Ambohitsorohitra. Nanao fampisehoan-kery tamin'ny alalan'ny fandrantirantiana fitaovam-piadiana mahery vaika ny mpiambina ny lapa miaraka amin'ny vondron'ny FIS (Force d'Intervention Spéciale) nandritra io alina io ary nanery izay nanana fiarakodia rehetra hanala ny fananany teny amin'ny faritra Antaninarenina. Ny maro dia nihevitra fa tsy nahomby ilay fanonganam-panjakana tamin'io andro io. Izaho kosa resy lahatra fa tena nahomby tokoa ilay fanonganam-panjakana. Tsy hita mivandravandra nandritra iny faran'ny herinandro iny ilay fanonganana fa ny tohiny nandritra ny herinandro fiasana no tsikaritra fa niova ny mpitondra tenin'ny prezidansa.

Hevitra am-pitaka no natao tamin'io alina io: naseho tamin'i DJ fa tsy mitantanana na inona na inona intsony izy fa misy mikatsaka ny ainy. Voatery niafina na tsy nisehoseho vahoaka ingahy DJ nandritra ny andro maromaro. Efa voalazako any amin'ny lahatsoratra hoe hilaza izay tsy voalaza any an-kafa moa ny amin'io tsy nahitana nandritra ny fotoana maharitra ny PHAT. Nanomboka tamin'io fotoana io dia ny praiministra no lasa nitondra teny tamina filankevitry ny Minisitra fa tsy ny Sekretera Jeneralin'ny Prezidansa. Misy zavatra hafahafa ao izany! azoko heverina avy hatrany fa efa ny praiminisitra no mitantana ny baolina fa saribakoly mody arantiranty fotsiny ny PHAT. Azoko heverina miaraka amin'izany ihany koa fa nahatsinjo io fiovam-pitantanana any ambadika io ny Minisitry ny Foloalindahy tamin'izany fotoana ka mety ho nanoman-javatra na samy nanana tetika izy roalahy ireo saingy ny an'ny Praiminisitra no tonga taloha.

Tonga ny fotoana dia namoaka ny didy fandraisan'ny praiminisitra ny fitantanana ny minisiteran'ny foloalindahy ny filankevitry ny Minisitra. Ny tenan'ilay handray fitantanana no nanambara izany tamin'ny mpanao gazety, izany hoe ampahibemaso... Somary mahavariana io fa heveriko ihany koa io hoe fanonganam-panjakana hafa satria manambara na manendry ny tenany izy. Ny filazan'ny mpanolo-tsainan'ny praiminisitra, izany hoe azo heverina ho tsaho koa ity filazana ity satria tsy nivoaka ampahibemaso, no nahenoana fa nofandrihana ho any Mantasoa ingahy praiministra ary efa voaomana ny "fampamindram-pitantanana" rehetra no nisy nanao tsilia-tsofina taminy tsy hankanesana any fa "vita" izy raha mankany. Nisy namadika izany tamin'ireo mpikarakara ary azo vinaniana ihany taty aoriana hoe iza ilay nampandamoka ny raharaha. Ny tohin'io resaka Mantasoa - izay mbola azo apetraka ho tsaho satria tian'ny mpanaraka ny praiminisitra hatao toho-tsofina amin'izay akamany - io, sy ilay hoe "fifanarahana Vohipiraisana" hita an-gazety, no nahatonga ny fanapahan-kevitra maika hanalana amin'ny toerany ny minisitry ny foloalindahy.

Tonga indray ny faran'ny herinandro faharoa amin'ny volana aprily, andro sabotsy, nasaina nody avokoa izay rehetra niala voly tany amin'ny efitrano fisakafoanana sy ny toerana fialam-boly amin'ny alina teny Antaninarenina, Ambohijatovo, Analakely, Ambodifilao, Soarano, Tsaralalana... Mafy indray ny fiambenana ny Lapan'Ambohitsorohitra. Fantatsika fa tsy nanaiky hiala vetivety teo amin'ny toerany ny minisitry ny foloalindahy. Nisaraka tanteraka ihany koa ny mpitarika mirahalahy tao amin'ny FIS ka norarana tsy hahazo mankeny an-dapa intsony ny Lt-Cl Charles. Noahiahiana hamono ny PHAT manko ranamana...di anoalzainy fa hotsapainy ny herintsain'ny mpiambina ny Lapam-panjakana. Vokany: raha saiky hitafa tamin'ny mpanao gazety voafantina ny PHAT dia voatery nanemotra izany ho amin'ny fotoana hafa indray. Tsy mbola tafavoaka tamin'ny fahanginany noho izany ingahikely. Hatreto mbola tsy miova ny tena mpitantana ny firenena any ambadiky ny sehatra any. Niezaka izy ny hampijoro ny maha-PHAT lohan'ny firenena azy saingy nandamoka aloha izany, toy ny tsy afa-mihetsika hatrany izy noho izany.

Tao anatin'ny herinandro fotoam-piasana andavanandro ranamana vao afa-nitafa tamin'ny mpanao gazety hilaza indray ny hisian'ny fifampidihana eo amin'ny ankolafy. Tafavoakany ilay fitenenana saingy ho tanterany ve izany? Ao anatin'ny fotoana fiandrasana ny andro voatondro hihaonana indrindra isika amin'izao fotoana izao. Mazava loatra raha be no niteny hoe fanavotana farany ho azy io hampiverenana azy ho tena 'Filoha' tokoa fa tsy sarintsariny intsony. Be sahady anefa ny toe-javatra efa mintranga mandra-pahatonga izany fotoana izany ka ny tanjon'ireny toe-javatra ireny dia ny tsy handehanany any amin'izany fihaonana izany mihitsy. Mazava loatra manko fa hiharihary avokoa ny halatra nataon'ny sasany dia tadiavina ny fomba rehetra hanakanana ny famahana ny krizy mihatra amin'ny firenena. Tsy raharahiany izay hizoran'ny firenena fa ny mitavana ny harem-pirenena na ny haren'ny hafa no mahafinaritra azy.

Indro isika fa naheno hoe nisy nanapoaka grenady ny tobin-dasantsy teny Tsiazotafo, dia injao ihany koa fa vao niampita ny faran'ny herinandro fahatelo amin'ny volana isika izao dia heno indray ny 'fanonganam-panjakana fahatelo' nandamoka tao anatin'ny volana. Tiana nasongadina indray fa ny Lapan'ny Praiminisitra no saiky hotafihana voalohany, dia toy ny nanaraka mivantana sy nahalala ny zavamisy haingana dia haingana ny televiziona roa akaiky ny mpitondra amin'izao fotoana izao. Hita an-dahatsary ny fiavin'ny olona hosamborina... satria tsy nisy nampita tamin'izy ireo hoe "nandamoka" ny hetsika natao. Ny tena vonona amin-javatra sarotra tahaka itony dia manendry olona hanara-maso izay olona hanao ny "asa" fa tsy ho mora sambontsamborina vetivety izany. Mariho tsara fa raha niezaka ny mba hiseho vahoaka ingahikely dia mody iharan'ny fanonganana ny ao amin'ny Primatiora miaraka amin'ny lazaina fa saika hanafihana ny Lapan'Iavoloha sy Ambohitsorohitra ary ny any an-tranon'ny PHAT araka ny nolazaina. Fijeriko dia mibaribary fa te-hisongadina mihoatra noho ny PHAT eo imasom-bahoaka ny Praiminisitra fa tsy hionona intsony ho mpitantana manontolo ny firenena any antakonana any. Mbola hiandry ny faran'ny herinandro fahaefatra ve hampibaribary izany? Ka amin'io faran'ny herinandro io anie no voatondro hanaovana ny fihaonana e!

Noho izany, tsy hoe fanakanana azy tsy handeha ihany no tanjona amin'ireo toe-javatra avelany ho hitantsika fa efa misy tosika mihitsy any ho any hanova amin'ny fomba hafa kokoa ny fitantanana ny firenena. Ho tahaka ny ahoana ilay famindram-pahefana (fa tsy fanonganam-panjakana amin'ny alalan'ny basy aman-tafondro)? Tsy voatery ho araka ny antenain'ny ankolafy telo loatra anefa izay hitranga eo. Politika fanorona hafa indray no atrehintsika sady tsy voatery hiankina velively amin'ilay mety ho fihaonana izany tetika hitakitako rehetra izany. Na izany na tsy izany dia hiarahantsika mijery ny tohin'ny raharaha...

jentilisa, 19 avrily 2010 amin'ny 01:00 maraina ora Antananarivo

Mpitarika mpamadika

2010-04-18T01:13:00.000+03:00

Fony nanana ny lazany ny mpitondra fivavahana iray fony tanora sady nanana ny lazany teo amin'ny sehatra politika ihany koa dia nitantara fa efa niova ny fomba fanenjehana na famotehana ny fiangonana. Tsy kianina mivantana na enjehina avy any ivelany intsony ny fiangonana fa atao izay hahatongavana ho lohany ka rehefa tonga eo amin'ny toerana tadiavina dia tarihina hivily lalana tsikelikely amin'izay ny fiangonana, ho very hasina ka tsy hisy dikany intsony izy ary dia ho rava ho azy avy eo satria tsy raharahian'ny besinimaro intsony. Toa tsapako izany toe-javatra izany eo amin'ny tolona ataon'ny legalista hatramin'ny herintaona ka mandraka ity androany.

Teo ny niady ho loha sy solontenan'ny legalista ka rehefa hitany fa voakisaka tsikelikely izy dia naleony niditra ho minisitra fa any no misy ny tombontsoa kokoa. Teo ny mody tsy hitahita mihitsy fa rehefa voatendry dia misehoseho indray, rehefa tsy tanteraka ny fifanarahana dia iny koa no milentika. Teo ny tsy mety tafiditra anaty lisitra mihitsy fony nisy ireny fifanarahana ireny ka toy ny nigafy ny tolona avy eo. Teo ny mpitarika te-hampiditra ny olona ao anaty gidragidra mandrakariva nefa potika tanteraka ny legalista raha vaomiditra amin'izay herisetra izay. Eo ny olona nampidirina ho mpitarika nefa toa manao izay hahapotika ny tolona hatrany no kendren'izy ireo. Tsy te-hitanisa intsony aho fa tena mahaletra ny mieritreritra ny toe-javatra satria toa maro amin'ireo mpitarika ireo no efa mamadika ny tolona amin'izao fotoana izao.

Tranga niseho farany tamin'ity herinandro ity no itarihako ny sainao mpamaky. Iny fa nosokafana ny faritry ny Blueprint Behoririka ambadiky ny Magro Behoririka hanohizana indray ny tolona anaty fefy mba tsy hiharan'ny famoretana ny mpitolona mpandala ny filaminana sy tsy tia ny korontana. Vao andro voalohany nanaovana ny fihaonana dia hipoka sahady ny kianja, mazava ho azy fa kelikely kokoa noho ny teny Ankorondrano. Fahombiazana sahady izany, inona ny nataon'ny mpitarika? Nambara avy hatrany fa hotontosaina eny amin'ny kianjan'Ambohijatovo ny fotoana amin'ny sabotsy ho avy izao. Gaga ny tena! inona no mampipendipendina hankanesana any amin'io toerana io sa sosotra ireo mpitarika fa mbola maro hatrany ireo vahoaka vonon-kitolona? Tao amiko tao dia tsy mpitarika intsony izany fa mpamadika. Tena tsy manana stratejia hafa ankoatra ny fanakiviana olona hianoka baomba mandatsa-dranomaso ve? Sao dia tetika efa lany daty kosa izany e?

Nandeha ny fotoana, nanambara ny televiziona iray fa tsy mbola nanao fangatahana haka ny kianjan'Ambohijatovo amin'ny Asabotsy izany ireo mpitarika ireo. Na dia ninia ny hangina tsy hilaza ny hevitro aza aho dia niboraka ho azy ny fahatezerako. Tena famotehana ny tolona mihitsy izao, mpandala ny ara-dalàna ve ianao dia toa tarihinao any amin'ny tsy fanarahan-dalàna ny olona? Nisy avy hatrany ny namaly ahy fa fanosoram-potaka fotsiny izany fa raha tsy mpitarika adala koa tsy hahalala izay tokony ataony. Asabotsy mifankahita ary hahita azy tsara! hoy aho. Zoma: nalefa teny amin'ny tiko Tanjombato ny tolona: tsy nasiaka loatra aho satria mba misy koa ny olona akaiky iny toerana iny haneho ny heviny.

Zoma alina: nisy zavatra nipoaka ny teny amin'ny toby mpitsinjara solika ana orinasa frantsay. Iza no mahazo tombotsoa amin'ny fanapoahana tobin-dasantsy tahaka izany ary iza no ahiahiana avy hatrany? Na dia manambara endrika grenady aza ireo nanatri-maso tamin'io toe-draharaha dia misy ny manam-pahefana kinga amin'ny filazana fa baomba namboarina indray io... izany hoe te-hanameloka ny legalista ankolaka izy. Fepetra raisina voalohany: tsy maintsy masiaka amin'izay mety ho fidinana an-dalambe ataon'ny legalista. Mazava loatra fa nahomby tamin'izay nokendreny ho tohin'ny tantara izay nandefa io grenady tamin'ny tobin-dasantsy io. Vinavinako izany saingy tsy maintsy araka ny fizotran'ny raharaha tsinona.

Tonga ny Asabotsy, tsy nanambara ampahibemaso ny fanovana ny zavatra tian-katao ny mpitarika legalista, gazety iray nivoaka io andro io no mba nahitako fa tsy hihetsika eo Behoririka indray ny tolona ho fitandroana ny ain'ny olona. Tsy nilazana na inona na inona ny tany amin'ny fampitam-baovao fanarahan'ny mpandala ny ara-dalàna. Inona no dikan'izany? Na dia be aza ireo nanam-pikasana ny hivory io andron'ny Asabotsy io dia efa voky baomba manempotra izy ireo ka tsy hitonantonana eny Ambohijatovo izany. Vokany: Vitsy tsy araka ny nanampoizana azy ny isan'ny olona tonga teny Behoririka. Na ireo mpandeha amin'ny tolona azy dia naleony nanao zavatra hafa. Izay ve no tanjona tao amin'ireo mpitarika efa mpamadika eo imasoko ireo? Dia manahy sahady aho fa dia haveriny indray io fahadisoana niniana io fa amin'ny Asabotsy ho avy izao vao ho eny Ambohijatovo amin'izay. Dia ireo lazaina ho tanora tsy haiko hoe avy aiza ireo tsy mankasitraka ilay tsy fidinana an-dalambe... Hery tsy mitovy ve dia mbola hanao inona ihany sa voakarama hanakorontana rehefa misy ilay tahaka izay?

Miala tsiny aho raha manakiana ampahibemaso ny mpitarika ny tolona legalista satria be loatra ny fahadisoana ataon'izy ireo ary iniana ireny fahadisoana ireny amiko. Amiko dia misy ireo tsy menatry ny handainga rehefa mikabary amin'izy ireo: Lazaina fa efa vonona ao Ambohitsorohitra ny lalampanorenana vaovao mametraka an'i Madagasikara ho Departemanta Frantsay... tena fanimbazimbana ny tolona ataon'ny legalista ho fampielezana tsaho ny filazana tahaka izany. Ajanony ny fanaovana tsahotsaho fa itondray porofo mazava ny olona, mahatonga ireo hafa hieritreritra hoe mba vendrana koa ireo legalista ireto manaiky fahanana abobo tahaka izany. Fandrangitana ny olona mba hanao inona moa ny fanambarana zavatra tahaka izany? Rehefa tolona mandala ny filaminana no atao dia tohizo amin'izany fa aza manaiky hobaikobaikoan'ny sasany hivoaka ny vala mandrakariva. Na dia maro aza ny zavatra tiako hosoratana toy ilay "tsy fanonganam-panjakana" dia hatreo ihany aloha ny soratana.

Aoka handinika ny tsirairay fa dia misy mihitsy ny manao zinona ny tolon'ny legalista ary avy ao anatiny mihitsy sady lohandohany ireo mamily ny tolon'ny mpandala ny ara-dalàna ho lasa tsinontsinona sy tsy mikendry afa-tsy ny hahatezitra ireo mafana fo mbola tsy kivy hatramin'izao na dia efa herintaona mahery aza izay ny nanaovana ny tolona. Deraina kosa aloha ireo olona ireo amin'ny fikirizany.

Jentilisa, alahady 18 avrily amin'ny 01:05 maraina

PS: efa mivoaka an-tserasera izao ny gazety Tia Tanindrazana mpivoaka eto Madagasikara koa dia tsiditsidiho ihany na dia tsy ahitana ireo sariitatra tena manintona ny besinimaro eto an-toerana aza.

Iza no te-ho sefo sahala amin-dRalava Bodo na eo am-piandrasana an'i Maputo

2009-08-27T10:19:00.001+03:00

Fanamarihana voalohany, tsy azo vakian'olona mora tohina. Fanamarihana faharoa: Aza avilivily ny eritreritra rehefa mamaky ny teny fa manahirana. Fanamarihana fahatelo: natokana ho an'ny tia miresaka politika amin'ny saina irery ihany, noho izany miangavy izay manao politika amin'ny fo hitsahatra amin'ny famakiana ny vakinteny ka isaorana amin'ny famakiana azy hatreto.

Mahagaga sy fa mahavariana fa na dia liana amin'ny fahazoana vaovao avy any Maputo aza ny tena tsy mba mitaintaina akory fa mandray azy amin'ny alalan'ny kivazivazy zary tenany. Nahoana angaha? Rehefa nikatso ny fifampidinihana dia ity kivazivazy ratsy tsy firesaka am-pianakaviana ity no tao an-tsaiko koa miala tsiny miala fondro indrindra ho an'ny rehetra raha maro ianareo no ho tohina. Mifandraika amin'ny toe-java-misy amin'ny fotoana anoratana manko izy ity.

Niady izay ho sefo, hono, ireto singa samihafa tao amin'ity firenena iray antsoina hoe Olombelona. Raha miresaka hoe sefo aho eto dia tsy manivaiva na iza na iza fa resaka mba atao kosa ny antsika. Dia niteny, noho, ny iray antsoina hoe Ifu hoe: "izaho no sefo fa raha tsy velona aho tsy misy velona ianareo rehetra." Namaly izany kosa i Shain fa tokony izy no sefo satria izy no mipetraka amin'ny toerana avo indrindra ary avy aminy avokoa no iavihan'ny hevitra rehetra enti-mampandroso ny firenena. Nandresy lahatra kosa i Tan fa tokony ho izy no sefo satria izy no tena miasa indrindra. Tsy nampoizin'ny rehetra avy any kosa fa nibetroka dia nibetroka i Ralava Bodo hoe: "Mangìna daholo ianareo fa tsy maintsy izaho no sefo na tianareo na tsy tianareo." Anarana nomen'ny ray aman-dreniny azy io fa na lahy aza izy dia anaram-bavy no nomeny azy satria naniry vavy manko ny ray aman-dreniny tamin'ny bevohoka azy.

Nikakakaka daholo ny rehetra nandre izany trerona izany ka nanao hoe: "Dia ialahy ve letsy no hatao sefo? Mba mangina letsy fa tsy misy ilàna an'ialahy eo a!" Hay! rehefa izany ary dia hitokona tsy hanao na inona na inona aho dia ho hitantsika eo izay tena sefo amintsika rehetra. Dia nitokona tokoa ny anao lahy ka ny asa rehetra tokony ho nataony dia nangoniny teo amin'ny latabany fotsiny nefa tsy navelany hivoaka ny biraony ny asa rehetra. Tena nikatso tokoa ny raharaha. Nitohana avokoa ny asa aman-draharaha rehetra. Nanomboka narary ny toe-karena fa tsy noraharahiany mihitsy. Tsy misy na inona na inona mivoaka sy mandeha eto rehefa tsy izaho no sefo, hoy ihany Ralava Bodo. Nivoajamala tanteraka ny firenena Olombelona fa tsy mankaiza amin-dRalava Bodo izany.

Hitan'ny singa hafa rehetra ary fa tena tsy ho lasa izy ity ary tsy mifanaraka amin'ny sain'ny hafa ny fomba fieritreritr'i Bodo (misy koa ny manome anara-maneso azy hoe Koly ihany koa) dia nifanaraka ihany ny hafa rehetra hoe aleo omena an'ileiry ny fanononana hoe sefo fa tena manao izay tiany atao mihitsy ileiry sady tsy mitady afa-tsy ny antsoina hoe sefo izy. Mamerina indray aho hoe tsy ny sefo rehetra na ny antsoina hoe sefo rehetra dia tahaka izany fa mba tranga maningana fotsiny ity an-dRalava Bodo na antsoina hoe Koly ity. Farany, iangaviana izay hametraka hevitra rehetra tsy hisy hanompa na hiteny ratsy indrindra aza fady indrindra.

Angano, angano, à rire à rire, tsy izaho no namorona fa dia ny henoko faha-tanora no tantaraiko aminareo ihany koa. Fa dia maniry ny hivahan'ny olana izay tontosaina any Maputo ihany koa ny tena fa tsy maniry velively ny hisian'ny ady fifamonoana eto amin'ny firenena.

jentilisa, 27 aogositra amin'ny 10: 16

PS: Nikatso tanteraka ny fidirana aterineto tamin'izaho niditra fa dia kiry ihany koa ny ahy hivoahan'ny lahatsoratro.

Miarahaba

2007-12-07T10:11:00.000+03:00

Afaka fotoana vitsivitsy dia mety hisy indray ny fiverenana amin'ity bolongana niandohana ity. Tsy tena fanaraham-baovao mavitrika anefa no hivoaka eto fa karazana tahiry tsara hitoetra mandrakizay araka ny fitenenana. Na dia zavatra mety hiserana aza izany ny eto dia natao ho lovan'ny taranaka ihany izany

Raha ny marina

2007-04-12T18:23:00.000+03:00

Raha ny marina dia mahafinaritra ny mitoratoraka ny vaovao sy ny torapo eto amin'ity blaogy ity. Tsy fantatro marina izay zavamisy na isaky ny atoandro aty Dago dia matory ny famoahandahatsoratra na tsia. Tsy mety mahatoraka intsony manko aho amin'ny maraina na atoandro fa miandry firavana mihitsy vao mety rehefa isisihana mandrakariva. Mampahatsiahy ny fanao rehefa hiantso amin'ny alalan'ny telma ilay mitoraka blaogy eto. Fahefatr'adiny mbola tsy tafiditra hatrany. Mahazo ilay hoe tsy misokatra io tadiavinao io na tsy mety angamba ny parametre-nao. Dia vaka eo ny saina. Ankotrihinia hatrany fa e-he (Actualiser-na no tiako lazaina eo).

Dia mety ho lasa ihany indray ny eritreritro hoe ny famoahana na fahazoam-baovao sy serasera ampiasaiko ihany koa no mety mihatsentsina ka tsy mahafapo ahy loatra intsony. Nefa mivoaka ihany anie ny sehatra hafa e! dia ahoana izany? Dia tsy fantatro intsony izay marina. Dia hoy aho hoe be loatra ihany koa anie ireto blaogy itorahako ireto e! izay tsaratsara moa dia mba iangaliako ihany koa. Rehefa tsy metimety loatra dia aleo ialana moramora toy ny fialan'ny jiosy. Tsy jiosy anefa ny tena fa jentilisa ka aleo mampandre anareo ihany hoe any amin'ny atrika jentilisa any angamba aho no manome fotoana anareo aloha, raha sanatria ka tsy mety mivoaka ny ao dia ao amin'ny Andavanandron'iarivo ihany koa ny faharoa. Ity Andavanandron'iarivo ity ihany koa moa tsy mahafapo ahy loatra no nahatonga ahy misisika eto hatramin'izao.

Mieritreritra aho hoe aleo mitazona tokana amin'izay dia io no fehezina araka izay mety fa manahirana ihany ity manamaro ity. Dia ny Atrika jentilisa izany no ezahina tazonina. Any indray angamba tsara mihaona fa ny eto efa manahirana ihany. Ho tahiry indray aloha ny eto mandra-pisian'ny fiovan-kevitra indray. Ny olombelona moa mora miovaova hevitra izay ihany, ary tahaka izany ihany koa ny tenako. Ny lehilahy tia vao izay, hoy ny fiteny ka izay angaha no nahatonga ahy hionona amin'ilay iray izay Malagasy rahateo no miandraikitra azy voalohany.

Tena ho tsindraindray angamba sisa no andalovako eto.

Diso tetika?

2007-04-11T11:22:00.001+03:00

Ny mpanara-baovao politika dia mahafantatra tsara ny teny fampanantenana nataon'ny minisitry ny atitany sady praiminisitra nametraka ny fanamby hanangonana ny voka-pifidianana ao anatin'ny telo andro. Nisy avy hatrany moa ny gazety nanambara fa tena ho sarotra ny hanatanterahana izany fanamby izany raha ny fahatongavan'ny vokatra andro voalohany no noheverina. Kanjo moa saiky...SAIKY tontosa ihany izany.

Nokendrena ho ny Sabotsy alina no voangona io voka-pifidianana io raha kaontiana tsara ilay telo andro nanaovana fanamby. Tany ambadika tany dia fanangonana isam-paritra sady fifaninanana eo amin'ny samy faritra no nanaovana io fanamby telo andro io. Nobaikoana avokoa izany ny Ben'ny faritra mba ho voangona ao anatin'ny telo andro ny vokatra any amin'ny faritra misy azy. Misy tetika politika ihany ao anatin'izany.

Raha tontosa tokoa manko io telo andro io dia ho nodradradradraina fa haingana kokoa noho ny vokatra nangonina isam-paritany ny vokatra isam-paritra. Tonga ny Sabotsy : 96.3%n'ny vokatra no voangona. Noheverina fa ny ampitso izany raha ela dia azo avokoa ny vokatra rehetra. Efa nanakaiky ny tanjona ny zava-bita. Kanjo, teo vao tena nikatso ny fanangonana azy tany amin'ny faritra sasany tany. Nisy naharaka ve ny tanjon'ny governemanta hanaporofo ny mahahaingana kokoa ny fampandrosoana isam-paritra noho ny isam-paritany ? Mitsingerina manko ity ny andro nanaovana ny fitsapa-kevi-bahoaka, voalaza fa mbola misy birao iray tsy nahazoam-bokatra. Mihevitra aho fa tezitra amin'io ny filoha Ravalomanana amin'ny tsy ahafahany manaporofo dieny aty amboalohany ny mahamety ilay fanitsiana.

Mahatadidy tsara manko aho fa herinandro katroka no nanangonana ny voka-pifidianana tamin'ny volana desambra lasa teo ary tamin'ny gazety no nahitana fa ireo mpiasan'ny fampianarana no tena nifofotra tamin'izany ezaka izany. Tamin'ity indray mitoraka ity kosa dia ny tao amin'ny atitany avy amin'ny faritra no tena niezaka nanangona ny vokatra. Fifaninanana ambadika eo amin'ny samy mpiasam-bahoaka izany no misy. Marina kosa aloha fa nanaovana filazana manokana mihitsy ny fanangonam-bokatra tany amin'ny faritra saro-dalana tamin'ny volana desambra ary ny angidim-by no nanangoona azy nefa heveriko avy hatrany fa tokony ho tsy latsa-danja noho izay vitan'ny departemanta hafa ny an'ny minisiteran'ny atitany tamin'ity indray mitoraka ity.

Fa inona ity ataon-dRavalomanana?

2007-04-10T17:41:00.000+03:00

Fanamarihana: Niezaka aho ny handefa ny vaovao maraina saingy tsy mety foana izy ity. Na izany aza efa vonona foana ny lahatsoratra matetika ary ataoko fa tsy mampaninona anareo loatra na dia hariava aza aho no mahapetraka azy eto.

Mahalala isika rehetra fa fialam-bolin’ny eto an-tanàna ary tena tiany tokoa ny andron’ny alatsinain’ny Paska. Tena nifandroritana tokoa ny fiara mivoaka ny tanàna ary misy aza ny mahasahy mandeha an-tongotra vao maraina fa tsy nanantena hitaingina izay fitateram-bahoaka izay toa ny matanjaka ihany no tafiditra aloha noho ny fifanosehana. Tsy te-hiresaka lavabe loatra ny amin’ity loatra aho satria any amin’ny andavanandron’Iarivo no efa itantarako azy. Fa izay nataon-dRavalomanana omaly no lazaiko tsotra etoana.

Niainga maraina avy tany amin’ny fiasany tao Ambohitsorohitra angaha ny lehilahy niaraka tamina vazaha izay inoana fa tompon’andraikitra ambony eo amin’ny sehatra iraisam-pirenena. Araka ny fijery azy dia hizotra ho any amin’ny lapam-panjakana eny Iavoloha ry zareo ireto. Mazava loatra fa tsy maintsy arahina mpiambina ry zareo ireto. Ny nahita dia nahamarika fa sambany ny mpiambina manaraka azy no niaraka tamin’ny basy kalachnickov. Raha ny tokony ho izy dia ny vondro-tafika manokana amin’ny fiarovana ny filoha no mitondra basy tahaka ireny manerana ny lalana handalovan’ny filoha. Tamin’ity indray mandeha ity kosa dia ireo mpiambina akaiky mihitsy no nitondra basy, na niaraka akaiky ny vondro-tafika sy ny mpiambina akaiky.

Mazava loatra fa any amin’ny lalana tena be mpandeha no tsy maintsy aleha. Safidy telo no azony natao na mandeha hatraty amin’ny lalana mahazatra manaraka ny toby Ratsimandrava, mitohy mankany Ankadimbahoaka ary ny faharoa kosa dia hatraty Ambanidia Manakambahiny Tsimbazaza iny. Fa ny lalana nalehany dia nahodiny ho any amin’ny By-Pass ny lalana. Eo no mahavariana ? Niniana nalefa any ve ilay olona ? Ny arabe manko tena hipoka tanteraka tahaka ireny any Isotry amin’ny andro Asabotsy ireny. Anarany no lalamanivaka iny fa rehefa andro fialantsasatra kosa dia mitohana tanteraka e ! Ny fiara mijanona manaraka ny sisin’ny arabe ary ny olona samy feno azy na ny arabe na ny sisiny. Matetika no tafajanona ampovoan’ny arabe ny fiara mitondra ny filoha sy ireo fiara manaraka azy. Tsy afa-mihetsika intsony.

Dia lasa ny eritreritro manao hoe inona ary no tanjony tamin’izy teny amin’ny By-Pass ? Te-hiditra anaty vahoaka hahalala izay tena fitiavan’ny olona azy na tsy itiavan’ny olona azy ve ? Sa mba te-hijery mivantana ny habetsaky ny olona mitsangatsangana mivoaka ny tanàna ? Ny tena hita tamin’ny tele aloha (satria nandeha telaviziona izy io) dia be ny olona niarahaba azy tamin’ny hofahofan-tanana. Ny fiara niaraka taminy tamin’izany fotoana izany moa dia ireo fiara mercedes telo sy ny môtô misava lalana. Nampiasainy mafy aloha ny mpiambina tamin’ity indray mitoraka ity e !

Tamin'ny katolika iray

2007-04-07T18:19:00.000+03:00

Nambara nanerana ny fiangonana Katolika manerana an’i Madagasikara ilay fanambaran’ny eveka nalaza iny tamin’ny alahady teo. Nilaza ary ity namako fa nisy fintraikany lehibe tamin’ny mpiangona ilay fanambarana fa tsy nandeha goana fotsiny tamin’izao. Tena tao anatin’ny fotoana fiomanana ho amin’ny fifidianana mihitsy moa ilay izy ka nahatonga ny maro tamin’ny katolika nisalasala indray tamin’ny safidiny teo ary ho an’izay nikasa hanao eny indrindra indrindra. Nilaza ilay namako fa na lasa nanao tsia ilay olona na tsy nifidy tsotra izao.

Somary variana ihany aho tamin’ny fanazavana saingy hita tokoa aloha fa nihena be dia be ny mpifidy an-tanan-dehibe. Izany hoe mbola manana ny fahefany tokoa ny mpitondra fivavahana ho an’ny mpino katolika na andeha atao hoe inoan’ny olona kokoa amin’ny teniny. Ny tena fatratra dia ireo nahay nanitatra avy teny amin’ny resaka antsisitsisiny teny ka nilaza hoe afaka mijanona mandrapahafaty eo amin’ny fitondrana ny filoha raha vao lany io lalampanorenana io. Niteny avy hatrany moa aho tamin’izay hoe mba diso kosa aloha izay teny izay. Dia nanamafy tokoa aloha izy fa mila fandinihana lalina io lalam-panorenana io fa tsy tokony nirotorotoana sahala amin’izao.

Izaho kosa tetsy ankilan’izany dia namakafaka madinika indray amin’izay ambadik’ilay fanambarana naely tamin’ny fiangonana rehetra. Marihina fa nanao fanambarana toy izany ihany koa ny fiangonana fjkm saingy famporisihana hifidy ihany no nataony satria adidy amin’ny mahaolompirenena izany araka ny fanambarana. Tsy nisy resaka loatra na adihevitra loatra io « fanambarana protestanta » io. Ny sehatra eo amin’ny politika no nojereko.

Iaraha-mahita fa tsy manana « anjara toerana » ambony ny katolika amin’izao fotoana izao ary noheveriko fa ny nahatafiditra an’Atoa Patrick Ramiaramanana ho minisitra dia noho ny fitsidihan’ny vondrona katolika talohan’ny fanendrena ireo mpikambana ao amin’ny governemanta indrindra. Dia nieritreritra aho fa te-hampiseho ny heriny sy ny tanjany ihany koa ny fivondronamben’ny eveka tamin’ny fanambarana indrindra izy naely tamin’ny fiangonana. Mety ho izay no nampandresy ny tsia tamin’ireo renivohi-paritany indrindra indrindra ankoatra an’Antananarivo moa mazava loatra.

Ny olona mpanara-baovao rehefa amin’ny fotoana sahala amin’izao dia ny renivohi-paritany ihany no tarafiny amin’ny vokatra ka iny no heveriny ho safidin’ny olona nandia fianarana. Koa raha nifanintsana teo ny eny sy ny tsia na tena kely nanerana ny firenena ireo tonga nifidy dia heveriko fa voatery tsy maintsy nanendry praiminisitra avy amin’ny finoana katolika ny filoha. Amin’izao fotoana izao anefa toa sarotra inoana ihany aloha ny hahatonga ny filoha hanao izay fihetsika izay nefa samy miandry ny tohiny ny rehetra aloha !

Ny eritreritry ny filoha

2007-04-06T17:40:00.000+03:00

Ataoko fa efa hitan’ny mpamaky gazety ny fivoaran’ny fanangonam-bokatra tamin’ny fitsapa-kevi-bahoaka tamin’ny alarobia lasa teo. Ny hariva manko araka hita dia toa nihabetsaka tampoka teo ny tahan’ny fandraisana anjara aloha ary na ny fandroson’ny « Eny » ihany koa aza. Ny tena moa mbola namonjy alakamisy masina ka tsy nanaraka loatra ny vaovao.

Toy izao ary aloha ny vokatra azo tamin’ny 6 ora maraina ary nolazain’ny Rnm tamin’ny vaovao maraina tamin’ny 6 ora sy sasany : Ny isan’ny birao fandatsaham-bato nahazoam-bokatra dia 9.289 amin’ny 17.586 manerana ny Nosy izany hoe ny 52.82%n’ny biarao fandatsaham-bato no efa azo ny vokatra vonjimaika sady tsy ofisialy. Ny isan’ny mpifidy voasoratra anarana amin’izany dia 5.003.128, ny isan’ny tonga nandatsa-bato kosa dia 2.051.997 (41.01%) ary azo lazaina avy hatrany fa avoavo ihany izany taha izany. Ny isan’ny vato nanakery tamin’izany dia 2.011.065 ka ny 1.459.276 (72.56%) no azon’ny Eny ary ny 553.617 (27.53%) kosa no azon’ny Tsia. Azo marihina tsara fa tsy mifanampy tsara ilay vokatra hita eo saingy izay moa no nahazoako azy no sady vonjimaika io araka ny filaza fa tsy ofisialy tsy akory.

Fa hitodika vetivety amin’ilay hoe katsahin’ny filoha amin’ity fitsapa-kevi-bahoaka ity aho araka ny andraisako azy. Tamin’ny fifidianana ho filoham-pirenena dia efa nisy ny faritra resy be ny filoha amperinasa. Efa nahoraka tamin’izany fotoana izany fa tezitra ny lehilahy. Anisan’ny faritra tena nokarakarainy manokana tamin’ny foto-drafitr’asa manko ireo faritra naharesy azy ireo. Ohatra ny faritra atsimo andrefana sy ny faritra Sava, voakarakara ihany koa na dia tsy mitovy amin’ireo roa voalohany ireo ny faritra atsinanana na analanjirofo. Ny manodidina azy no niteny hoe safidin’ny olona kokoa amin’ny trangan-javatra sahala amin’itony raha ny olon any aminy aloha no fidiany koa aza atao mahagaga loatra re.

Voalaza moa fa nitony ihany ny lehilahy tamin’izany fandresen-dahatra nataon’ny manodidina azy izany. Mbola tsy maty lolo izy na dia izany aza ka ninia nanao io fitsapa-kevi-bahoaka io, araka ny fiheverako hoy aho, hanamarina izay nolazain’ny manodidina azy. Ny faritra tena andrasany izany amin’ity fitsapa-kevi-bahoaka ity dia ireo naharesy (faharoa na fahatelo) azy. Azo lazaina hoe nijery izy raha tena efa lasa faritra mpanohitra tokoa ireo faritra « tsy nifidy » azy na nanana safidy olon-kafa aloha fa manaiky azy hitondra rehefa izy no lanieram-bahoaka. Dia azo lazaina fa nisy fivoarany be tokoa ny safidin’ny faritra sasany.

Raisiko ho ohatra makadiry amin’izany ny faritry Melaky faritra nampahery an’i Voninahitsy Jean Eugene : Amin’ny birao fandatsaham-bato 184 voaray dia 51.928 ny isan’ny nisoratra anarana ka ny 27.954 no tonga nifidy (54.22%) ka ny 25.109 (90.54%) no nanao ny Eny fa ny 2.624 (9.46%) kosa no nanao ny Tsia. Fijeriko azy dia io aloha no isan-jato ambony indrindra azon’ny Eny amin’ny faritra rehetra. Amiko manokana dia tsy ampoizina ihany izy io raha tsy hoe miala ainy indray angaha ny filazana fa nisy halabato tany (mbola tsy nisy aloha io filazana io).

Izany hoe nanao karazana fihodinana faharoa ankolaka ihany ny tenany tamin’ny fanaovana io fitsapa-kevi-bahoaka io. Nahagaga manko fa efa nitondra teo izy dia izao nanontany sahady ny olona io. Ny olona efa nitondra matetika dia alohan’ny fifidianana ho filoham-pirenena matetika no manontany ny vahoaka izy…amin’ireny fotoana ireny koa moa matetika dia ny fanalavana ny fotoam-piasany no mahamaika ny mpitondra. Ity aloha tsy nisy fanalavana izany fe-potoana iasany izany. Ny olona vao mandray fahefana matetika no manao fitsapa-kevi-bahoaka avy hatrany raha vao azony io fitondrana io. Ohatra rehefa tafaverina teo amin’ny fitondrana indray ny filoha Ratsiraka. Mety ho hevitra ihany koa ny hoe mba tsy hanitsahany intsony (hanosihoseny) ny lalam-panorenana no nahatonga azy hanao izany saingy ilay famaritana ny teny hoe miverimberina sy mavesatra amin’ny fanosihosena ny lalam-panorenana mihitsy no tsy mazava ka sarotra anenjehana azy afa-tsy hoe tena antoko hafa indray no lasa mitondra.

Nandritra ny androm-pifidianana

2007-04-05T08:57:00.000+03:00

Dia tontosa soa aman-tsara ihany ny fitsapa-kevi-bahoaka momba ny fanitsiana ny lalam-panorenana omaly.Levona talohan’ny fotoam-pifidianana ihany i Jaya. Voalaza manko fa tamin’ny telo ora maraina omaly io rivodoza nahiana hifaninana tamin’ny fifidianana io. Somary nampihomehy ny fandehan’ny raharaha mikasika io rivodoza io fa na izaho no tsy nahara-baovao na ny vaovao no tsy nahasahy nilaza na inona na inona aloha fa « miandry baiko » indray angamba.

Ny maraina manko dia erika hatrany no nifafy teto Antananarivo. Nanontany tena ny olona hoe efa lasa aiza ary ilay rivodoza ? nandrasana izay havoakan’ny vaovao fa e-he ny fikarakarana ny fifidianana ihany no natao sesi-montotra. Niniana narona na misokatra na tsia ihany ny biraom-pifidianana tany amin’ny faritra nandalovan’ny rivodoza ny sain’ny be sy ny maro. Tsy nisy niteny momba ny rivodoza ny fampahalalam-baovao narahina. Na ny haino aman-jery no tsy te-hamoaka izay sarotra inoana ihany na ny sampan-draharaha misahana ny toetr’andro no nahazo baiko tsy hamoaka vaovao momba io raharaha io. Efa avy niteny momba ny fahalevonany ny filoha tamin’ny 11 ora atoandro vao namoaka sy nampita tamin’ny fampahalalam-baovao isan-karazany ny tao Ambohidempona.

Ny tany amin’ny biraom-pifidianana indray dia tsy nisy filaharana mihitsy raha tsy noho ny fahabangan’anarana tao amin’ny lisitra nefa ny kara-pifidianana teo ampelatanana. Rehefa tranga tahaka io nolazaiko io dia notovanana tany amin’ny faran’ny lisitra ny anarana sy ny mombamomba ilay mpifidy. Ny fanoratana ny anarana tamni’ny penina izany no mety ho nahaela ny fotoana fa ny filaharana dia tsy nisy mihitsy. Tsy nisy koa izany ny olona nihaodihaody manodidina ny biraom-pifidianana.

Tonga indray ny hariva, nitsidika kely ny tany amin’ny biraom-pifidianana aho hijery ny fanisam-bato alohan’ny handehanana hamonjy ny herinandro masina fa tena tsy nisy olona mihitsy. Ny mpikambana ao amin’ny birao fandatsaham-bato ihany no nanisa azy tao miampy olona roa na telo angaha. Ny tany ampiangonana anefa na katolika na protestanta hita fa betsaka noho ny mahazatra aza ny olona. Tombanana ho noho ny andro tsy niasana no nahatonga izany toe-javatra izany.

Voamarika ihany koa, ary nolazain’ny gazety rahateo fa be ny orinasa afakaba no niasa nandritra ny andron’ny omaly. Mety ho araka ny karazany ho tsy firaharahiana ny fanapahan-kevitry ny fanjakana ilay izy nefa rehefa nodinihina dia samy tsy niraharaha na ny mpampiasa na ny mpiasa. Noraviravizan’ny mpampiasa tamin’ny hoe « fanampin-karama » manko ny mpiasa dia roboka avokoa. Izaho manokana dia mahatsapa fa voafandrika avokoa izay mpiasa niasa noho ny sitrany ahay noho izay fandraviravizana izay fotsiny. Efa fampisafidianana ho amin’ny fanitsakitsahana ny zo mha-olom-pirenena manko izany ary hataony fanao amin’izay amin’ny fotoana manaraka rehetra.

Hatramin’izao ary dia eo amin’ny 31% eo ho eo ny tahan’ny fandraisana anjara ka ny 67% no azon’ny Eny ary 33% eo ho eo kosa no azon’ny tsia. Mbola ny 5%n’ny birao fandatsaham-bato manerana ny nosy no nakana izany vokatra vonjimaika izany. Hotohizana amin’ny manaraka indray moa ny tena nandrasan’ny filoha tamin’io andron’ny omaly io araka ny fahatsapako azy.

Vavolombelona tsy nampoizina

2007-04-03T17:14:00.000+03:00

Tonga dia miaraka indray ny anio sy ny tokony hivoaka omaly. Nandritra ny fanomezam-boninahitra ireo mpitolona menavazana teny Analakely tamin’ny andron’ny 29 marsa 1947 dia nanontaniana izay fantany tamin’iny tolona iny ny vitsivitsy amin’ireo olona ireo. Kanjo dia mpiasan’ny harena ankibon’ny tany tamin’izany fotoana izany no nivantanan’ny fanontaniana. Namaly ampahatsorana tokoa ny lehilahy ary fanontaniana nanitikitika ahy mpanaraka ny tantaram-pirenena no novaliany tamin’io fotoana io.

Raha namaky ny tantaran-dRavaoahangy Andrianavalona Joseph aho…noho izy anisan’ny mpitolona nanorina ny VVS sy ny MDRM dia nahita fa tsy nitsahatra tamin’ny tolona mandrakariva izy ireo. Ry zareo dia tao anatin’ny vondrona nantsoina hoe « gropin’i Tsaralalàna ». Vondrona mpanadihady ny zava-misy eto an-toerana ary mandinika hatrany ny toe-draharaha misy na dia raràn’ny lalàna nisy tamin’izany fotoana izany aza ny karazam-pivoariana tahaka izany eo amin’ny teratany. Io vondrona io ihany koa no handefasan’ny olona ny hetahetany sy ny zava-manjo azy any amin’ny toerana misy azy any.

Ny nahalasa ny saiko tamin’io fotoana io dia ilay anara-tanàna : Tsaralalàna. Amin’izao fotoana izao dia ny karana no tena betsaka amin’iny faritra iny. Tsy fantatro loatra aloha ny fiovaovan’ny mpimpetraka tamin’iny faritra iny fa noheveriko ho toy izany foana hatramin’izay. Nanontany tena ary aho hoe Dia ny tranon’iza amin’ireo Karana be dia be ireo no nanaiky hampiatrano izany fivoriana tsy ara-dalàna izany ? Fanontanian’ny olona tsy niaina ny vanim-potoan’ny fanjanahan-tany tokoa ny an’ny tena.

Fa ny fitenin’ilay nijoro vavolombelona no namaha ny olana. Hay talohan’ny taona 1940 tany ho any ka malagasy avokoa no nonina tamin’iny faritry Tsaralalàna iny. Ary raha mahatadidy isika dia betsaka trano miendrika gasy tokoa tao…efa niova tsikelikely moa ny endriky ny tanàna nakehitriny fa mbola misy kosa ahitana tsara ilay endri-tranona Malagasy vitsivitsy miorina eny. Ny voanjo no nampihorohoro sy nandripaka tsikelikely ireo Malagasy nipetraka teny. Ireo Malagasy ireo no anisan’ny vato nasondrotry ny tany tamin’izany fotoana izany. Ireo no « Grossiste » fandehanan’ny maro ka nahatonga fialonana tamin’ireo voanjo frantsay. Voakitikitika manko ny tombotsoa tokony ho azy. Azo lazaina fa karazam-pihetsika TTS tamin’ny andron’ny revolisiona sosialista izany no nataon’ny voanjo tanatin’ny fotoanan’ny fanjanahan-tany.

Noho izay fampihorohoroana izay indrindra dia voatery niala tao izay sisa tsy maty ka nivarotra ny taniny sy ny tranony tamin’ny vazaha frantsay. Izay vao lasan’ny Frantsay tanteraka ny faritry Tsaralalàna. Nilaza moa ny mpitantara fa tranga iray tsy azo hamaivanina io notantarainy io fa naneho indrindra ny tsy rariny nihatra na dia tamin’ny Malagasy nanana ny hajany aza.

Ny zavatra manaraka kosa dia olona hafa no niresaka tamiko fa tsy tamin’ny fampielezam-peo sy sary. Izy io kosa indray dia niteny fa tsy lasan’ny karana avy hatrany iny toerana iny fa ny vazaha no nivarotra azy tamin’ny taona 1972 andro nandroahana ny vazaha hiala teto Magagasikara. Nilaza kosa indray izy fa nifanaraka ireo vazaha ireo raha handeha fa tsy m isy mahazo mivarotra ny trano sy ny tany amina malagasy fa aleo olon-kafa no ivarotana azy. Ny vokany : lasan’ny Karana ambongadiny indray Tsaralalàna. Tsy mbola azoko nohamarinaina loatra ny fahamarinan’ity resaka faharoa ity nefa tsy lavitra ny fahamarinana ihany na dia izany aza !

Fifaliana ho an’ny filoha

Androm-pahatsiarovana ho amin’ny tolom-panafahana sy ireo nitolona omaly alakamisy. Hazakazaka hatrany ho an’ny filoha sy ny mpanaraka azy indray omaly. Nanomboka teo amin’ny fianonana protestanta Analakely, nitohy teo amin’ny tsangambato 1947. Nandeha tany avaratr’Ankatso tany amin’ny fasan’ny mahery fo ary dia nifarana teo amin’ny kianjan’ny 13 ho fanomezana mari-boninahitra ny sasany amin’ireo nitolona tamin’ny 1947 izany ny tapakandron’ny maraina.

Ny tsikaritra mety tsy ho voasoratra no tena soratako etoana ankoatra izay lazain’ny gazety any. Ankoatra ny filoha dia nanao ilay tanana havanana mankeny an-tratra havia tokony hanandrify ny fo ihany koa ny praiminisitra sy ny filohan’ny antenimiera. Asa aiza angaha no ahitana ny sarin’ireny fihetsika ireny. Ataoko fa tsy ho izaho irery no ahatsikaritra io fihetsika io.

Manaraka izany, araka ny nambarako ihany tamin’ny fetim-pirenena Maorisiana fa tsy maintsy hisy ampitovitoviany amin’iny amin’ny fetim-pirenena. Kanjo moa dia omaly 29 marsa izany no karazany notanterahiny. Ny mpianatra avy amin’ny sekolim-panjakana, tsy miankina na fiangonana na fanjakana, tsy miankina fa sekolim-piangonana ambaratonga faharoa sy ambaratonga faharoa manokana. Samy manana ny ravaka nampiavaka azy ireo sekoly ireo na ravaka manokana izany na akanjo andavanandro fanao ihany. Izay dia efa nahafaly ny filoha na dia somary niadana loatra aza ny famindra.

Tsy ny mpianatra ihany no nilahatra fa ny skoto ao amin’ny FSM sy ny ao amin’ny fiarahamonim-pirenena ahitana ny kilemaina sy ny vehivavy silamo sy ireo mpandala ny zon’olombelona ihany koa. Samy manana ny fanehoany avokoa ireo andian’olona nilahatra teny amin’ny kianjan’ny 13 mey ireo.

Somary nahalasa saina ihany manko hoe naninona no nampilahatra ireo karazan’olona ireo ny filoha sy ny mpikarakara ny fihetsiketsehana ? Angamba misy zavatra tiany aseho amin’ny be sy ny maro fa manana ny fahefana izy ary misy ny fanovana (fanitsiana ny lalam-panorenana indray io) tian-katao ka manentana ny olona rehetra amin’ny fomba ankolaka ry zareo.

Ny eny sa tsia?

2007-04-02T11:45:00.000+03:00

Politika indray aloha no resahina eto. Ity andro ity sisa manko no tena azo iresahana izay safidin’ny tsirairay. Azo lazaina fa tsy naresaka mihitsy aloha ity resaka fitsapa-kevi-bahoaka ity raha tsy ny andro androany ihany. Ny hita dia ifandroritana ilay fomba filazan’ny fivondronam-ben’ny Eveka momba ity 4 avrily ity. Filazana milaza fa aloha loatra tsy ao anatin’ny fotoana tokony hanatanterahana azy ity fiantsoana ny olona hanaiky na handa ny volavolam-panitsiana ny andininy sasany ao amin’ny lalam-panorenana ity.

Araka ny nolazaiko moa dia androany ihany no mba nafana ny adi-hevitra tamin’ny alalan’ny fandaharana karajia ifampitafan’ny samy mpihaino. Ny tao amin’ny kidaona maraina moa dia tsy nanaiky hisian’ny adi-hevitra hampifidy ny eny na ny tsia mihitsy. Mbola voan’ny karajia indray aloha ry zalahy tamin’ity indray mitoraka ity raha ny fahamatoaran’ny resaka ny sy ny fahalalahana kokoa ao anatin’ny resaka. Tena io adi-hevitra io izany no nibahan-toerana nandritra ny fandaharana ora iray teo ho eo. Atao hoe sady voalohany no farany satria rahampitso dia tsy tokony hanao na inona na inona intsony.

Mba nisy ihany ny zavatra voamariko nandritra ny fampielezan-kevitra. Ohatra tamin’ny fahatongavan’ny vary tao Toamasina dia tsy menatra nitondra ny marika ENY teny amin’ny akanjony ny Praiminisitra sady minisitry ny atitany. Rangahy io anefa no tompon’andraikitra voalohany amin’ny fikarakarana ny fandatsaham-bato eto amin’ny firenena. Efa nanontaniako ihany moa io zavatra io fa tsy azoko hatramin’izao na mety ilay fithetsika na tsia…na ho an’ny praiminisitra io na ho an’ny lehiben’ny fokontany.

Manaraka izany indray dia nambosaka izay fiheverany ny amin’ny zavatra miova ao anatin’ny lalam-panorenana ny teknisiana mirahalahy tao anatin’ny komity namolavola io fanitsiana io dia Atoa Honoré Rakotomanana sy Atoa Jean Eric Rakotoarisoa. Mazava loatra fa tsy maintsy voaresaka tao ireo miteraka adi-hevitra tany amin’ny mpanara-baovao politika eto an-toerana. Tao amin’ny fandaharana « l’interview » tao amin’ny televiziona rta moa no nisian’ny resaka.

Voaresaka tao ary ny amin’ny tsy amin’ny fahazoana mitokona nefa tsy maintsy hajaina ny fampandehanana ny raharaham-bahoaka. Tsy voahitsakitsaka ve ny fahazoana mitokona ao anatin’izany ? hoy ny mpanontany. Namaly ary Atoa JER fa noho ny toe-java-misy tamin’ny taona 1991 sy 2002 indrindra no anton’io fanitsiana io. Afaka mitokona ny mpiasa raha misy ny zavatra tsy mahafaly azy fa ny olona dia ilay fironana ho amin’ny fitokonana tsy manam-petra. Enimbolana nitokonana nandray karama ny mpiasam-panjakana, hoy ny tenany ka tsara kokoa raha atao anatin’ny fifampifehezana ny fitokonana fa tsy hanao izao fitokonana lavareny tsy fanta-piafarana izao. Efa hita rahateo nataon’ny mpampianatra teny amin’ny Anjerimanontolo sy ny mpitsara ihany koa io fitokonana io nandritra ny fe-potoana voalohany nitondran’ny filoha Ravalomanana.

Manaraka izany indray ny amin’ny faritany mizaka tena. Ny olana hatramin’izay, hoy ny mpandahatra dia ny fametrahana ny fitsinjaram-pahefana mihitsy. Nandritra ny fotoana nijoroan’ny lalam-panorenana voahitsy fanindroany iny anie ka tsy hita mihitsy ny fanapariaham-pahefana. Vao nisy iny olan’ny 2001 iny dia ny fisitahan’ny faritany ho firenena « mahaleo tena » iny indray no hita. Somary fohifohy ihany ilay fandaharana nefa dia tsy tsaroako loatra koa ny votoatin-dresaka maro noho ny fikarakarana zavatra nandritra ny fotoana nandehanany.

Fanamarihana : raha ny tokony ho izy dia namoaka lahatsoratra aho ny zoma sy ny sabotsy lasa teo. Tsy nahasokatra ny blaogiko mihitsy anefa aho ka voatery androany vao namoaka indray. Efa misy lahatsoratra hafa vonona fa noho ny fotoana dia io aloha no navoaka. Tsy mahazo maika mihitsy rehefa blogger ny tokontany ilalaovana, izay no nahavoa ahy. Raha mbola tsy feno manko ny endrika tokony asehony rehetra nefa ianao maika hanao « mot de passe » hiditra dia mitokona tsy mety hisokatra mandritra ny andro ny blogger. Karazany voasazy aho izany nandritra ny roa andro nolazaiko teo ka ialana tsiny amin’ny mpamaky indrindra.

Latsaky ny ora iray

2007-03-28T12:35:00.000+03:00

Dia hiresaka momba ny fidirana tao amin’ny fijerevam-baolina tao Mahamasina indray ary isika. Izaho raha vao nahazo tapakila dia nody kely aloha. Tsarovy fa tamin’ny fisokafan’ny fivarotana mihitsy aho no tonga ary tamin’ny valo sy fahatelony dia efa nahazo ny tapakila ahafahako mijery baolina. Katroka anefa ny tamin’ny sivy mbola tsy nampiditra ihany ry zareo. Efa noezahina hampidirina amin’ny ora mitovy rahateo moa ny mpijery. Ny resaka tanaty vaovao nakana ny feon’ny nilahatra hiditra no nahenoako io resaka io.

Aleo tokoa lazaina fa vao nanomboka ny vaovao maraina tamin’ny 7 sy sasany ny radio nasionaly ny alahady dia resaka tamin’ireo mpilahatra hividy tapakila ireo no nanombohany ny resaka ary ny vehivavy moa indrindra indrindra no tena nanontaniana. Nisy ary ny nilaza fa avy tany Tsiroanomandidy mihitsy izy no tonga hijery baolina fotsiny, vehivavy izy io. Ny atondro kosa indray, vaovaon’ny rnm ihany no laaiko etoana dia olona nitaraina hoe tamin’ny sivy sy folo mbola tsy nampidirina ihany. Izaho moa amin’izany ora izany any an-trano niverina natory kely satria tena tratry ny sery mahery aho tamin’io andro io nefa hikiry hijery baolina ihany koa.

Avy eo anefa dia nambara tao anaty vaovao ihany fa tamin’ny 10 ora katroka dia efa feno hipoka tanteraka ny fijerem-baolina « gradins » teo Mahamasina. Mahavariana sy mahatalanjona. Latsaky ny ora iray izany dia tafiditra avokoa ny heverina ho 24.000 mpijery nefa mahatratra any amin’ny 35.000 any ho any iny araka ny fanombanako azy ( mba tsy hilazana kosa hoe 40.000). Dia haingana dia haingana tokoa izany fampidirana olona izany amin’ny vavahady nisaiko fa efatra miditra an’io Mahamasina io. Jereo ary ny kajikajy kely.

Andeha horaisina amin’ny filazana ofisialy ny isan’ny tafiditra :24.000. Dia kajiana amin’ny vavahady fidirana 4. Atao hoe nahatafiditra olona 6.000 teo ho eo ny vavahady iray. Mody atao hoe ora iray no nahafahana nampiditra ireo olona 6.000 ireo. Olona 100 isa-minitra no tafiditra isaky ny vavahady amin’ny ankapobeny. Tena haingana dia haingana tokoa izany araka ny fijeriko azy. Voajery tsara ve ny tapakila amin’izay fotoana izay ? Rehefa miditra moa tonga dia lasany avokoa ny tapakila. Fomba hanafenan-javatra io.

Maninona moa, ary tsy sasatra aho, raha mitazona ny ampahany betsaka amin’ny tapakilany hatrany ny mpijery fa tsy ny niditra « maimai-poana » indray no be bahambahana. Amin’izay fotoana izay azo endahina sy avoaka ny kianja ireo tsy manana tapakila fa mameno vetivety ny toerana fotsiny. Ny nahavariana na dia izany aza. Mbola teo ampilaharana ireo anisan’ny tonga voalohany nilahatra dia efa nanakaiky ny ho feno sahady ny kianja.

Misy ny milaza fa misy tapakila tsy amidy any amin’ny toerana tokony ivarotana azy hatrany fa lalankafa mody risoriso no amarotana azy. Fomba efa fanaon’ny maro tamin’ny federasiona hafa izany, araka ny tenin’ny mpahalala, mba hahazoana bizina amin’ny alalan’ny lalao iray. Efa misy fifanarahana amin’ny mpiandraikitra ny tapakila sy ny « mpanao risoriso » amin’ny fitsinjarana ny vola ho ampaosin’ny tsirairay miray kopaka isasahana. Ataoko eto hoe tsy voatery ho izany tsy akory no nitranga tamin’ity indray mitoraka ity fa fiahiahiana ihany ny an’ny tena.

Izaho manokana dia tamin’ny 12 ora no niverina teny Mahamasina ary tantaraiko amin’izay ny zava-nanjo ny tena talohan’ny lalao aloha !!!

Noesorina hoe?

2007-03-27T11:34:00.000+03:00

Lasa hafatra ho an’ny tompon’andraikitra isan-tokony indray aloha no soratako etoana na dia tsy miala amin’ny baolina fandaka aza ny resaka eto. Hagagana manko ny an’ny tena raha nandre fe noesorina tamin’ny toerany ireo mpanazatra telo mirahalahy ao amin’ny Barea de Madagascar.

Hagagana toy ny an’ny mpankafy io taranja io ihany. Saiky nitovitovy avokoa ny hevitry ny maro niresahana raha vao nilatsaka fotsiny ny fanapahan-kevitra. Tian-ko fantarina tsara eto hoe iza moa izany no tena tompon’andraikitra tamin’ny faharesena aloha ary tamin’ny fanalana ny mpanazatra avy eo ?

Matoa aho minia mitantara ny zavatra niainako tamin’io alahadin’ny baolina io dia karazana fijoroana vavolombelona amin’ny zavatra maro tsy tomombana amin’ny fikarakarana ao. Zavatra antsipirihany izay nefa ao amin’ny antsipirihany indrindra no tena ahitana ny fahamatoran’ny fikarakarana ny zavatra atao.

Talohan’ny lalao dia efa niteny ireo mpanazatra ireo fa tsy mpanao fahagagana izy ireo fa hiezaka kosa hanao izay mety. Izaho manokana dia midera ny fanapahan-kevitry ry zareo teo amin’ny fifidianana ny mpilalao na dia misy ihany aza atao hoe tsy fetezana kely tamin’ireo mpilalao sasany. Ohatra : ny tsy nampilalaovana ny maro amin’ireo mpilalaon’ny Adema amiko manokana dia nety satria sarotra tenenina ry zalahy ireo indrindra rehefa nidiram-baolina izay. Marina fa manana ny fahaizany saingy ho fampanajana ny mahalalao iraisana ny baolina fandaka dia nankasitrahako ny « nanilahana » ireo mpilalao ireo.

Ny tsikera tena re moa dia ny amin’ny Fanefa Ima. Olona tsy anaty ekipa ny lehilahy ary matetika no mamotsotra na mianjera am-panafihana…ary tsy manenjika ny baolina somary lasa alohaloha kokoa nefa tsy hivoaka akory (ilay baolina io) ka mamela malalaka ny fiarovana vahiny haka azy tsy misy fahasahiranana. Fahakamoana sa fahakelezan’aina ? tsy fantatro loatra. Ny eritreritra moa dia tiana aseho amin’ny ekipan’ny Nantes izy hoe lany ao anaty ekipam-pirenena ka mba « raiso ».

Ankoatra izay ataoko fa nanao izay mety ny mpilalao. Ny fahadisoana faharoa indray dia ny tokony hampidirana avy hatrany an’i Doula (Ajesaia) sy Claudio ( Ny antsika) raha vao niandoha fotsiny ny fidirana faharoa rehefa tsy nampidirina amboalohany ihany ry zalahy. Nisy koa moa ny nilaza fa ankavian’i Bota (Goalkeeper) avokoa ny nidiran’ny baolina…Asa marina tokoa ve izany indrindra tamin’ny baolina tafiditra faharoa izay ny fiarovana sisa no niezaka hisakana araka izay azony natao.

Ny ankoatra izay kosa dia anjaran’ny federasiona avokoa. Fampivondronana tratra aoriana loatra. Fanendrena mpanazatra tahaka izany ihany koa. Toerana fampivondronana ireo mpilalao tamin’ny toerana tsy sahaza azy ireo fa toy ny toeran-gadra sanatria. Ny fikarakarana tsy araka izay nolazaina fa toa niniana nakorotana mihitsy aza mba hisian’ny fidiram-bola amin’ny fomba hafa (fivarotana tapakila any amin’ny risoriso indrindra indrindra ary sanatrian’izany ireo mikarakara ny tapakila ihany no tena rangory fototry ny olana).

Amiko manokana dia fialana andraikitra na fanilihana andraikitra ny fanalana ireo mpanazatra nanao araka izay mety tahaka ny mpilalao ihany. Zavatra iray ihany koa moa eo ampamakiana ny vaovao dia tahaka ny efa nahita solony sahady ny minisiteran’ny fanatanjahan-tena saingy mbola tsy nambarany moa hoe iza izy io. Na izany na tsy izany, manahy ihany aho fa tsy hijanona amin’izao ity toe-javatra mampalahelo ity.

Tsiahin'ny omaly

2007-03-26T18:27:00.000+03:00

Tsiaron’ny omaly
Na ahoana na ahoana tsy maintsy ho tsaroana ny baolina omaly. Nandalo teto amin’ny tanàna tokoa ny ekipa iray nilalao tamin’ny mondial 2006 farany teo. Dia noraisina tamim-boninahitra tokoa moa ry zareo na dia mpifanandrina amin’ny tena aza. Ataoko fa tsy mbola nisy fandraisana ekipa vahiny tahaka ny natao tamin’ny Ivoariana omaly ireny : Ny lakilen’ny tanàna, lavanila iray fonosana miendrika amboara no natolotra an’i Didier Drogba mialoha ny lalao avokoa. Na izany na tsy izany dia misy ny zavatra tokony hotantaraina manodidina azy ity.

Ny maraina teo am-pividianana tapakila

Izaho izay manoratra dia tamin’ny valo ora katroka no tonga teo anoloan’ny fividianana tapakila. Mazava loatra fa na dia amin’ny valo ora maraina aza vao misokatra ny fivarotana ny tapakila dia efa tena anisan’ireo tratra aoriana tsy tokony hahazo tapakila intsony aho. Nandeha nitady ny faran’ny laharana aho na dia izany aza. Eo amin’ny kianja mitafo moa io fividianana tapakila io. Misy maromaro ny fivarotana eo, tsy tadidiko intsony na telo na efatra. Dia nizotra niatsinanana nianatsimo ny dia nanaraka iny tambohon’i Mahamasina iny. Nandeha aho fa mbola tsy hitako ihany ny farany.

Tsikaritro tampoka fa misy laharana koa eo ampita atsinanan’ny tamboho. Gaga aho sady nanontany tena hoe fa angaha misy fivarotana tapakila hafa koa moa amin’iny ? Saiky hiverina aho hamonjy iny laharana iny saingy naleoko indray nanohy nijery ny laharana farany amin’ilay manaraka ny tamboho. Tonga teo anoloan’ny lapan’ny fanatanjahan-tena sy kolontsaina aho vao gaga fa hay misy laharana miampita arabe izy ity. Tsy azoko loatra na mankany amin’ny kianja mitafo ity laharana niampita ity na mankany amin’ny lapan’ny fanatanjahantena. Samy toerana fividianana tapakila rahateo moa izany. Efa misy mifampiditra hafahafa izany aza moa ny laharana teo araka ny fahitako azy.

Nahita izay toe-javatra izay aho dia niteny hoe tena tsy hahazo tapakila intsony aho izany. Tsy dia nataoko ho olana ny tamin’iny satria hampitaina mivantana amin’ny fahitalavitra ilay izy. Ny olana tao amiko fotsiny dia raha tapaka noho ny delestazy tsy fanta-pihaviana tampoka indray ny jiro. Efa tsy natao hahagaga intsony moa raha mitranga tampoka ny toy izany. Dia nitodi-doha hiverina aho hitaratra faraparany fandrao misy olona azo omena ny vola ahafahana miditra. Teny an-dalana aho no naheno hoe tapakila dimy isan’olona no azon’ny mpividy iray vidiana (efa misy dimy izany !). Kanjo nisy mpiara-miasa amiko taloha izay nikapokapoka ny lamosiko tao an-damosina tao. Nitady olona koa izy. Na izany na tsy izany dia niteny izy fa ny fahaizana mitsofoka anaty laharana ihany no kendrena dia mety hahazo tapakila avy hatrany. Izaho moa tamin’ny voalohany nandalovako afaka nanao izany tsara satria nahita ny mpitaondro ny filaminana somary variana saingy nieritreritra handaha ampim-pahatsorana ihany.

Dia lasa ranamana fa nitsofoka tao anaty laharana, ery am-pita ihany manko no azon’ny hafa andehanana saingy nihorakorahan’ny olona ka noesorin’ny polisy. Dia niverina teny ampita indray. Fa rehefa tonga nanatrika ny fivarotana iny indrindra no nisy fiara tafajanona. Tonga dia nanararaotra niampita avokoa ireo mpisisika ary anisan’izany ranamana teo. Tonga dia teo anoloan’ny fivarotana mihitsy no tafajoro. Nokarohiny maso aho ary dia hitany. Dia natsangako ny fonondroko toy ny nilaza hoe iray ihany. Dia nahazo tapakila izy.

Inona ny lesoka hita teto ampividianana tapakila teo amin’ny kianja mitafo teto ? Tsy nasiana baravy mibahana ny olona avy taty ivelan’ny laharana teo ka mora ny nitsofoka. Hanafenana zavatra maizina io, hoy ny nitantarako azy. Efa any amin’ny fivarotana ny mason’ireo nilahatra fa tsy mijery izay misongona horakorahana intsony. Mazava loatra fa matetika dia ny mpisongona hatrany no tena mividy teo amin’ny fivarotana faharoa sy fahatelo fa ny voalohany an’ny mpilahatra hatramin’ny efatra na dimy maraina. Tamin’ny valo ora sy fahefany aho dia nahazo ny tapakila ahafahako miditra mijery baolina. Ny laharan’ny tapakila azoko dia notadidiako tsara mihitsy fa n° 15352 sahady. Tsy fantantro hoe hatraiza moa izany ny laharana tao amin’ny kianaja mitafo no io sahady ny laharana azoko ? Lasan’eritreritra avy hatrany aho.

Manaraka izany ilay mpividy iray mitondra tapakila 5 koa dia tokony ho tsy mety fa roa na telo farafahabetsany no tokony ho izy. Efa mandeha any amin’ny risoroso sahady indray ny tapakila raha toy izany no fandehany. Ireo anefa metetika tsy nilahatra sahala amiko ihany fa resaka « olom-pantatra » ihany.

Ny andro ary vao amin’ny valo ora sy fahefany nefa ny fidirana ny kianja amin’ny sivy ora araka ny heno dia miandry indray aloha izany. Saingy izao : natositosiky ny mpitandro ny filaminana indray ireto milahatra hiditra ny kianja fa hoe maenilngelina hoe. Tadiaviny aparitaka indray izahay teo…loza ! fanahy iniana ilay « manakorotana » sa tena tsy fahaizana mihitsy ? efa lasalasa sahady ny saiko hoe hanao ahoana izany rehefa hampiditra olona indray ?

Laisitey hoe?

2007-03-23T18:02:00.000+03:00

Zavatra iray mahabe resaka ny sasany ity laisitey ity. Eny, raha amin’ny tany hafa izay nogejaina antokom-pivavahana ka nitolona niala tamin’izany fanagejana izany dia rariny loatra raha misy fihetsehana mafy amin’ny fotoana hikitikitihana io lohahevitra iray io. Fa ny eto Madagasikara kosa toa tsy nisy izany tolona hialana amin’ny « gejan’ny antokom-pivavahana » na inona na inona izany.

Fahadisoana voalohany raha mieritreritra ny momba io dia ny laisitey ampifanandrinana amin’ny fivavahana kristiana ihany no mby ao an-tsaina. Tsy izany anefa no tena manjaka eto Madagasikara fa ny fivavahana amin’ny razana. Ary mbola tena manana ny lanjany mihitsy io fivavahana io indrindra fa any amin’ny faritra hafa ivelan’Antananarivo any. Manana ny heriny izy ireny satria afaka mandidy ny olony hifidy an’izatsy kandida izatsy rehefa tonga ny fifidianana. Raha izay afaka mandidy izay anefa dia maneho fa fitaovana hakana fahefana ilay fivavahana. Isika milaza ho miaro ny laisitey : rariny ve io toe-javatra lazaiko io sa tsia ? Mifanaraka amin’ny laisitey ve izany sa tsia ?

Manaraka izany amin’ny 26 jona indrindra indrindra. Efa tsy resahiko intsony ny fivavahana fangataham-pitahiana ho an’ny firenena amin’io vanim-potoana io. Atao hoe tsy misy fanjakana sy « fiangonana » mifampiditra ao anatiny. Fa any amin’ny fiainana ambanivohitra. Terena hanatrika joro ny olona, io joro io dia fomba fivavahana amin’ny razana na dia mody afenina amin’ny teny hoe fanaon-drazana aza. Eo ny mahaolana ilay rafitrq fokonolona. Afaka manery hoe izao no fomba ka raha tsy manaiky iny dia toy ny fihantsiana izay…maika moa fa hoe tsy manaiky ilay toe-javatra ny olona dia ahoana ?

Mazava loatra fa mbola misy dingana tokony arahina aty amintsika vao tokony ho tonga amin’izany laisitey napetraka teto amintsika amin’ny fotoana mbola tsy vonona ho amin’izany ny sain’ny be sy ny maro. Koa amiko manokana dia mila tolona lavitr’ezaka manokana io laisitey io vao tsara apetraka. Hevitro manokana kosa aloha izay !

Azo atao ve?

2007-03-22T09:02:00.000+03:00

Fanamarihana : efa tokony omaly alarobia ity no nivoaka saingy tsy tafavoaka noho ny « connexion ».

Efa ao anatin’ny fampielezan-kevitra ho amin’ny fitsapa-kevi-bahoaka indrindra moa isika amin’izao fotoana izao. Nahatsikaritra aho tamin’ny gazety fa dia misy manao lohateny mifanohitra ihany ry zalahy. Ny iray manao hoe mangina tsy dia nisy olona ny tao amin’ny Magro (foiben’ny tiako i Madagasikara) ka nahatezitra ny filoha ny fahitana izany fa ny hafa kosa nanao hoe ny tao Ankorondrano ihany no mba re feo. Mandeha indray ny fikaramana an’ady hoy aho anankampo.

Fa ny nahavariana dia ny fitenin’ny filoham-pirenena tamin’ny kabariny omaly. Nibaiko ny mpiasam-bahoaka misahana ny fifidianana izy mba hanao tsara ny asany, hamporisika ny olona hifidy, hijery izay madilana hotentenina ary…hampandresy ny ENY ? Lasa tampoka ny saiko nanao hoe : f’angaha moa azony tenenina izany amin’ny fitsapa-kevi-bahoaka ? Efa namory ny sefom-pokontany teto Antananarivo moa ny filoha delegasiona manokanan’Antananarivo renivohitra.

Ny alarobia maraina moa dia nitety ny faritra nosimban’ny rivodoza Indlala farany teo ny filoha ka niaraka tamin’ny masoivoho Frantsay izy tany Maroantsetra. Nanana anjara fitenenana mihitsy moa io masoivoho frantsay io tao. Nandalo tany Antalaha koa ny delegasiona nandritra izany fitsidihana ny faritra tra-boina izany. Mazava loatra fa misy fifangaroana ihany ny fanampiana ireo tra-boina sy ny fanaovana fampielezan-kevitra na dia ny maheno ny hira mitondra ny lohateny hoe « Samy mafoaka » an’i Jerry Marcos fotsiny ihany aza rehefa nidina ny sehatra ny vahiny nitsidika tany amin’ireny toerana ireny.

Ny mpanao ny tsia kosa moa mandritra izany fotoana izany mbola tsy re loatra. Tsy manana haino aman-jery fehezina loatra koa moa ry zareo hamoaka ny heviny fa mionona fotsiny amin’ny fihaonana amin’ny gazety eny ihany. Sa tonga amin’ilay fiheverana hoe efa ho resy ny tsia ka iza no handany vola amin’io eo ?

Misokatra anio ny fampielezan-kevitra!

2007-03-20T11:28:00.000+03:00

Araka ny nofaritana dia anio no manomboka ny fampielezan-kevitra ho fampandaniana ny Eny na ny Tsia. Fitsapana ny hevi-bahoaka izay hotanterahina amin’ny alarobia 4 avrily ho avy io (Ao anatin’ny alarobia masina amin’ny alimanaka kristiana). Dia hitako tamin’ny fahitalavitra tantanin’ny fianakavian’ny filoham-pirenena aloha fa tao Ankorondrano, foibe-toeran’ny Tiako i Madagasikara, no notontsosainy ny fanokafana ny fampielezan-kevitra ho amin’ny Eny. Mazava loatra fa nalefa mivantana tamin’ny fahitalavitra ny fanokafana ny fampielezan-kevitra fa manana fantso-piseraserana ry zareo.

Tamin’ny ankapobeny dia nafantoka tamin’ny mahatsara kokoa ny faritra noho ny faritany ny kabary fohin’ireo nandray fitenenana. Tenin’ny filohan’ny delegasiona manokan’ny faritanin’Antananarivo moa ny hoe na ho amin’ny fanafoanana ny faritany aza ny fanaovana ny eny nefa aho filohan’ny faritany ka ho amin’ny fampandrosoana haingana ny raharaha dia mazoto aho ny hampanao eny amin’ity fitsapa-kevi-bahoaka ity. Tsy nisy nanao filazana lava loatra tahaka ny izay vao nahazo fitenenana ka manararaotra aloha fa voafehy avokoa ny fotoana tamin’ny ankapobeny. Nanatrika ny fotoana avokoa moa ireo lehiben’ny andrim-panjakana hatramin’ny filoham-pirenena. Mazava loatra fa izy no namarana ny fotoana talohakelin’ny tamin’ny folo ora maraina indrindra.

Ny somary singaniko manokana dia ny tenin’ny filohan’ny Antenimieram-pirenena Mahafaritsy Samuel manondro ny nifidianana olona hafa ankoatra ny filoha ankehitriny ho fahadisoan-dalana tamin’ny fifidianana ho filoham-pirenena farany teo. Tsy any amin’ny fivavahana kosa angamba ka hisy ny atao hoe diso lalana fa safidin’ny tsirairay no nojerena tamin’iny fotoana iny. Izay no naharesy lahatra azy ka tsy mety loatra raha melohina amin’ny safidiny ny olona

Nangina tampoka !
Efa fantatry ny mpanara-baovao fa resy avokoa ny solontena malagasy amin’ny baolina fandaka tamin’ny faran’ny herinandro teo iny. Raha natambatra ny isa dia 10 noho 2 be izao ny elanelan’isa. Niteraka resa-be tokoa ny lalao telo (miaraka amin’ny faharesen’i Barea nanoloana ny Akademia) nandritra ny tontolon’ny andro omaly. Androany kosa dia nangina tampoka ny resaka. Tahaka ireny hoe tsy misy baolina omanina izany amin’ny alahady ho avy izao. Be loatra manko ny manahy fahaesena be amin’io andro « lehibe » io ka ny itadiavana ny tsy ho montsana sisa no tena tadiavina.

Sombim-baovao 170307

2007-03-17T11:56:00.000+03:00

Matoam-baovao tao amin’ny Rfi
Noho ny fandalovan’ny rivo-doza maromaro teto an-tanindrazana dia ny solontenan’ny firenena mikambana mihitsy no nanao antso avo ho fanampiana an’i Madagasikara. Nolazainy fa vola mitentina $9.000.000 any ho any no ilaina ho fanarenana ny firenena amin’ity indray indray mitoraka ity ka miantso ny firenen-drehetra izy hanampy an’i Madagasikara. Ny nahamatoambaovao an’i Madagasikara tao amin’ity radio ity androany dia ny nilazana tao fa vonona ny hanome $2.000.000 ny fitondrana frantsay. Nanambara moa izy fa efa hatramin’ny volana desambra teo dia enina sahady ny rivodoza nandravarava teto amin’ny Nosy.

Ny nahavariana raha nihaino vaovao maraina tamin’ny radio maro dia tsy nisy filazana ny amin’ity vaovao nampitain’ny Rfi ity mihitsy. Hita ihany anefa ny antso nataon’ny solontenan’ny firenena mikambana tao amin’ny gazety « Ny Vaovaontsika ». Mety ho nisy tany anaty gazety rehetra tany fa tsy naseho tao amin’ny pejy voalohany moa izany

Baolina fandaka
Misedra fahasahiranana ihany ny ekipan’i Adema vantany vao tonga tany Kinsasha. Ny Seranana any an-toerana dia ny miaramila no mifehy azy. Ny zavatra rehetra tonga dia vola izay no mikaonty. Fantatsika moa fa ekipa misahana ny seranana ny Adema ka tsy nampandoavin-dry zareo vola (Visa ?) ny Kongoley raha tonga taty. Nanantena izy ireo fa mba tsy takiana vola (sa Royalties ?) koa rehefa mivahiny any amin-dry zareo. Tsy izany no nitranga fa tonga dia $100 isan’olona no notadiavin-dry zareo miaramila, miaramila manko no mifehy ny seranana araka ny nolazaiko teo. Nanazava ihany ry zareo nefa tonga dia voavaly hoe tsy misy ifandraisan’ny Tout Puissant Mazembe amin’ny seranana fehezinay ka tsy idiranay ny amin’izany resakareo izany.

Voatery nanatona ny federasiona tany an-toerana moa ry zareo ka nilaza ny federasiona tany fa tsy afaka hiditra an-tsehatra loatra amin’ny karazan-javatra toy itony. Mba hanamorana ny raharaha dia nilaza ry zareo fa aloan-dry zareo ny $50 isan’olona fa an’ny Malagasy kosa ny mandoa ny ambiny. Mba tsy hahasarotra ny fifandraisana dia naleo nanaiky, hoy ry zareo. Araka ny fitantaran’ny mpanao gazety nanaraka tany an-toerana moa dia rahampitso alahady amin’ny 5 ora sy sasany aty an-toerana (Madagasikara) no hanombohan’ny lalao any.

Ny mikasika an’i Ajesaia kosa indray moa dia nolazaina ihany koa fa rahampitso alahady koa no hotontosaina ny lalao. Tsy araka ny nambara taloha hoe Zoma izany fa Alahady indray ! ny somary nahavariana ahy dia tsy fantatra loatra ny vaovao any an-toerana. Noho ny tsy fahampiambola manko dia vitsy araka izay voafehy ny isan’ny olona nandeha tany : ny mpilalao 17, ny mpanazatra 1, dokotera 1 ary mpitarika ny ekipa 1 ihany. Ireo no zakan’ny tsena hoy ny fitenenana izay.

Eo amin’ny fanomanantenan’ny Barea kosa moa dia hikatroka amin’ny Akademia izany ry zareo ireto rahampitso. Mandeha dia mandeha tokoa ny tsikera amin’ny antso an-tarobia hoe vitsy loatra ny andro hiomanana. Tsy velomina amin’ny rano akory ireo mpilalao ireo na dia izany aza fa vola daholo no miala amin’izany rehetra izany. Voatsikera mandrakariva moa fa tia vola loatra ny Federasiona…mety ho marina izany fa ny fikarakarana rehetra mila vola avokoa.

Nihemotra indray ny Fmf

2007-03-15T11:54:00.000+03:00

Gaga aho raha nahita ny vidim-pidirana amin’ny 25 marsa ho avy izao navoakan’ny ankamaroan’ny gazety androany maraina. Voasoratra mazava manko fa Ar3000 indray izany ny fidirana eny amin’ny fijerena tsy mialoka raha Ar5000 ny vinavina teo aloha. Ar20.000 kosa ho an’ny lampivato misy fialofana andaniny sy ankilany, Ar40.000 ho an’ny lampivato mialoka afovoany ary Ar60.000 ho an’ny afovoany misy ny toeran’ny olo-mana-kaja. Tsy nasiana fanasana manokana mihitsy amin’ity lalao ity ka hoe midi-potsiny.

Araka ny novakiako tamin’ny gazety ihany dia ireto avy no nidinika ny amin’io vidim-pidirana io : Ny komity mpitantana ny federasiona, ny solontenan’ny fiadidiana ny Kaominina Antananarivo Renivohitra, Ny filohan’ny Mpanohana mavitrika, ny solontenan’ny minisiteran’ny fanatanjahantena, ny mpiandraikitra ankapoben’ny polisy (mitandro ny filaminana amin’io andro io) ary ny solontenan’ny mpanao gazety. Dia lasa ny saiko nanontany tena hoe anisan’ny nangataka io fampihenana ny vidim-pidirana io ve ny Mpanohana mavitrika ? nanotany tsiliantsofina teny amin’ny foibe mihitsy aho androany maraina ka niteny ny tompon’andraikitra tafaresaka tamiko fa mahalala ny zava-misy tsara sy ny tokony atao mihitsy ny Mpanohana mavitrika. Sarotra moa ny nanotany ankoatra izay.

Ny azoko ambara indray satria efa famerimberin-dry zareo any amin’ny lahatsorany any dia ny mpanao gazety no tena nisisika amin’io fampihenana ny vidim-pidirana io ary raha azony natao aza dia ilay vidiny Ar2000 ihany no tadiaviny. Manoratra sahady aza ny sasany fa tsy maintsy hisy fimenomenonana avy amin’ny sarambambembahoaka na dia io vidiny tapaka farany io aza. Eo ny olana : Ahoana moa no ahafahana mikarakara ny zavatra rehetra mifandraika amin’ny fampiroboroboana ity lalao ity raha ny fandraisam-bahiny amin’ny fotoana iray fotsiny ihany aza mety tsy ahasahana amin’ny hafy fidiram-bolan’ny lalao mba andrandraina tahaka itony ? Tsy ho afaka handroso mihitsy io fanatanjahantena io raha tsy tsara tohana ary ny tena mpanohana andrandraina hatramin’izao dia ny mpijery mahay mijery sy mitsinjo ny lavitra ihany koa. Izany hoe tsy ny mpitia tena mpitia no hahazo vahana fa ny « sarambambe » mpitoraka tavoahangy ny mpitsara sy ny mpilalao vahiny isaky ny resy ny ekipan’ny malagasy indrindra indrindra. Karazany mbola kolokoloina hatrany ny fanandratana ny fahantrana nefa ny fitiavana (ny baolina) tsy miankina amin’ny fananana loatra fa amin’ny fahazotoana sy ny fahafoizana indrindra indrindra.

Efa olana amin’ny federasiona ihany koa ny kianja tsy azy fa an’ny Kaominina, any amin’ny firenenkafa anefa araka ny fahalalako azy dia ny an’ny federasiona ny kianja ary dia lasany amin’izay fotoana izay ny vola miditra amin’ny dokambarotra. Ny eto Madagasikara dia ny Kaominina ihany no mandraoka ny dokambarotra. Paika mampiankina ny fanatanjahantena amin’ny politika ihany izany. Efa ela izany no natsidika fa tsy mety henon’ny tompon’andrikitra mandraka ity androany anoratana aminareo. Izany no ahatsijovana hatrany ny fahabangan’ny fanaovana dokambarotra amin’ny sisikianja eto Madagasikara. Mpiteny malagasy ihany koa angamba ka tsy misy fiantrikany ny dokambarotra atao eny ?

Mihevitra aho fa tokony tsy nilefitra ny federasiona na dia noho ny fikarakarana ny lalao sy ny haavon-danjany fotsiny ihany aza. Raha tonga eto ve i Johnny Halliday dia azo tenenina hoe Ar2000 ihany re no takatry ny sarambambe fa ataovy amin’izay ny vidim-pidirana ? Eto ny laharana faha-27 erantany no hikatroka amintsika izay faha-185 ka mila mpijery mahay manohana izany lalao izany fa tsy mpijery hivanaka ny sanatria hihorakoraka ho an’ny vahiny indray. Niaiky (ambadika) kosa ny federasiona fa nanampoka loatra ilay vidim-pidirana « niakatra » tampoka natao tamin’ity indray mitoraka ity ka mety ho nahamodraka azy nanaiky ilay vidim-pidirana Ar3000.

Ny an'ny mahay miteny

2007-03-14T10:08:00.000+03:00

Toy ny vondron’asa rehetra dia manana ny olona mahay sy manao ny asany amim-pahamatorana ny mpanao gazety. Ankoatra ny safidy mety ho efa ananan’ny tsirairay dia milaza tsikelikely anaty na aloha na aorian’ny vaovao ny votoatin’ny lalam-panorenana mbola miasa sy ireo handrotsaham-bato ny haino aman-jery matotra rehetra. Amin’ny ankapobeny dia mamaky tsy misy diso sy tsy misy fanazavana ny lohateny sy ny andinin-dalàna ry zareo. Tahaka ireny miteny amin’ny dokambarotra ireny ihany ka liana ihany ianao hihaino. Io dia na vaovao maraina, na atoandro na hariva mihitsy fa tsy hoe indray mandeha isan’andro tsy akory.

Ny hany mahakamo dia mahakamo ny mihaino azy dia ny an’ny Haino aman-jerim-panjakana mahasahana ny Nosy manontolo na ambava io na jerena. Tsotra ny antony : ireo teknisiana no asaina manazava tsikelikely ny votoaty ankapoben’ny lalam-panorenana. Ny teknisiana tiako lazaina eto dia ireo namolavola na nandrakitra an-tsoratra ny andininy nasiana fanitsiana araka ny fiteny azy mahazatra moa izany. Ny feo efa lavitra ny fihainoana azy moa ireo miteny ihany koa te-hatory izany ny fahatsapana azy. Raha mihaino kelikely azy ianao dia renoky ny torimaso eo raha mihaino fotsiny fa tsy manao zavatra hafa. Raha manao zavatra hafa indray moa dia tsy haheno na inona na inona intsony fa tsy mahaliana tsotra izao e !

Zavatra hafa mihitsy indray, lasam-binany fotsiny aho miteny hoe dia ho 3 sy 1 ny valin’ny lalao voalohany hihaonan’i Ajesaia sy Ismailia ary 4 sy 1 kosa amin’ny Adema sy Mazembe ve ? Tsy fantatro kosa izay mandresy fa ny vokatra ihany no mampanahy na mahafaly raha izay tokoa !

Mivantana avy tany Mauritius

2007-03-13T08:21:00.000+03:00

Asa raha tao anaty fandaharam-potoana na tsia fa nandeha mivantana tao amin’ny Tvm ny lanonana fankalazana ny faha-39 taona nahazoan’i Mauritius fahaleovantena. Tsy fahita firy ny tahaka izany nefa tsy atao mahagaga satria nasaina manokana tamin’izany fety izany ny filoha Ravalomanana Marc. Ny televiziona Mbc moa no loharano nakana ny sary.

Ho anay tsy mivoaka ny nosy, tsy mandingana ny riaka dia nahitan-javatra ilay fampitana mivantana ny matso sa lanonam-panjakana tamin’ity indray mitoraka ity. Voalohany amin’izany ny fotoana. Tolakandro no nanatanterahana ny matso fa tsy maraina tahaka ny antsika Malagasy. Marihina aloha fa somary efa teny antenantenam-potoana no nalefa ny sary ka tsy nisy nahita izay fanombohana tany ny Malagasy nijery Tvm.

Manaraka izany tsy tena tratra ny matso nataon’ny miaramila fa nisy kely tazana ihany. Raha notopazana dia nahitana fahasamihafana tamin’ny an’ny Malagasy. Somary variana kely aho, nieritreritra hoe tena efa nisy Amiraly tokoa nitondra an’i Madagasikara. Ny famindrana amin’ny ankapobeny dia samy manana ny gadony ny isan-tarika na isaky ny vondro-tafika. Vao tazanin-davitra dia tsy mitovy famindra avokoa ny miaramila na polisy rehetra. Hafa indray ny Malagasy raha amin’ity taranja ity. Tsara rindra tokoa ny antsika satria efa mba mpijery ny matso isaky ny fetim-pirenena malagasy ihany koa manko ny tena indrindra fa amin’ny televiziona. Iny mozika iny manko misy gadona (dobok’amponga lehibe) tsy miova mihitsy. Rehefa midoboka io ampongabe io dia tokony higadona amin’ny tany ny tongotra havia izay.

Ny fomba famindra ihany koa moa dia samy manana ny azy ny Malagasy ny ny Maorisiana. Firenen-tsamihafa rahateo no nanjanaka no sady efa naka tahaka ny famindra Eoropeana Tatsinanana isika tamin’ny andron’ny Revolisiona sosialista. Ny tanana ny an-dry zareo no tena mipelipelika fa ny tongotra somary miraikitra izay ny feny. Izay angamba no tsy nitiavan’ny Amiraly ny famindra tandrefana loatra ka nakany ny famindra Sovietika. Hatramin’izao anefa dia tsy miova io famindra io ary mbola tsy ho azo eritreretina loatra ny hanova io fomba famindra mahitsy tsara ny tongotra rehetra ary « atsipy » lavitra mihitsyaraka izay azo atao io. Izay moa ny fomba nitenenana azy taminay fony teo ambany faneva.

Tsy nisy loatra ny fiaran’ny miaramila nitondra tafondro, ny fiara mifono vy araka ny fiteny sy ny karazany fa ny fiaran’ny mpamonjy voina sy trano may no naseho ny rehetra. Tahaka ny firenena tsy mieritreritra loatra ny fanafihana avy any ivelany na tsy hampihorohoro ny hery vahiny sa mampiseho ihany koa fa tsy manana ireny fitaovana mandany solika ireny
Ry zareo tompon-tanàna ? Nieritreritra aho hoe sarotra ho an’ny mpanongana noho izany ny hampiasa fitaovam-piadiana somary mahery vaika nefa raha manana fitaovana ny mety ho mpioko dia ny eo amin’ny fitondrana indray no sahirana. Na izany na tsy izany tsy mbola nahenoana izany fanonganam-panjakana na fikasana tahaka izany loatra ny ao Mauritius aloha.

Fa rehefa vita ny an’ny tafika amin’ny ankapobeny dia miala any indray ny mpanao fanatanjahantena. Na ny mpitantara aza nilaza fa tsy fahita loatra ilay fihetsika. Nanao karazana fanazarantena mirindra manko ny mpanao ady totohondry nandeha voalohany. Tahaka izany ihany fa misy toy ny fifandonana « mirindra » ihany koa ny haiady Karate. Ny kung-fu Wushu moa dia ireny sinoa fihaviana ireny daholo mihitsy ny ankamaroany. Toy ny maneho ny fahasamihafam-pihaviana sy ny fandraisana anjaran’ny rehetra amin’ny fampiroboroboana ny firenena sy ny kolontsainy ny rehetra amin’izany fihetsika izany.

Nilaza moa ny mpitantara fa fiomanana amin’ny lalaon’ny Nosy hatao eto Madagasikara no tena antony nilaharan’ireto mpanao fanatanjahantena ireto. Ny baolina fandaka moa dia nisy vitsivitsy nanao tanisa ary vehivavy ny iray amin’izy ireo. Dia nandalo koa ireo mpitondra môtô sy bisikileta ary ny mpanao karting ihany koa aza. Hoy aho hoe mety hisy baiko ihany koa avy amin’ny filoha Ravalomanana hanao tahaka izao rehefa tonga eto Madagasikara izy ka hankalaza ny fetim-pirenentsika koa isika. Hitako nahafinaritra azy manko ny fihetsika nanoloana azy. Ny any amin’ny faritany no mety ho misy ny toy izao isan-taona fa ny eto Antananarivo ny mijery ihany no mahafinaritra azy aloha !

Fa na izany na tsy izany dia hita taratra mihitsy fa mbola tsy mahay mandrindra ny sary ihany koa ny televiziona any an-toerana…na izaho no zatra fomba hafa ka tsy mahazaka ity fomban-dry zareo ity. Mivadibadika loatra ny fakan-dry zareo sary ka mbetika ny mpanao matso avy any ankavanana no miankavia eo amin’ny sary, tampoka eo lasa ankavia miankavanana indray ilay matso. Tena somary nisaritaka kely mihitsy aho. Nahatadidy aho na dia izany aza fa na amin’ny baolina fandaka Eoropeana aza dia asiana soratra fanamarihana mihitsy hoe « angle reverse » rehefa avy aty amin’ny andanin’ny lalana ianao no mivadika hatreny amin’ny ankilany indray no maka sary. Dia gaga ny tena hoe izao moa dia lasa alohan’ny Malagasy ny Maorisiana ?

Ary ny hitako farany dia ny anaran-tanàna, ny toerana nanaovana ny matso manko dia tao Waterfront tao Port-Louis. Raha mahatadidy ihany koa isika tamin’ny fanokafana ny fitaratry Madagasikara ao amin’ity firenena ity fa ao Floréal ny toerana misy azy. Vao maheno izany ny gasy eto dia anarana orinasa avy hatrany no ao an-tsaina. Manana ny masoivohony eto Madagasikara avokoa manko izany anaran-tanàna avy amin’ny anarana orinasa izany. Dia hoy aho hoe efa fisainana asa tokoa angaha ny an-dry zareo ka very ny anarana taloha raha nisy na izay mihitsy vao manana anarana io toerana io.

Manga sy mavo

2007-03-12T10:19:00.000+03:00

Ny zatra mahita ny sary famantarana an’Antananarivo dia mahafantatra avy hatrany fa izany no lokony. Ny mavo natao ho dindon’ny vary ary ny manga kosa ho dindon’ny rano. Tsy mifanary tahaka ny vary sy ny rano, na an-tsaha na an-tanàna hoy ny fitenenana efa tsy nataoko tamin’ny endriny intsony. Ny teny tigetra ihany koa dia mitovitovy dika amin’ny sary famantarana ihany koa : « Ny arivolahy tsy maty indray andro ». Manambara firaisankina amin’ny ankapobeny nefa tsy maintsy miaraka aminy ny herim-pon’ny tsirairay ao anatin’izany firaisankina izany. Mba tsy hisy ny hitomotoe-poana na hialangalana amin’ny fandraisana andraikitra.

Eto kosa dia tsy hiara-dalana ny loko manga sy mavo fa hifanohitra, hampifanoherina no marina kokoa. Nolazaina manko ankehitriny ny lokon’ny taratasy hanaovana ny eny sy ny tsia amin’ny fitsapa-kevi-bahoaka ho avy io. Raha tsy diso fitadidy aho dia tahaka izay ihany ny loko nataon’ny Profesora Zafy Albert rehefa te-hanitsy ny lalam-panorenana izy. Ny manga hatrany no nanaovana ny lokon’ny eny ary ny mavo no nanaovana no lokon’ny tsia. Ny kalitaon’ny taratasy sisa no tsy fantatra hoe tsara kokoa ve ny an’ny eny sa dia tena mitovy tsy misy valaka fa ny loko ihany no samihafa ?

Hiakatra ny vidim-pidirana?

2007-03-10T12:36:00.000+03:00

Ny fihaonan’ny Barea voalohany

Dia miverina kely amin’ny resaka baolina fandaka indray aho eto. Na ahoana manko na ahoana dia efa mitaintaina fatratra amin’ny fihaonan’ny Malagasy sy ny Ivoariana ny mpanakafy ity taranja ity. Heverin’ny maro fa tratra aoriana ihany ny fikarakarana ireo mpilalaontsika amin’io lalao ho avy tsy ho ela io. Tapa-bolana sisa dia ho avy ilay andro malaza…

Arahin’ny mpanara-baovao sady mpankafy fatratra ny fivoahan’ny Barea amin’izao fotoana izao. Nihaona tamin’ny alakamisy teo tao amin’ny kianjan’i Mahamasina ary ny Barea sy ny Ajesaia. Ny Barea dia vao tamin’io fotoana io mihitsy vao hiaraka…tsy mbola niara-nizatra tamin’i Jean Rossignol akory aza. Ny Ajesaia kosa dia efa hatramin’ny fahazaza no efa niara-nilalao. Mazava avy hatrany ny vokatra fa tsy ho izay niriana mihitsy. Mahagaga anefa ny fihetsiky ny maro, araka ny gazety sy ny tenin’ny mpanao gazety mihitsy.

Mitovy hevitra amin’ny mpanazatra mihitsy aho ka atao hoe « afa-po » ihany amin’ilay vokatra. Rehefa tsy resy be dia tsy mbola hitako loatra aloha ny olana. Ireo mpilalao nantsoina ihany koa efa hitakitako ihany ny filalaon’ny maro. Ny fahaiza-miaraka no tena vato misaka amin’izy ireo. Raha miray fo sy saina tsara amin’ny fiarahana sy ny tanjon-ko tratrarina dia azo atao ihany y mandingana azy. Efa adino rahateo manko ny nampivondrona azy fony mbola tany amin’ny sokajy zandriny tany nefa misy ihany ireo tafara-dalana sy tafara-dalao fony fahakely.

Mihevitra aho noho izany fa masiaka loatra ireo nijery tamin’ny alakamisy raha iny andro iny ihany no itsarana ny fahaiza-manaon’ireo mpilalao nantsoina ireo. Nefa azoko indray ny fihetsiny raha ny mahazatra azy no nataony. Na iza na iza manko solontena malagasy hiatrika ny sehatra iraisam-pirenena dia tsy fanaon’i Mahamasina mihitsy ny manohana ny ekipany. Sedrainy amin’ny tsi-fanohanana ihany koa ny mpilalaony. Ny mpanao gazety angamba no mety ho vahiny amin’izany fomba izany satria mpiseraserana no ataon’ireny fa tsy hijanona amin’ny toerana iray mihitsy izy afa-tsy noho ny fitiavana manokana angaha.

Ny vidim-pidirana

Namoaka tamin’ny lohateny lehibe ny gazety taratra fa hisondrotra avokoa ny vidim-pidirana ao Mahamasina amin’io alahady 25 marsa 2007 io. Ar50.000 ny eo amin’ny lampivato misy fialofana afovoany (vakio hoe tribune centrale), Ar15.000 eo amin’ny lampivato misy fialofana andaniny sy ankilany (vakio hoe tribune laterales) ary Ar5.000 kosa amin’ny lampivato daninin’ny hainandro (vakio hoe gradins). Rehefa fihaonana anatiny moa dia Ar1000 no fidirana amin’ny lampivato daninin’ny hainandro, Ar2000 amin’ny lampivato misy fialofana andaniny sy ankilany ary Ar5000 ho an’ny lampivato misy fialofana afovoany. Ny mahazatra kosa rehefa fihaonana iraisam-pirenena dia Ar2000, Ar5000 ary Ar10.000 ireo vidim-pidirana ireo.

Amiko manokana dia ekeko io vidim-pidirana io mba hihaja kokoa ilay lalao ary mba ho tena mpitia no handeha eny. Ny fampisehoana rindran-kira aza moa efa Ar4000 ny fampisehoana ankalamanjana eto Antananarivo raha kely indrindra nefa dia ery amin’ny vovoka be ery, ny any anaty trano kosa efa Ar10.000 na Ar15.000 eny ny faraparany teo aza misy Ar20.000 mbola ifampitadiavana ny tapakila hovidiana risoriso Ar40.000 ka hatramin’ny Ar100.000. Koa rariny ihany amiko raha hakarina ihany koa ny vidim-pidirana amin’ity indray mitoraka ity.

Resaka teo ampiandrasana lalao manko no efa nilazan’ny sasany fa hilahatra tapakila dieny amin’ny 4 ora maraina ny sasany. Mety ho misy ihany koa ny hahavita hiari-tory hilahatra amin’ny 6 ora hariva dieny Sabotsy mihitsy…indrindra ireo te-handafo tapakila lafolafo kokoa sitrany ahay bizna hoy ny fiteny mahazatra ka tadiavina izay hamerana ny fihavian’ny mpijery araka izay azo atao.

Na izany na tsy izany mbola mety ho lesoka hatrany ny fampidirana olona. Misy hatrany manko ireo mitondra karatra maha-mpitandro ny filaminana azy ireo miaraka amin’ny sipany ( toa vitsy ihany ny tena miaraka amin’ny vadiny tsinona) samy tsy mandoa vidina tapakila ka anisan’ny mahafeno haingana ny toerana fijerem-baolina. Mila dinihina ny amin’io. Ireo boaikely aman’arivony moa efa tsy hita koa izay hanaovana azy, tsara kokoa angamba hasiana tapakila manokana mba ho ny tena mitondra zanaka no mampiditra azy ireny. Misy manko efa 14 taona mbola atao toy ny manaraka olon-dehibe hatrany.

Averiko mandrakariva ihany koa ny tokony hananan’ny mpijery rehetra tapakila azo savaina na dia eny ampijerena baolina aza. Ny eny amin’ny lampivato misy fialofana afovoany ihany manko no nolazaina fa atao sosony telo fa ny hafa kosa tsy nolazaina mihitsy. Manaraka izany dia tsy azoko loatra ilay fanakanana tavoahangy tsy hahazo miditra ny kianja. Tsara hazavaina bebe kokoa mba tsy hisian’ny fifandirana loatra.

Tokony hazavaina tsara ohatra fa ny tavoahangy fitaratra no tsy mahazo miditra, ny zava-pisotro misy alikaola ihany koa dia tsy mahazo miditra. Ny safobemantsina hoe ny tavoahangy tsy mahazo miditra (na ny plastika aza ve) dia tena tsy ho eken’ny rehetra mihitsy. Na iza na iza mpijery baolina dia mitondra tavoahangy misy rano avokoa noho ny hafanana. Izaho aza dia tavoahangy roa mihitsy no entiko ary entiko mody manaraka ahy avokoa ireo tavoahangy (plastika) roa ireo. Tsy tia toratoraka rahateo aho ary tsy avelako atoratoraka ny tavoahangiko.

Lalam-pitondrana

2007-03-09T11:58:00.000+03:00

Na dia tsy te-hikitika politika avy hatrany ny tena raha ny marina fandrao misy milaza manao fampielezan-kevitra mialoha ny fotoana dia alefa hatrany ny hevitra. Araka ny hitantsika mpanaraka ny toe-draharaha politika moa dia saiky nanova lalam-panorenana avokoa ny filoham-pirenena nitondra teto Madagasikara. Na hevitra hanamafisana ny seza izany na hevitra mety hitondrana araka izay mety ny firenena ho amin’ny fampandrosoana tokoa dia hafa hatrany ny hevitry ny maro an’isa. Ny maro an’isa eto an-toerana izay mimenomenona ihany saingy hafa ihany ny vato arotsaka rehefa tonga ny fotoana hamitana adidy iray.

Momba ny rafi-pitondrana sy ny fampitomboana ny taom-piasany na fampihenana ihany koa ve no resaka sa famaritana ny endriky ny fitsinjaram-paritra « vaovao » ? Toa samy manana ny tiany ny tsirairay amin’ny mpitondra ny firenena. Toa tsy hitsahatra hitombo laharana mihitsy ny isan’ny Repoblika eto Madagasikara ary hifanisa amin’ny isan’ny Prezidà hitantana ny firenena. Ny Repoblika fahatelo no mody misy hoe tapany voalohany, tapany faharoa ary ho avy ity ny tapany fahatelo saingy raha ny tena marina mety hiditra amin’ny tapany fahaefatra isika amin’ny volana Aprily ho avy io. Ny Nanovan’ny Profesora Zafy Albert ny fomba fanendrena ny Praiminisitra no tapany faharoa manko ary ny nanovan’ny Amiraly Didier Ratsiraka ny andininy maro ka nanovany mihitsy ny faritra ho faritany mizaka tena indray no tapany fahatelo. Oviana re vao ho tafajanona maharitra tsy isaina intsony ity Repoblika miova laharana matetika ity e ?

Teo am-pieritreretana izay aho no nanana hevitra mbola ho sarotra ny handresy lahatra azy saingy aleo lasa aloha lavitra be toy izay tsy nahatafavoaka ny hevitra mihitsy. Hoy aho hoe maninona moa raha misy ny lalam-pitondrana atao mifanila amin’ny lalam-panorenana ? Raha amin’ny fanazavana tsotsotra mialoha dia tahaka izao : Lalam-panorenana ihany izy io fa fanorenana azo ovaina ka ny mpitondra no mamaritra izay endrika hitondrany ny firenena amin’ny fitsinjaram-paritra sy ny fitsinjaram-pahefana ataony. Na rafitra hofidiana no rafitra apetrany any amin’ny faritra na faritany na rafitra hotendrena. Io Fanorenana azo ovaovaina io no tiako lazaina hoe lalam-pitondrana.

Ny halavan’ny fotoana hitondrana sy ny isan’ny fe-potoana azo itondrana ary ny momba ny fahefana telo kosa dia tsy tokony hiova mihitsy ka iny no mipetraka amin’ny lalam-panorenana. Ny fomba fifidianana ny filoham-pirenena, ny depiote ary ny Ben’ny tanàna kosa no tena faritan’ity tsy tokony ovaina ity mihitsy.

Inona moa no tiako apetraka anatin’izay ? Ny mirotsaka hofidiana ho filoham-pirenena tsirairay dia tsy maintsy mamaritra mialoha ny endri-paritra tiany hitondrana ny firenena sy ny fanendrena na fifidianana azy ireo. Farafaharatsiny amin’izay fotoana izay rehefa tsy mitondra ny programan’asany izy dia manana adidy hilaza io endrika tiany hitondrana ny faritra na faritany tsirairay io. Miaraka amin’ny mpitondra tsirairay izany ny rafitra fitsinjaram-pahefana entiny.

Ny lalam-panorenana kosa dia mila ny faneken’ny 3/4n’ny mpifidy nandrotsa-bato, fa tsy mpifidy voasoratra anarana, ary kaontiana ny vato fotsy amin’ity tranga ity, vao afaka miova. Ataoko fa amin’izay fotoana izay efa eken’ny maro an’isa tsara ny zavatra atolotra vao afaka miova.

Mikaonty ihany ny vola

2007-03-08T18:15:00.000+03:00

Mialoha ny zava-drehetra dia miarahaba hatrany ny vehivavy rehetra nahatratra ity andron’ny 8 marsa andro natokana ho andron’ny vehivavy eran-tany ity. Andro lehibe ihany satria anisan’ny nampiova zavatra be dia be teto amin’ity tany fandalovana ity ny fanamarihana ity andro ity isan-taona. Nahafahana nilaza sy namboraka ny zavatra tsy mety rehetra any amin’ny miafina any ka heverina ho nahamenatra ny namoaka izany ho fanta-bahoaka. Na izany na tsy izany tsy ratsy miohatra noho ny hafa loatra ny toerana misy ny vehivavy Malagasy eto an-toerana na dia mbola misy ihany aza ireo tsy manaja ny hasin’ny vehivavy any anaty fiaraha-monina any.

Mbola mitohy amin’ny resaka baolina fandaka ihany isika eto fa zavatra hafa indray no resahina. Tsy sanatria resaka kolikoly na sisi-bola izy ity fa ny lanjan’ny vola amin’ny sehatra andavanandro ary tafiditra amin’izany indrindra indrindra ny fanatanjahan-tena. Andeha atao hoe tsy taratry ny fahantrana na haren’ny firenena iray ny fandrosoana na fihemoran’ny fanatanjahan-tena ao aminy. Nefa dia hitaratra any amin’ny fikarakaran’ny fanjakana na fikambanana tsy miankina amin’ny fanjakana ny tanora ny fitaovana eo ampelatanan’ny tanora heverina fa ho avin’ny fireneny sy efa heriny rahateo moa rehefa miatrika fifaninam-pirenena na iraisam-pirenena.

Raha mbola nizatra teo an-kianja ny mpilalao malagasy sy ny mpilalao vahiny tamin’ny alahady teo dia nitsiky tampoka aho nahita ny fahasamihafan’ny fitaovana ampiasain’ny andaniny sy ny ankilany. Ny vahiny dia manao akanjo amboniny ary mitovy tsy misy valaka ny fanamian’izy rehetra. Ny mpiandry tokonana no manana ny azy manokana nefa izy mirahalahy ihany koa dia tena mitovy tanteraka ny fanamiany. Sady lava rahateo izy mirahaly ka tahaka ireny hoe kambana ireny mihitsy mihazakazaka. Miara-mamindra koa moa ry zalahy ka moa va tsy toy mandroroa ny maso. Ny laharana ao andamosina ihany (1) sy (22) no hany iavahan’izy mirahalahy. Heverina ho ny sinoa ihany no sarotra avahana hay raha atao tazan-davitra sarotra avahana ihany koa ny afrikana nanoloana ny tena.

Ny mpilalaon’ny eto an-toerana kosa dia fanamiana mitovy ny an’ny mpilalao fiandry, fanamiana hafa mitovy ny an’ny hiditra voalohany ary samy manana ny akanjony kosa ny mpiandry tokonana malagasy. Tonga dia fantatra avy hatrany ny mpilalao hiditra ny kianja rehefa avy eo. Marina kosa fa tsy nitambambe toy ny vahiny ry zalahy fa samy nanana ny fanazara-tenany avy ireo andaniny tsirairay avy eo amin’ny samy malagasy ireo. Eo angamba dia miditra avy hatrany ny toe-tsaina hiatrika ny tena lalao afaka kelikely. Toy ny niara-nientana hatrany ny vahiny rehefa milalao ary mifarimbona hatrany kosa. Ny Malagasy kosa lasa samy naka ho azy rehefa tena nandeha ny lalao.

Fa ny tena tiako tantaraina kosa indray dia ity : ny loko na fahanteran’ny baolina ry zareo. Na afangaro sahala amin’inona aza ny baolin’ny andaniny sy ny ankilany dia mora avahana sahala amin’ny « mitsimpom-bary » (fa angaha moa tsy ny akotry no tsimponina ?) ny baolin’ny vahiny sy ny baolin’ny Malagasy. Ny baolin’ny andaniny dia hita avy hatrany fa efa nandalo tany malalaka tsy nisy bozaka ary ampangain’ny lokony eny ihany. Ny an’ny hafa moa dia ny baolina tamin’ny mondial no nentiny teny Mahamasina. Oviana tokoa moa isika vao hahatakatra ny sahala amin’ireny amin’izao toe-bolan’ny tsirairay izao ?

Ity indray"ny fihetsiky ny mpijery"

2007-03-07T08:37:00.000+03:00

Mariho tsara fa tsy mitovy ny lohateny na dia mety hoe mitohy aza ny fitantarako. Omaly aho nanoratra ny hoe ny herin’ny mpijery. Anio kosa dia ny fihetsiky ny mpijery no horesahintsika. Efa nanoratra izany ihany aho tamin’ny alatsinainy fa ireo mety ho tsy tandrina na efa mahazatra ny maro angaha no holazaiko etoana.

Na dia izany aza aloha dia misy ifandraisany amin’ny herin’ny mpijery notantaraiko teo ihany ity. Efa mihazatra amin’ny famporisihana izahay indrindra na dia manao fahadisoana aza ny mpilalao tohanana. Saingy, tsy hataony mandavataona amin’ny mpilalao iray izany. Mihavitsy kokoa ny tehaka rehefa manao fahadisoana faharoa ny mpilalao iray. Io fahadisoana io tsy famelezana tsy akory fa resaka baolina votsotra na tolotra diso lasa any amin’ny mpifanandrina amin’ny tena. Eo amin’ny fahadisoana fahatelo, amin’ny ankapobeny avokoa izany, dia mihoraky ny fahadisoam-panantenana ny mpijery ary ny manaraka izay dia mahazo sioka amin’izay iny mpilalao iny.

Na iza na iza mpilalao tratran’io siokan’ny tokony hanohana azy io vahotra ihany. Tratran’izany indrindra i Tsiala (17) ao amin’ny As Adema tamin’ny alahady teo. Efa zatra nahita azy ihany aho noho ny fanatrehana matetika ny lalao tokony halaza eto amin’ny tanàna. Io mpilalao io raha tsy mbola tafiditra tsara anaty lalao izy dia somary vahotra izay ihany. Kely vatana izy nefa mitsoriaka ihany. Rehefa tafiditra tsara kosa izy dia mahavita zavatra ihany ary tsy matahotra izay haben’ny olona rehetra mifanehatra aminy. Noho izy somary kely izay anefa dia mety ho manana tahotra ihany ny lehilahy. Lasa mikoropaka izy ka manaonao foana indraindray. Tolotra avy any aminy no lasan’ny Mazembe ka saiky nahatafidiran’ny vahiny baolina sahady raha vao niandoha kely fotsiny ny lalao.

Raha ny tokony ho izy dia « nety » ihany ny nataony nanary ny baolina ho daka anjoron’ny vahiny saingy efa tsy neken’ny mpijery intsony ny fanapahan-keviny. Efa namotsotra baolina tamin’ny fanafihana tokony ho tsara iray izy, efa nanao tolotra nampidi-doza ho an’ny ekipany indroa. Nisy aza moa nilaza fa izy no nanao tolotra lasan’ny Mazembe ka nahatafidiran’ny vahiny baolina voalohany saingy tsy tadidiko loatra ny amin’izay. Nisioka be amin’izay i Mahamasina fa tsy nahavita na inona na inona intsony ny lehilahy. Vokany, voatery noesorina ny lehilahy satria ho lasa ambin’olona raha avela eny ambony kianja ihany.

Fa misy ny zavatra mbola eken’ny mpijery hatramin’izao, raha hiditra ny fijerena ianao ka mandeha irery dia tsy maintsy misy boaikely mahatsikaritra ka hanaraka anao toy ireny hoe miaraka ireny ianareo. Izany hoe raha misy roa samy hitany koa fa samy manana tapakila idirana dia efa hahita boaikely hanaraka koa ireo. Tsy dia maloto tsy akory ny akanjony nefa tsy hoe tena madio be koa. Izay matetika no mahatonga ny toerana fijerem-baolina ho vetivety dia feno rehefa malazalaza ny baolina. Raha tena zanakao tokoa moa ny manaraka anao inona ny olana fa ny maro dia tsy izany tsinona. Araka ny tatitra dia Ar28.000.000 no azo tamin’ny fihaonana tamin’ny Asabotsy nihaonan’ny Ajesaia sy ny Ismaily. Raha tombanana ho 30.000 ny isan’ny tafiditra tao Mahamasina ka atao Ar2000 ihany ny fidirana tsy miteny ny an’ny tribunes eto dia tokony ho Ar60.000.000 izany ny vola miditra. Fatiantoka goavana ho an’ny ekipa noho izany no mitranga. Resaka risoriso moa no heverin’ny sasany, ary fitantanana tsy mazava kosa ho an’ny hafa nefa mahita aho fa ilay tapakila iray mahatafiditra olona roa na telo aza no tena fototry ny olana.

Ny herin'ny mpijery

2007-03-06T09:22:00.000+03:00

Mbola resaka mpijery amin’ny ankapobeny ihany ity, indrindra moa fa ny baolina fandaka. Heverina ho tsy dia misy dikany angaha ny zavatra ataon’ny mpijery nefa dia misy fiantraikany amin’ny rehetra hatrany na ahoana na ahoana. Eny fa na dia amin’ny mpilalao ngeza zatra lalao goavana aza dia mety ho voateriterin’ny fihetsiky ny mpijery ihany. Ohatra iray no holazaiko ary dia tamin’ny ekipan’ny Tout Puissant Mazembe mihitsy no hitako.

Ny alahady ary dia ny mpanazatran’ny TPMazembe no niditra ny kianja voalohany. Nametrapetraka « borne » maromaro teny amin’ny kianja teny izy aloha. Tsy zavatra mipetrapetraka fotsiny fa karazany mandrefy amin’ny tongony mihitsy ny lehilahy. Nananihany moa ny mpampiesona hoe tahaka ny misikidy izany ny lehilahy mametraka ireo toy ny tako-bilany kely miloko mavokely maro ireo. Tsy niraharaha izay siotsiokan’ny mpijery sasany aloha izy. Rehefa vita ny nataony dia lasa niditra tany amin’ny fiomanan’ny mpilalao tany indray izy.

Rehefa kelikely dia niditra ny kianja amin’izay ireo mpilalao vahiny ireo. Maromaro kokoa ny siotsioka saingy tsy ny rehetra tsy akory. Tsy dia niraharaha izay siotsioka aloha ny mpilalao vahiny. Ny toerana tena ilalaovan-dry zareo koa moa somary manatrika kokoa ny « tribunes » ka lavitra ihany raha izay sioka. Dia nikitikitika ny baolina tao anatin’ny faritra nametrahan’ny mpanazatra ireo « sikidiny » ihany ny mpilalao. Izany hoe tena miezaka milalao anaty faritra tena tery izy rehetra. Ny fomba filalaon’ny rehetra amin’iny ihany moa no atao amin’ny tolotra sy fanenjehana baolina.

Efa folo miniotra taorian’ny fidiran’ny vahiny vao niditra ny malagasy mbola hanafana tena ihany koa aloha io. Iray aloha no nanivatsiva avy tany. Tonga dia tehaka mirefodrefotra no nataon’ny mpijery iray manontolo. Niherika avokoa ny mpilalao vahiny rehetra nijery izay notehafana. Heveriny ho iza angaha io nefa ny ao an-tsain’ny mpijery dia hoe ireny ny anay. Rehefa niara-niditra avy any ny mpilalao hafa rehetra dia niampy horaka ny nataon’ny mpijery rehetra fa tafajanona kely mihitsy ny fanazaran-tenan’ireo mpilalao vahiny rehetra tsy misy anavahana. Izany hoe zavatra madinidinika tsy ampoizina dia mety hahavariana ny mpilalao eny ambony kianja eny fa na dia ilay mpilalao mahery tao aminy aza dia mba variana ihany koa.

Sarotra ny lalao sady ratsy tohana koa!

2007-03-05T19:16:00.000+03:00

Izay avy hatrany no azo amehezana ny vokatra tamin’ny alahady teo indrindra indrindra. Ny asabotsy moa dia tsy nahita tsara aho ka tsy hitako loatra izay lazaina. Ny hany hitako tamin’ity lalao farany ity dia tsy tsikaritro akory hoe efa nanesorana iray anie ny Egytpiana ireto. Hita fotsiny fa somary maromaro kokoa ny fanafihana malagasy. Rehefa mamaly fanafihana anefa ny vahiny dia tena hita sahirana mihitsy ireo ao amin’ny fiarovana. Sahala ireny hoe mba mihetsika fotsiny fa dia tena lalaovin’ny vahiny mihitsy ny baolina.

Ny hita dia misy fahasamihafana ny fomba fanohanan’ny mpijery ireo ekipa roa ireo. Mazava loatra fa araka ny ataon’ny mpilalao ihany no hampafana ny mpijery. Mpijery tokoa fa tsy mpanohana loatra. Mbola mila ezaka manokana ny fitaizana ny mpijery ho lasa mpanohana tsy misy fepetra na dia hita fa mivoraka aza ny mpilalaon’ny tena. Fony aho namonjy an’i Mahamasina ny sabotsy teo dia nanao fanahy iniana aho ny tsy nihaino radio mihitsy. Rehefa tonga teny an-toerana aho dia gaga amin’ny fanginan’ny mpijery. Lasan’eritreritra aho nanao hoe fa resy 1 sy 4 sa 1 sy 5 no mangina tahaka izao ?

Misy ihany ireo mitabataba hanohana fa vitsy loatra miohatra amin’ireto mangina be fotsiny. Efa nisy moa ny vondron’olona nanangana fikambanana hanohana tsy misy fepetra fa raha vao mangina dia tsinian’ny hafa avy hatrany. Ny mifampirisika no tokony ho izy saingy mifanakiana no hita.

Ny tena loza dia ny toraka tavoahangin-dabiera ataon’ny mpijery sasany ny alahady ka saiky nahavoa ny mpitsara anjorony iray. Notorahan’ny sasany tahaka izany koa ireo mpilalao fiandry taorian’ny tokonany misy azy. Manaporofo ny fidirana antsokosokon’ny labiera sy ny toaka eto Mahamasina. Impiry raràna nefa dia misy mpivarotra azy mihitsy ao anaty kianja. Efa nisy ihany anefa tamin’ny herintaona fisavana mafotaka tsy hidirana tavoahangy mihitsy ka tsy nahitana toraka tavoahangy mandratra. Ankehitriny dia manimba ny fitiavana mihitsy ny fanaon’ny sasany. Tsy mba misy fakan-tsary fitsikilovana izay manao ny tsy mety tokoa moa ny eto amin’ny tanàna ka manao ny danin’ny kibony.

Tsy maintsy mijery

2007-03-04T10:59:00.000+03:00

Omaly sabotsy moa no nifandona amin’ny taranja baolina fandaka ny Ismaily avy any Egypta sy ny Ajesaia avy eto Madagasikara. Hanihany moa ny nilazako hoe Isaia (Izaia) sy Ismaely izany no hikatroka satria ny anarana Ajesaia dia mifanakaiky tokoa amin’ny anarana hoe Jesaia izay Isaia(h) ihany no dikany.

Noho ny asa dia tsy afaka nijery manontolo io baolina io aho. Na dia izany aza dia niezaka ny hahatratra ny faramparan’ny lalao ihany aho. Nisy tsikaritro tamin’ny fahitalavitra ihany koa ny miniotra vitsy nahafahako nitsipalotra teny. Azo lazaina fa nifandanja vinany ihany ny baolina na dia hita ho mitavozavoza kokoa aza ny malagasy ary lavalava kokoa ny Egyptiana.

Hita ihany koa fa rehefa te-hanala tahotra ny malagasy dia las diso mampidera fahaizana fotsiny hoe mahafitaka nefa dia lasa adino ny manolotra ny baolina any amin’ny namana. Rehefa manao valim-panafihana anefa ny Malagasy na manafika haingana dia matetika mbola mitohy hatrany ilay fianjerana efa « mahazatra » na ny mibolisatra ka manajary tsy amhita olona hafa anolorana baolina ilay mitondra azy. Mbola ezaka hafa ihany koa io.

Hita fa mbola mila tezaina tsara ny toe-tsain’ny mpilalaontsika ary rehefa milalao ka voafitaka ohatra na voadingana dia miezaka hatrany manenjika ny baolina fa tsy hijanaona eo amin’ny toerana nahavoafitaka.

Nilaza moa aho hoe nampitaina mivantana tamin’ny fahitalavitra ny baolina. Ny Egyptiana no tena nangataka io mba hampitaina any amin-dry zareo izy io ka nandoa ny vola fandoa amin’izany ry zareo. Efa ela tokoa manko ny tsy nahita mivantana izany ny malagasy eto an-toerana. Re fa $7000 no naloan’ny Egyptiana tamin’ny FMF ka ny $5000 dia natolotry ny FMF an’i Ajesaia fa ny $2000 kosa notazoniny.

Manaraka izany ny amin’ny lohateny, efa resy 1 noho 2 teo am-pialan-tsasatra ny malagasy vao hiainga avy ao am-piasana aho. Dia niteny ny namana hoe inona intsony ny ilana andehanana any sa hijery faharesena any ? Dia namaly moa aho hoe na resy sahal amin’inona az dia tsy maintsy tonga any aho. Fitiavana ny ahy. Tsy nahazo toerana intsony moa aho fa hipoka tanteraka ny kianja. Mitsingitsingy ambadiky ny olona ambany « gradins » sisa azoko natao. Mbola holazaiko tsara moa ny zavatra tiako ambara manaraka fa sao tsy mahazo tapakila eto aho fa amin’ny manaraka indray !

Lohalaharana ny FFKM

2007-03-02T09:17:00.000+03:00

Dia nolazain’ny mpanao gazety ary fa ny FFKM no nahazo ny volavolan-kevitra fanitsiana ny lalam-panorenana voalohany miaraka amin’ny mpanao gazety. Nolazaina moa fa amin’ny manaraka ny fanontana faobe ho an’ny be sy ny maro.

Atao hoe marina tokoa ny nataon’ny mpitondra fanjakana nizara araka izay azo natao ka nanao laharam-pahamehana ny fampahalalana tamin’ny mpanao gazety. Dia tetika ihany koa ny nanomezana ny boky kely tamin’ny filoham-piangonana telo mirahalahy mianaka sy ny tonian’ny FFKM mety ho solontenan’ny filohan’ny EEM izay tsy hita teo amin’ny sary sady tsy nampahafantarina hoe aiza izy amin’izao fotoana izao.

Saingy ilay vondrona mpanao gazety no manao ny ataony indray amin’izao fotoana izao. Hita ho minia manao izay hampahadiso hevitra ny mpamaky na ny mpijery azy ireo hatrany ny sasany amin’izy ireo. Mifandray amin’ny resaka FFKM ihany isika eto ary tafiditra ao anatiny mazava loatra ny katolika.

Manahirana aloha ny mijery ny filohan’ny fjkm mihazakazaka mamaly ny fanontanian’ny mpanao gazety. Miady hisisika ihany koa ity lehilahy ity hampandany ny eny sahady. Hoy manko ny fiteniny hoe « tsy adala tsy akory ny mpitondra fanjakana manao ity fanovana ity, fantany ny mahasoa ny vahoaka ». Nahoana no tsy fantatra akory izay ao anatin’ny volavolan-dalàna no izany sahady no ambara ? ny nanamarinany ny teniny tamin’izany moa dia ny ilazany hoe tsy fifidianana olona ity tsinona. Mihevitra izy ao anatin’ny fomba fisainany fa afaka hanazava amin’ny mpiray fiangonana ny ao anatin’ny volavolan-dalam-panorenana.

Mety tsara kosa ny fomba famalin’ny arsevekan’Antananarivo manao hoe mbola tsy afaka milaza na inona na inona aho satria vao izao ity no azo ka mbola handinika azy tsara. Hiara-mijery izay ao anatiny ao isika. Zavatra hafa avy hatrany no inian’ny mpanao gazety sasany asisika toy ny hoe tsy miova amin’ny heviny ny katolika fa hanohitra io volavolan-dalam-panorenana io. Teny tafahoatra, teny fihantsiana ihany koa aza ary efa nahatonga ny arseveka niteny hoe aza ampitenenina izay tsy nolazainay izahay.

Maro ny olona no tafintohina amin’ny ataon’ireo mpanao gazety sasany ireo ka tsy nanafina ny fahatezerany tamin’ny alalan’ny antso finday na sofindavitra amin’ny fandaharana azony iadian-kevitra. Dia lasa indray manko ny eritreritra hoe iza indray no manome vola ireto sasany ireto mandranitra vondron’olona sy tsy menatra tahaka izao.

Io ilay politika fanorona

2007-03-01T08:49:00.000+03:00

Dia lasa lavitra any amin’ny fikarohana izay vontoatin’ny lalam-panorenana ny saina te-hahalala haingana izay nahitsy. Izany rahateo no nosoratako omaly hariva io. Rehefa nandinika aho dia karazana « politika fanorona » ihany no tena betsaka fa efa fantatra rahateo ny tian-karoso.

Mody atao izay hampitodika ny mason’ny olona any amin’ny hoe foanana sa tsia ny Antenimierandoholona. Rehefa henoko anefa ny tenin’ny Praiminisitra Charles Rabemananjara raha niresaka tamin’ny Nonce Apostolique miasa sy mipetraka eto Madagasikara izy fa tsy ho foanana velively ny Antenimierandoholona dia manao izay hampitaintaina amin’ny tsy misy dikany ny mpitondra. Ary rehefa dinihina dia ny iantsoana ilay rafitra « vaovao » no olana fa tsy ilay fanafoanana velively. Efa re manko fa tsy maintsy misy ny asolo azy rehefa foanana ilay andrim-panjakana.

Raha dinihina, toa tsy nomena ny lanja araka ny tokony ho izy tokoa ny senatera. Ao amin’ny lalam-panorenana dia karazana filan-kevitra eo amin’ny resaka sosialy sy toe-karena ihany izy. Tsy tena mpamapa-kevitra satria raha misy ny fampifandanjana sy fifanoheran-kevitra eo amin’ny Antenimierandoholona sy ny Antenimierampirenena dia ity rafitra farany ity ihany no tompon’ny teny farany. Ankehitriny heverina fa te-hametraka ny anarany araka ny tokony ho izy ny fitondrana ankehitriny « Filankevimpirenena momba ny sosialy sy toekarena ». Saingy dia ny anarana efa teo ihany izany no tazonina. Rehefa tena jerena dia ady anarana sy voninahitra no mampisaritaka ny sasany. Misy voninahitra kokoa ny antsoina hoe Senatera noho ny hoe Mpanolotsaina.

Raha izaho manokana izany dia efa mazava ankehitriny ny fomba filalaon’ny mpitondra. Izaho manokana (averiko indray) dia liana hahafantatra izay fiovana mety hisy eo amin’ny andininy faha-35 amin’ny lalam-panorenana aho. Article 35 - Les Fokonolona peuvent prendre des mesures appropriées tendant à s'opposer à des actes susceptibles de détruire leur environnement, de les déposséder de leurs terres, d'accaparer les espaces traditionnellement affectés aux troupeaux de bœufs ou leur patrimoine rituel, sans que ces mesures puissent porter atteinte à l'intérêt général et à l'ordre public. La portée et les modalités de ces dispositions sont déterminées par la loi. Io manko araka ny efa reko ihany koa dia hasiam-panamafisana. Fanamafisana amin’ny inona moa ? Liana dia liana aho saingy mbola miandry aloha isika rehetra hatramin’izao. Marihiko fa nifidy ny filoha aho noho ny MAP saingy tsy nolazainy tamin’izany fotoana izany fa ny Fokontany (fokonolona) no fototra amin’izany. Efa nambara ombieny ombieny nandritra ny fampielezan-kevitra manko fa efa vita ny fototra kanjo ovainy izy ity !

Mbola miandry foana

2007-02-28T18:47:00.000+03:00

Ninia aho ny miandry mandrakariva ny vokatrny ny filankevitry ny minisitra izay efa nambarako omaly. Eny, toa voamarina tokoa fa nisy ilay filan-kevitry ny minisitra. Dia re tsara ihany koa fa hay soso-kevitr’olona ilay hanafoanana ny praiministra fa tsy noraisina kosa. Androany io vao azoko tsara. Tapaka nandritra ny filankevitry ny minisitra ary ny volavolan-dalàna haroso hitsapana ny hevitry ny vahoaka. Saingy…

Hatramin’izao dia tsy fantatra marina izay votoatiny. Ny fanontaniana amin’ny vahoaka ihany no efa tapaka rehefa tena jerena ny zava-misy hatramin’izao. « Ekenao ve ity volavolam-panitsiana ny lalam-panorenana ity ? ». Dia valiana « Eny » na « Tsia ». Fa inona ilay volavolan-dalàna ? volavola A sa volavola B ? na ny vaovaon’ny mbs amin’ny 6 ora sy sasany hariva aza mbola tsy nahenoana na inona na inona.

Raha dinihina avy amin’ny zava-misy dia tsy mbola tapaka akory ny volavola horaisina dia ny fanontaniana no ialana olana aloha. Mbola mafana ny adi-hevitra any ambony any ka mahamenatra angamba ny milaza hoe tena mbola tsy tapaka ilay volavola haroso. Ny fotoana anefa ity efa tapaka. Dia mitohy indray ny hoe « Amin’ny manaraka ny andinindininy ». Fa enga anie mba hivoaka amin’ny gazety rehetra rahampitso ny antsipiriany fa raha tsy izany dia tsy nisy tapaka tokoa ny amin’ny volavola tian-karoso. Raha izao aloha no mitohy mety ho fialana bala amin’ny manaraka ny fanemoram-potoana indray ny andro hanaovana ny referandaoma e !

Tsy mahafa-po?

2007-02-27T18:31:00.000+03:00

Hanomboka ny fivoriany ny Sehatr’asa ekiomenika momba ny fiainam-pirenena ao amin’ny FFKM amin’ity herinandro ity. Vao avy naneho ny heviny kosa ny fivondronam-ben’ny eveka eto Madagasikara, izay karazana rafitra ambony eo amin’ny Eglizy Katolika Apostolika Romana eto Madagasikara. Heveriko fa mitaintaina ny amin’izay fehin-kevitra mivoaka avy ao ny mpitondra fanjakana. Na ahoana manko na ahoana izay mety ho filazana dia karazana tehamaina ho an’ny fitondrana ankehitriny ny fanambarana nataon’ireo eveka ireo. Heverina fa handresy avy hatrany manko ny eny nefa fantatra fa tsy ho voadinika tsara akory izay tena voalazan’ny fanitsiana ao amin’ny lalam-panorenana.

Nivory tao amin’ny lapam-panjakana Iavoloha ny lehiben’ny distrika maro teto Madagasikara. Izay any amin’ny faritra saro-dalana ihany no tsy tonga teto an-drenivohitra. Re fa hampiasana angidim-by any amin’ny toerana tsy takatry ny fiara noho ny faharatsian’ny lalana. Dia lasa ny saina manao hoe afa-mampiasa izany ary ve izay manohitra ny fanitsiana ny lalam-panorenana sa tena izay hahalany haingana ny fanitsiana ihany no tadiavina ?

Fa androany koa dia nihaona tamin’ny filoham-pirenena ny Senatera miisa 30 teo ho eo handinika ny ho avin’ity andrim-panjakana iray ity. Mba nandefa sombitsombiny tamin’ny resaka tao ihany ny televiziona nasionaly fa tena migobogobona be tsy ahafantarana izay tenin’ny olona tao ny resaka, niniana natao ve sa tena fahadisoana teknika ? Tahaka ny naheno teny hoe foanana izany ny praiminisitra aho tao anatin’ny fihaonana nefa tsy afa-mitoky amin’izany noho ny haratsin’ny feo.

Fa na ny mpiasan’ny RNM koa aza dia nampiseho tsy fahafaham-po ihany koa. Tsy niniana kosa fa noho ny fomba filaza fotsiny ihany. Omaly moa no notanterahina ilay filan-kevitry ny Minisitra natao tany amin’ny faritra. Dia re aloha fa atao maodely amin’ny fampiharana ny MAP iny faritra iny, na iny tanàna iny. Lasa ny saiko manao hoe mila filankevitry ny minisitra moa izany zavatra izany. Ny fanambarana tatitra momba ny fihaonana dia tsy nahenoana didy fampiharana mihitsy na dia iray aza fa toa fanapahan-kevitra ankapobeny ihany no fahazoako azy. Tamin’io vaovao alina io dia resaka MAP ranofotsiny no nandaniana ny 15 minitra voalohany. Enga anie ka izaho no tsy maharaka loatra. Nilaza ary ny mpilaza vaovao halina fa rahampitso no hilazalazana ny andinindininy momba io filankevitra io.

Dia niandry indray aho androany maraina, nilaza anefa ny mpilaza vaovao fa ratoandro no hilazalazana ny andinindininy momba ny filankevitra teo. Tonga ny atoandro, sarotra ny mandainga fa tsy naheno intsony aho noho ny fandaminana eo amiko manokana. Tahaka ny naheno ihany anefa aho fa hisy filankevitra hotanterahina indray anio ao amin’ny lapan’Ambohitsorohitra. Mahakamo be rehefa re satria tsy afaka iverenana hohenoina intsony. Angamba noho ny fangataham-pihaonana nataon’ny Senatera voalazako eo ambony dia tsy notapahina mihitsy aloha ny amin’izany votoatin’ny fanitsiana lalam-panorenana.

Miaiky aho fa lasa tahaka sy angamba fotsiny ihany sisa ny zavatra soratako eto anio satria heveriko fa tsy ampy loatra ny fampitan-dresaka aty amin’ny sarambabem-bahoaka. Naizany na tsy izany ny ampitso ihany no hanamarina na handiso ny zavatra nosoratako.

Nandiso fanantenana

2007-02-26T17:12:00.000+03:00

Niandry izay fanapahan-kevitra momba ny fitsapa-kevi-bahoaka tany amin’ny filankevitry ny minisitra tany Antsiranana ny mpanara-baovao politika. Nihevitra aho fa ao no hivoaka ny fanapahan-kevitra momba io zavatra iray io. Indrisy, resaka MAP ihany no namoriana ny praiminisitra sy ny minisitra rehetra tany amin’ny renivohitry ny farany avaratry Madagasikara io. Tsy nisy resaka mihitsy ny zavatra hafa raha ny tatitra navoakan’ny RNM tamin’ny vaovao atoandro teo no nohenoina. Asa mety ho nisy ihany angamba fa miandry ny tatitra famoaka an-gazety mihitsy vao fantatra ny votoatin-dresaka.

Raha fehezina izany dia karazany nomena fitsangatsanganana anaty rivo-doza (Gamede) ihany ny mpikambana ao amin’ny governemanta rehetra miaraka amin’ny fianakavian’ny filoha amperinasa. Heverina hotetezina avokoa indray manko ny faritra 22 misy eto Madagasikara amin’izao fotoana izao. Izany hoe taorian’ny nitetezan’ny tompon’andraikitra maro ny faritra tamin’ny alalan’ny MAP dia ny fitambarana’ny mpitondra ambony mihitsy no mety hitsangatsangana manerana an’i Madagasikara. Tsy dia misy maharatsy izany fa tsy tokony ho saronana anatin’ny filazana fanaovana filankevitra ny raharaha. Tsy misy fahasahiana tampoka rehefa mandre ny fanoheran’ny fivondronamben’ny eveka ny fiheverana fa karazana fanararaotana ihany no ataon’ny mpitondra ambadiky ny atao hoe fitsapa-kevi-bahoaka ary nolazainy mivantana fa saritsarin-demokrasia aloha no hita eto Madagasikara.

Hodinihina amin’ny Filankevitra

2007-02-23T10:23:00.000+03:00

Araka ny ambara ombieny ombieny dia natolotry ny komity nantsoina manokana hikarakara ny rijan-teny asiam-panitsiana amin’ny lalam-panorenana omaly ny volavolan-kevitra tapaky ry zareo. Raha ny marina dia natsipiny tany amin’ny filan-kevitra ny fanapahana ny amin’ny antenimieran-doholona. Amin’ny volavola roa dia efa karazany foana ny faritany mizaka tena ka ny faritra indray no mipetraka. Efa nisy hafetsena hialana amin’ny andraikitra nanafoanana ny antenimeran-doholona aloha tao amin-dry zareo. Io volavola roa natolotra io no tsy mba nolazaina tamin’ny haino aman-jery omaly. Gazety androany vao nahitana io fanamarihana io.

Na dia nametraka izay volavola roa izay aza ny komity, tsy midika izany fa ireo roa ireo avy hatrany koa no atolotry ny filankevitra hotapahin’ny vahoaka. Na izany aza dia niverina tahaka ny hotanterahina ve ny soso-kevitra napetraky ny filoha Ratsiraka tamin’ny fotoana nametrahana ny Lalam-panorenan’ny repoblika fahatelo ny amin’ny tokony hametrahana volavola roa (maninona moa na telo koa aza ?) hisafidianan’ny vahoaka ? Efa nieritreritra io manko aho ary efa saiky hanoratra teto aza nefa moa dia ny an’ny komity mpamolavola no tonga dia efa nataony toy izany. Voamarika aloha fa ataoko hoe nohenoina ihany ny soso-kevitro ny amin’ny tsy tokony hampidirana ao anaty lalam-panorenana ny rafitra fokonolona. Tsy mbola nahita ny andinindininy nasiam-panovana moa aho fa tsy afaka matoky loatra ny amin’izany. Ny filankevitry ny minisitra rahateo no tompon’ny teny farany.

Ny Fokonolona

Tao amin’ny gazety « Le Quotidien » sy « Les nouvelles » indray no nahitana fa tonga dia apetraka ny rafitra fokonolona, izany hoe tsy mandalo fitsapa-kevi-bahoaka indray ny amin’io. Tonga izany dia mizaka rafitra fokonolona ny Malagasy. Efa nolaniana tamin’ny filankevitry ny minisitra ny fandaminana vaovao mikasika io rafitra ahankina amin’ny minisitera eo anivon’ny fiadidiana ny repoblika misahana ny fanapariaham-pahefana io. Izany hoe tsy ny minisiteran’ny atitany intsony no misahana ny fokontany ao amin’ny fandaminana vaovao. Fantatrareo mpamaky ihany anefa ny fanoherako io rafitra apetraka io.

Tao amin’ny gazety « midi madagasikara » indray no nahitana sy nilazana fa sady tsy ao anatin’ny lalam-panorenana no tsy ao anatin’ny MAP io rafitra io nefa dia efa apetraka moa izany. Tsy fantatra intsony na ny MAP no tsara arindra amin’ny fokonolona na ny fokonolona no tsara arindra amin’ny MAP. Sahala amin’ny hoe mbola anaty fanandramana indray ny hampiasana ny fokontany. Ny gazety moa mametraka hoe ny sefom-pokonolona no mampiseho ny fahaizany ao anatin’ny enim-bolana…nefa heveriko fa mifandrindra amin’izany ihany koa ny hijerena ao anatin’izay vanim-potoana izany ny fahombiazan’ny fokonolona amin’ny fanantanterahana ny MAP.

Fivoriam-pokonolona !

2007-02-22T09:49:00.000+03:00

Araka ny efa nolazaiko ao amin’ny Ita jentilisa moa dia nitsingerina anio indrindra ny nitorahako blaogy voalohany teto amin’ity kianja fanehoan-kevitra ity. Nampiova zavatra be dia be tokoa ny natao tetoana na dia ny fanovana fahazarana fotsiny ihany aza. Tsy nisy andro izay tsy nieritreretana izay atolotra anareo mpamaky…na dia noho ny fitiavan-kanoratra fotsiny ihany aza. Raha ny tokony ho izy dia mba nikaroka izay zavatra tsara tsara asongadina ny tanjona voalohany teto. Fantatro fa nivadika tanteraka izany nanomboka tamin’ity taona ity noho ny fahanginan’ireo mpanohitra amin’izao fotoana izao sy noho ny foto-kevitra manokana. Tsy afaka ny handainga amin’ny saiko sy ny foko kosa aho fa aleo mivolana imaso. Ny volana imaso manko tsy mba kilema hoy ny fitenenana izay.

Raha nandeha hiasa aho omaly atondro dia voasariky ny filazana fivoriam-be hataon’ny fokontany eto amin’ny tanàna. Ny andro hanatanterahana izany dia amin’ny alahady 4 mars ho avy izao, izany hoe amin’ny fihaonan’i As Adema sy Tout Puissant Mazembe indrindra. Efa tsy afa-mijery aho ny baolina sabotysy aho noho ny asa dia tsy ho afa-mijery koa ve ny alahady ? Soa ihany fa tsy manana fiara aho ka hoe tsy maintsy tonga fa izay tsy mivory amin’io dia mety tsy hahazo toerana iantsonana ao amin’ny Parking intsony ny fiarany. Dia tsy te-hilaza zavatra betsaka aho fa manahy indrindra hoe mety ho amin’ny alahady 25 marsa indray ny fivoriam-be tsy azon’ny rehetra ialana amin’ny manaraka satria resaka fifidianana ny hatao amin’io, fifidianana izay ho mpikambana amin’ny biraom-pifidianana. Nefa dia amin’io andro io indrindra no hanatanterahana ny fihaonan’i Madagasikara sy Cote d’Ivoire. Amin’io fotoana io indray raha sanatria tokoa dia tsy hahazo taratasy avy amin’ny fokontany kosa indray izay rehetra tsy mivory. Dia inona no hatao : hijery baolina sa hamonjy fivoriana ? Aza hitako anie ka izany no ataony satria ho sahiny mihitsy ny hanao toy izany.

Traboina ny firenena manontolo

2007-02-21T09:26:00.000+03:00

Izay no tapaka tao amin’ny fivorian’ny governemanta omaly noho ny firotsahan’ny orana be loatra manerana ny firenena teo ho eo. Marina fa efa nitsahatra ny orana nanomboka ny alatsinainy teo fa na dia izany aza dia tena nitobaka tokoa teo ho eo ny rano. Araka ny fantatra sy nampitaina tamin’ny mpihaino dia noho ny fiakaran’ny hafanana any amin’ny ranomasimbe pasifika no miteraka fiantraikany lehibe aty amin’ny ranomasimbe indiana. Io fiakaran’ny hafanana io indrindra no niteraka ny orana isan’andro hatrany Malaysia, mandalo eto Madagasikara mihatra hatrany Afrika mihitsy. Anisan’ny vokatry ny fikorontanan’ny toetr’andro izany io orana nampitondra-drano an’i Indonezia ka mananontanona eto Madagasikara io.

Rehefa notapahina izay mahafirenena traboina ny firenena manontolo izay dia mampahafantatra tsara ny lanjan’ny « fikorontanana » mbola misy eto amin’ny firenena izay. Tsy hoe mikorontana misy ady na fifandirana no tiako lazaina eto fa mbola mifantoka any amin’ny zavatra hafa ny sain’ny maro eto Madagasikara amin’izao fotoana izao. Tsy mety mivarotra ny voka-bariny ny tantsaha any amin’ny faritra maro noho ny fanahiany fa tsy ampy ny vokatra manerana ny firenena. Tsy mitandrina mba hahalafo kokoa ny variny izy amin’izay fotoana izay fa miahy sao dia hividy lafo kokoa raha mivarotra « mora » amin’izao fotoana izao.

Fa raha nolazaina ihany koa izany fanapahan-kevitra izany dia manamarika fa ny minisiteran’ny atitany no voakasika mivantana. Hisahana raharaha mafana betsaka noho izany ny praiminisitra sady minisitry ny atitany misahana ny fifidianana sy ny famonjena voina. Heverina fa raharaha goavana ny fifidianana ary raharaha mafana kosa ny famonjena voina. Tsy mbola mahavita tena i Madagasikara fa mpitady fanampiana lava. Ny aiza izao no hangatahana fanampiana ? Ny famonjena voina sa ny fikarakarana ny fifidianana hitsapana ny hevi-bahoaka amin’ny alarobia 4 avrily ho avy izao ? Dia miandry aho ny amin’ny fanapahan-kevitra manaraka na hatao andro tsy fiasana nefa andraisan-karama io andron’ny 4 avrily io na ahemotra amin’ny fotoana manaraka mahametimety azy kokoa ny fifidianana.

Hitarafana ny fahatsora-pon’ny mpitondra ankehitriny ihany koa io fanekena fa tratry ny voina ny firenena manontolo io nefa hisisika hampanao fifidianana ihany izy. Fifidianana izay tsy voafaritry ny lalàna manokana ny andro hanaovana azy amin’ny mahafitsapa-kevi-bahoaka azy. Etsy ankilany ny vahoaka koa tahaka ny tsy mbola hifantoka amin’izany resaka izany mihitsy…afa-tsy hoe tiana hasisika moramora ny fanovana hahalany azy tsy fantatry ny olona ny vontoatiny. Ny zavatra mahafinaritra kosa aloha amin’izao fotoana izao dia miezaka hampita amin’ny maro ny andininy rehetra tsikelikely ny haino aman-jery « matotra » eto amin’ny tanàna amin’izao fotoana izao.

Hahasahy hampanao tsia ve ?

2007-02-20T11:37:00.000+03:00

Efa re moa izany fa amin’ny fiandohan’ny volana avrily izao sahady dia hotontosaina ny fitsapa-kevi-bahoaka momba ny lalam-panorenana hahitsy. Haingana dia haingana ny fizotran’ny toe-draharaha amin’izao fanapahan-kevitra izao. Ny volavola aza tsy hita akory dia efa tonga ny daty hanatontosana ny fandatsaham-bato. Raha mampitamberina ny antony nampandrosoana ny fifidianana ny mpitondra ankehitriny dia hahagaga ny mpanara-baovao politika raha ao anatin’ny fotoana tokony nanatontosana ny fifidianana ho filoham-pirenena indray no hanatontosana ity fitsapa-kevi-bahoaka ity. Raha ny voatondron’ny lalàna manko dia ny 6 mars- 6 avrily no voafaritry ny lalàna hanaovana ny fifidianana ho filoham-pirenena. Iny efa naroso tamin’ny 3 desambra lasa teo iny moa ilay fifidianana avy eo.

Ankehitriny kosa indray dia ny alarobia 4 avrily ho avy izao no hotontosaina ny fitsapa-kevi-bahoaka. Tsy marina indray ve izany ny fanazavana fa tsy mety raha atao ao anaty orana ny fifidianana na fandrotsaham-bato ? manaraka izany ihany koa ny tsy fahavononan’ny famolavolana akory amin’izao fotoana izao…Ambaraky ny efa tsy ampy telo volana intsony ny fotoana hanatanterahana azy. Tahaka ny zavatra atao tefitefy maika tiana ho laniana haingana no hatao.

Etsy ankilan’izay dia miezaka mba hampijoro mandrakariva ny Antenimieran-doholona ny filohany ankehitriny Rajemison Rakotomaharo. Ao ny antony ary fantany fa hofoanana io andrim-panjakana iray io matoa mikofokofoka tahaka izao ny lehilahy. Dia lasa ny saina mieritreritra hoe raha toa ka foanana tokoa io andrim-panjakana io, hahasahy hampanao tsia ny mpifidy ve ny lehilahy na dia mpiray antoko amin’ny filoham-pirenena aza ?

Izaho moa efa novakianareo ihany angamba ny volavola narosoko fa tiako hijoro ihany io andrim-panjakana io na dia hisy fiovana amin’ny fomba fitantanana azy aza. Ny tena toheriko moa mazava be fa ny rafitra fokonolona. Hatramin’izao manko dia mbola mitoetra ary mampatahotra mafy ny filohan’ny distrika ny fomba fitantanana ny sefom-pokontany. Fa na fidiana mivantana io na tendrena dia fandaniam-bola mihoatra noho ny fandaniana heverina ho nataon’ny faritany mizaka tena aza ka tena mifanohitra amin’ny hevitra voalohany natao hanamaivanana kokoa ny fihisatry ny raharaham-panjakana.

Mihamipoitra ny manohitra ny rafitra fokonolona

2007-02-19T09:56:00.000+03:00

Taloha araka ny fahalalako dia toy ny zava-pady izany manohitra ny rafitra fokonolona izany. Heverina ho zava-masina tsy azo iadian-kevitra io. Hevitra maharesy lahatra ny mpitondra angaha ka sarotra ihany ny hitsivalana amin’ny rafitra tiany apetraka. Na iza na iza nitondra io rafitra fokonolona io dia toy ny rafitra rehetra ihany io : manana ny kilemany.

Ny fokonolona no nanao ny asa niraisana tamin’ny vanim-potoana taloha, indrindra ireo zavatra goavana. Mbola tsotra ihany koa ny rafi-pihariana tamin’izany fotoana izany : mpamoly sy mpiompy avokoa ny ankamaroan’ny mponina, ny varotra dia ratsana ihany satria ny vokatry ny asan’ny tsirairay ihany no amidiny na atakalony eny an-tsena. Heloka mahafaty ny tsy mandray anjara amin’ny famonjena fefiloha tamin’izany fotoana izany.

Nampiasain’ny mpanjanatany ihany koa ny rafitra fokonolona hanarahany maso ny fivezivezen’ny olona rehetra. Tsy mahazo manori-trano mitsitokatokana izany fa tsy maintsy any amin’ny tanàna voatondro no monina ny rehetra. Ny rafitra fokonolona tamin’ireny fotoana ireny no tena nampanajaka ny atao hoe fanompoana. Izay niaina tamin’izany fotoana izany dia mahatsapa ny atao hoe miasa maimai-poana telopolo andro isan-taona any amin’ny voanjo, fa tsy any amin’ny fanaovan-dalana na fanamboarana tetezana na ny toy izany. Rehefa mba nisy ny tolona sy ny fifampiraharahana ary noho ny toe-java-misy maneran-tany dia mba nahena folo andro izany asa maimai-poana tany amin’ny voanjo…sady niato-tena izany. Toa tsy misy sahy milaza loatra io tranga iray io mandraka ankehitriny.

Tamin’ny fotoan’androny ny fiteny dia hoe tao-trano tsy efan’irery. Nidika izany fa rehefa nanaga-trano dia mandray anjara ihany koa ny fokonolona indrindra fa ny tovolahy matanjaka. Ankehitriny noho ny hai-tao tsy voatery handeha amin’izany lalana taloha izany intsony.

Nanamarika ary ny vahinin’ny fandaharana isan’alahady tao amin’ny tvplus atoa Pierre Houlder fa raha nampandroso ny firenena ny rafitra fokonolona dia efa ela isika no lasa lavitra tamin’io rafitra io. Niteny izy fa tsy ho aingam-pampandrosoana mihitsy io rafitra fokonolona io fa fiandrasana baiko avy any amin’ny fitondrana foibe. Ny fitsinjaram-pahefana araka ny tokony ho izy ihany no tena fototry ny fampandrosoana.

Aminy, dia resy lahatra amin’ny faritra izy fa tsy amin’ny faritany loatra. Fa ny zavatra tadiaviny, raha tena tian’ny mpitondra fanjakana dia rafitra voafidim-bahoaka ihany no mitantana ny rafitra itsinjaram-pahefana. Fa raha olom-boatendry ihany no mitantana any amin’ny rafitra isam-paritra any dia karazana fivangogoam-pahefana ihany izany. Ny olom-boatendry manko dia mandray baiko avy any ambony.

Miova miharatsy

2007-02-17T12:38:00.000+03:00

Mitohy hatramin’ny faran’ity herinandro ity moa ny fankalazana ny fetin’ny mpifankatia. Ny sehatry ny ny sakafo sy ny fandraisam-bahiny, ny tolotra na fanomezana ary ny tontolon’ny fampisehoana no tena mahazo vahana amin’ity karazam-pety ity. Ny nalaza indrindra moa tamin’ity indray mitoraka ity dia ny fampisehoana nataon’i Bodo sy Poopy tao amin’ny lapan’ny fanantanjahantena sy ny kolontsaina tao Mahamasina halina (Zoma 16 febroary 2007). Na dia ny lazan’ny mpanakanto fotsiny aza dia efa ampy nahalany « sahady » ny tapakila andro vitsy mialoha ny fampisehoana.

Androany kosa vao mitaraina ny maro nanatrika io fampisehoana io. Nahitana risoriso mivantana manko tao amin’ny fivarotana ny tapakila tao. Manararaotra noho ny fankafizan’Antananarivo hiram-pitiavana milantolanto sy ny lazan’ny artista ny sasany ao anatin’izany fotoana izany. Heno manko fa Ar10.000 ny vidim-pidirana ara-dalàna tamin’io fampisehoana io. Ao amin’ny tranombarotra nivarotana ny tapakila anefa dia tsy menatra ny mpivarotra nampakatra azy ho Ar12.000 tsotra izao. Io dia efa fahasahiana miharihary mendrika fitoriana kolikoly mivantana. Dia nahasahy nivody ihany ny olona. Rehefa tonga ny fotoana, ireo nihanahana tsy nividy karatra mialoha dia gaga rehefa lasa Ar15.000 indray ny vidiny teny Mahamasina. Lazaiko kosa fa karazany varotra amin’ny sisiny kosa io. Fa rehefa velona kosa ny hira voalohany sy ny horaky ny mpijery tao anatiny dia tafakatra Ar20.000 tsy midina intsony ilay vidim-pidirana teo.

Midika izany fa mitady hiroboka amin’ny fanaovana varotra antsisiny indray ny olona rehefa fantany fa be ny hanatrika fampisehoana na lalao iray. Iny moa tsy dia mampaninona loatra satria ataoko fa fahita eran-tany ihany fa ny tsy laitra dia ny tao amin’ilay tranombarotra nanankinana ny fivarotana ny karatra tsy menatra akory ny mampakatra tsotra izao ny saram-pidirana. Mendrika ny toriana izao toe-javatra izao fa tsy avela ho verivery amin’izao fotsiny.

mpanelingelina

2007-02-16T11:34:00.000+03:00

Efa tsy zoviana amin’ny rehetra intsony ny fihavian’ny orana isan’andro ara-bakinteny eto amin’ny tanànan’Antananarivo. Na ahoana dia mamela takaitra ilay firotsahana tsy misy fiafarany. Ny foto-drafitr’asa no tena iharam-pahavoazana indrindra. Mamelona ny rano nefa rehefa be loatra dia mamono indray.

Nanapa-kevitra ny kaominin’Antananarivo fa tapahina ny lalana eny amin’ny 67ha Avaratra Andrefana mifanolotra amin’ny fokontanin’Ankasina. Hametrahana ny tra-boina no antony. Difotra tanteraka tokoa ny toerana misy ireto tra-boina ireto. Efa tsara rehefa tsy ny sekoly no lasa mikantona tsy fidiny hametrahana azy ireo. Marina fa tsizarizary ny tranolay nefa tsy maintsy samy miaritra daholo ihany. Mifampizaka eo aloha indrindra fa eo amin’ny lafiny fahaporetana. Feno bibilava kely mpandeha eny amin’ny tanimbary manko ny tranolain’ireto tra-boina ireto teny amin’ny tanimalalaka nametrahana azy voalohany ka nitarainana tamin’ny tompon’andraikitra mihitsy.

Fa efa eo andalam-panarenana, andalam-panamboarana ny lalana simba ihany koa ny kaominina. Eo indrindra isika vao miditra amin’ny resaka araka ny lohateny. Mahafinaritra rehefa mandray andraikitra amin’ny fanamboarana. Mampalahelo kosa raha atao karazana gafy ilay fanamboarana. Isany tena mizaka ny mafy tokoa iny lalana Ambohitrarahaba Analamahitsy amin’ny ilany avaratr’Antananarivo iny. Amin’ny mahalalana tokana tsy maintsy andehanan’ny rehetra azy mihitsy no olana. Tena marina fa simba ny lalana ary mila fanamboarana. Ny fotoana anamboarana azy no diso ka mampitaraina ny olona mpampiasa iny lalana iny.

Androany maraina, zoma, fanaovan’ny mpianatra fanadinana indrindra mialoha ny fialantsasatra talata matavy ary amin’ny ora fandehanan’ny mpianatra sy ny mpiasa ary mpampiasa lalana amin’ny ankapobeny mihitsy no tapahiny ny lalana. Gaga sady sorena ny rehetra. Adiny iray sy sasany mbola mikatso any. Mitaintaina tsy fidiny noho ny fanadinana tsy maintsy atrehina. Hanana fialantsiny azon’ny sekoly ekena amin’ny fahatarana ve? Nahoana, hoy ny mpampiasa lalana raha amin’ny alina na amin’ny faran’ny herinandro? Amin’ny fotoana tsy dia isian’ny fifamoivoizana loatra fa tsy eo amin’ny mahabe olona indrindra? Marihina tokoa fa dia lalana tsy maintsy aleha izy io fa tsy mba manana fivilian-dalana ahafahana mamonjy ny toeran-kaleha. Lesoka lehibe dia lehibe amin’ny foto-drazfitr’asa eto an-tanàna moa io tsy fahampian’ny lalana io sy ny fahatereny ihany koa moa etsy andanin’izany.

Fokontany hono e!

2007-02-07T08:24:00.000+03:00

Marihiko eto fa hafa ny lahatsoratra avoakako anio ao amin’ny Ita Jentilisa.

Tahaka ny mampahatsiahy ny andron’ny revolisiona sy ny tohiny indray ny fahenoana izao teny izao : izay tsy manatrika ny fivoriamben’ny fokonolona dia saziana handoa « dina », tany amin’ny faritra maro aza moa dia tsy manaiky ny hanao ny taratasy mihitsy ry zareo ao amin’ny fokontany raha mila taratasy ara-panjakana ianao.

Etsy ankilany indray dradradradraina fa amin’izao fotoana izao dia « hofidian’ny fokonolona » ny sefom-pokontany. Mampihomehy ny fomba fifidianana azy na dia izany aza. Tena tsy mifanaraka amin’ny demokrasia. Nahoana angaha hoy ianao ? Rehefa mifidy ny fokonolona dia ireo dimy voalohany no atolotra any amin’ny Lehiben’ny distrika (fa inona koa moa no mahasamihafa ny distrika amin’ny fivondronana ? tsy naleo ve tamin’ny teny malagasy ihany ?). Avy eo miresaka any ny lehiben’ny distrika sy ny Ben’ny tanàna ka dia ny Ben’ny tanàna no manolotra ny ho sefom-pokontany. Inona moa no efa nitranga ? Ilay olona tafiditra laharana fahaefatra no notendren’ny Ben’ny tanàna tany amin’ny faritra iray tato amin’ny faritra Analamanga. Izay no lalàna nipetraka (jereo ity didy fampiharana laharana 2004/299 nivoaka avy tao amin’ny minisiteran’ny atitany tamin’ny 3 mars 2004 ity)…lalàna tsy mifanaraka amin’ny rariny. Dia tenenina avy eo fa io no misolo tena ny fokonolona manontolo.

Re tamin’ny kabarin’ny filoha tamin’ny fivoriam-pokonolona taratra tao Iavoloha fa hatao endrika mitovy ny biraom-pokontany manerana an’i Madagasikara izay miisa 17500 eo ho eo. Fitadiavana tsena hanaovan-javatra sy ahazoam-bola sa fampilazana amin’ny sasany fa azony bodoina amin’izay ny birao efa vita ankehitriny ? mampahatsiahy ny 20 000 trano isan-taona faharevolisiona ity zavatra ity fa ny tena henjana dia vitaina ao anatin’ny iray volana ny an-tanan-dehibe ary ao anatin’ny telo volana kosa ny any ambanivohitra. Asa ! trano vita kitoatoa indray ve ny mivoaka avy amin’izany sa endrika hanao ahoana indray. Mahafinaritra ny fandraisana andraikitra tahaka izany saingy tsy Analakely akory izy ity ka mora arahi-maso avokoa ny fahavitan’ny asa. Mbola sarotra ihany ny manara-maso ny asa any ambanivohitra be any. Ny eto Madagasikara rahateo efa malaza amin’ny fanaovana tatitra amin’ny asa tsy vita.

Re tao amin’ny kabary ihany koa fa voan’ny dina izay tsy manatrika fivoriam-bem-pokonolona amin’ny andro sy ora voatondro. Dia iny ary fa mampivory, hono, ilay sefom-pokontany tsy tafiditra laharana voalohany tamin’ny safidy. Inona no hitranga ? Mino aho fa matoa natao toy izao ny fifidianana ny sefom-pokontany dia hampiharana amin’ny fomba haingana kokoa ny « teny midina hifampifehezana » efa nahazatra taloha. Inona moa no hain’ny olona afa-tsy ny fananganan-tanana ? Any amin’ny Antenimiera aza misy ny tahaka izany fa maika fa any amin’ny sarambabem-bahoaka ? Saingy raha tsy ilay nolaniam-bahoaka kosa ny eo dia sarotra ny hahatafita ny hafatra naidina. Rehefa sendra izay olana izay dia miverina indray ny teny hoe « mpanoha-riana ». Heverina fa ny « safidim-bahoaka » ilay « riana » ary izay manohitra ny lalan’ny « safidim-bahoaka » dia « mpanoha-riana ».

Manaraka izany ihany koa dia mbola tsy rariny sady tsy mifanaraka amin’ny zava-misy ankehitriny intsony ny fanasaziana ny olona tsy mamonjy ny fivoriambem-pokonolona. Efa notsiahiviko ihany fa ny mpanampy matetika no alefa amin’ireny aty andrenivohitra. Olona tsy tompon’andraikitra izany amin’ny ankapobeny no mety hanapa-kevitra ao. Andeha modyatao hoe tsy mpanampy fa matetika dia olona irahina hatrany no mandeha amin’ireny. Ilay androhanaovana fivoriana ihany koa dia tsy miraharaha ny asa aman-draharahan’izay miasa amin’io andro io. Tsy fialana na fijanonana amin’ny asa mihitsy ny hoe hamonjy fivoriam-pokonolona nefa dia saziana rehefa tsy tonga. Tsy omena taratasy raha mba mila izany. Ny mahagaga manko dia izao. Ny inona moa no tokony ho ambony kokoa ny fifidianana misy eto amin’ny firenena sa ny fivoriambem-pokonolona ? Nahoana no tsy misy sazy omena izay tsy mifidy fa nahoana kosa no saziana (vola matetika) izay tsy mivory ?

Fitaka ilay rafitra tian-kajoro !

Any ivelany sy nandritra ny fampielezan-kevitra ny vontoatin’ny Map no aderadera isaky ny vaza-montotra. Ankehitriny ny fokontany indray no arangaranga etsy sy eroa. Karazana fitaka ihany satria tsy nambara mihitsy izany nandritra ny fampielezan-kevitra. Andeha atao hoe nankasitraka ny Madagasikara Am-Perinasa aho. Tsy ankasitrahako anefa ny fametrahana ity fokontany ity indray. Moa tsy mahatsiaro ho voafitaka ve aho amin’izay fotoana izay ? Ilay rafitra fahazoam-bola ho an’ny fokontany moa hatramin’izao mbola tsy misy tokontaniny. Raha sanatria ary tsy nahomby ny zavatra nokasaina iza na inona no omentsiny ? Ny Map sa ny rafitra fokonolona ? tsy ny zavatra sahala amin’izany indrindra ve no nampandamoka ny revolisiona sy ny fokontany ? Noheverina ho samy tompon’andraikitra ny olona ao amin’ny fokontany tamin’ny fampiroboroboana revolisiona. Kanjo inona no nitranga ? samy tsy tompon’andraikitra ary lasa any amin’ny varo-maizina ny fitantanana ny zavatra ilaina andavanandro tahaka ny vary, ny menaka, ny siramamy eny hatramin’ny savony aza !!!

Fehiny : mbola tsy ao anatin’ny maro loatra ny toetra mandray andraikitra eo nivon’ny firenena ary mbola ny manarak’efa no tena betsaka. Noho izany, rafitra diso sy hazo boboka ny mametraka ny fokonolona ho fototry ny famitana ny Madagasikara Am-Perinasa amin’izao vanim-potoana izao. Hevitro izany indrindra amin’izao ankatoky ny fanitsiana indray ny lalam-panorenana izao. Tsy maintsy miteny ny mpitily rehefa mahita ny loza mitatao. Mbola maro ny tian-kolazaina fa hatreo ihany aloha !

Ny mahafinaritra sy ny...

2007-02-05T18:06:00.000+03:00

Be dia be sahady ny zavatra azo ambara taorian’ny nandiavana iny faran’ny herinandro teo iny. Be tokoa ka ho lava loatra raha indray avoaka avokoa fa tsara kokoa raha isan’andro no amoahana azy. Eo ilay fivoriam-pokontany “fitaratra” teny Iavoloha. Eo ihany koa ohatra lalao fitsapana nihaonan’ny Ajesaia sy ny Academie Ny Antsika. Eo koa ny momba ilay Mpanakarem-be avy any Arabia Saodita nisy namono iny.

Rehefa mino ny ho aviny mpijery

Tena matoky ny tanora mpilalao ho avin’ny baolina fandaka ny mpijery. Manamarika izany aloha ny fahamaroany tonga nanatrika ny lalao na dia karazana lalaom-pirahalahiana ihany aza ilay izy ary fitsapana ny solontena malagasy hiatrika ny lalao famerenana ny dingana afrikana. Tsy mbola nanana fifaliana tahaka izany ireo mpijery ireo nody. Nalaina aza ny maro fa mbola variana niady hevitra tao ambadiky ny tribunes tao. Tsy adi-hevitra fitsikerana loatra intsony fa fahagagana manoloana ny hakingana nasehon’ny Academie. Tahaka ireny hoe ny Academie ireny no solontena ary tahaka ny hoe ry zareo ihany koa no nandresy. Tsy dia nilaza na inona na inona loatra tamin’ny maro rahateo ny vokatra 3 noho 2 nandresen’ny Ajesaia fa ny endrin-dalao ihany no tena niompanan’ny resaka.

Rindra tsara petraka, tolotra voarefy tsara sy tsy alefalefa foana, fahazotoana tsy mihazohazo na dia somary lavitra ny tena aza ny lalan’ny baolina. Santionany tamin’ny nideran’ny mpijery ny mpilalao avy any Antsirabe izany. Raha ny haavo teknika dia tena lasa lavitra tokoa ry zareo. Faharerahana tamina mpilalao tao amin’ny fiarovana tao no hirika nahafahan’ny Ajesaia nahazo ny fandresena. Toy ny fanomezana tamin-dry zareo tompon’ny amboara koa ny nampidirana mpiandry tokonana vao niana-draharaha tao amin’ny sekolin’ny baolina fandaka. Eny, nisy aza tamin’ireto Akademia ireto no vao 15 taona monja dia efa nampisedraina ireto tompon’ny amboaran’i Madagasikara ireto. Ny resaka mandeha aza moa no nahenoana fa vao iray volana ny sasany amin-dry zalahy ireto dia efa indreo nampilalaovina.

Inona kosa ny tombony azon’ny Ajesaia manoloana ny fampidera-pahazaina nahariharin’Antsirabe izao. Azo lazaina hoe ny habeny aloha. Na dia samy tanora manko ry zareo dia manana vatana kokoa ny Ajesaia. Manaraka izany indray dia ny filalaovana samirery. Valim-panafihana hatrany no nahatafiditra ny baolina na dia penalty aza no nahazoan-dry zareo isa voalohany. Na izany na tsy izany, tombony ho azy ihany koa ny nanandraman’ny mpanazatran’ny Akademia ny mpilalao maro satria lalao ara-pirahalahiana ilay izy ka ny lanjan’ny mpilalao no tena nojerena fa tsy ny vokatra loatra. Ajesaia kosa nionona tamin’ny tena efa mahazatra ankehitriny hoa ny baolina maty ihany…

Ny ekipan’i Adema kosa moa etsy andaniny toy ny mpijery rehetra ihany koa. Naka sisintsisiny rehefa nirava ny baolina. Mahay ihany koa ary nampiseho ny heriny tamin’ny alahady heriny saingy ny fitsarana no lesoka sy ny fampidiram-baolina izay tsy bahana intsony ho an’ny mpilalaon’ny Akademia.

Marihina fa afaka andro vitsy foana dia ato indray no hanoratan'i jentilisa ny lahatsoratra.

Fiheverana hafa

2007-02-03T10:49:00.000+03:00

Nalaza teto amin’ny tanàna ilay arabo malaza nisy namono tany amin’ny faritry Sakaraha. Mohammed Jamal Khalifa araka ny anarany. Ny tena nampalaza azy tsy noho izy mpitrandraka vatosoa eto Madagasikara ka manampy ny harenany eto Madagasikara loatra fa noho ny fifandraisany amin’ilay mpihaika ny amerikana Ussama Ben Laden indrindra. Toa mpianaotra ry zalahy ireo hoe sady efa mpinamana tsy nifankafoy talohan’izany.

Notaterin’ny mpanao gazety ary fa olona efatra no notazonina tany amin’ny toerana tsy fantatra hatramin’izao. Ny roa amin’ireo olona ireo dia tsy mahay teny malagasy mihitsy. Marihina dieny ety amboalohany aloha fa tsy hoe ahiahiana sahady ireo olona ireo fa ho fiarovana azy indrindra indrindra no antony.Moa koa ve misy afaka miteny hoe mahay teny Malagasy ranamana nisy namono io ? Efa nanamarika ihany aho hoe tena haingana mihitsy ny fampitam-baovao momba an-dranamana ity ary ny nampiaiky dia ny fielezany tany ivelany haingana ihany koa.

Araka ny tatitra ihany koa no nahafantarana fa nisy vehivavy malagasy niara-natory taminy nandritra ny fotoana nanafihana azy. Voalaza moa fa tsy voakitika ary ny naratra mihitsy ravehivavy io tao anatin’ny fanafihana. Maro sahady ny zavatra azo ambara hatreto.

Raha nanontany ny namako manaraka ny fivavahana Islamo (Sonita) iray aho dia niteny avy hatrany izy fa voalohany misy tsy mazava ny nanafihana azy. Efa nisy fikendrena tao araka ny eritreriny. Ny alehan’ny sainy main’izany dia fironana ara-pivavahana kokoa fa tsy misy idirany amin’ny hareny loatra. Raha nilaza taminy ny amin’ireo olona « notazonina » aho dia niteny avy hatrany izy fa fanasoketana izany ataon’ny gazety (Taratra omaly Zoma)izany. Nanakaiky ny tena marina izy raha ny fanamarihana navoakan’ny gazety androany no dinihina. Eo amin’ny lafiny iray indray dia miahiahy sampam-panjakana miafina izy ho ao ambadik’iny fanafihana iny. Tsy te-hanondro mivantana izy fa ny andehanan’ny saina indrindra dia vahiny ary tsy misy tsy mahalala angamba hoe amerikana izany.

Ny zavatra tsikaritro avy amin’ny resany dia ny karazana firaisan’aina sahady eo amin’ny samy mpino Islamo na dia samihafa firenena aza ry zareo. Ny gazety dia nilaza fa tezitra ny fianakaviany sy ny namany nahare ity toe-javatra ity. Ny hany tsy voalaza dia tezitra any anaty ihany koa fa tsy tena taratra ny fiaraha-monina Islamo eto an-toerana aloha. Mampihevitra azy ireo ho misy ambadika politika sahady izao toe-javatra izao. Ny mety tsy ho tsapa ety amboalohany dia ny fironana mampatahotra alehan-dry zareo hiditra tsikelikely amin’ny lojikan’ny herisetra amin’ny alalan’ny ady masina hanafika ny tombotsoa sy sehatr’asa amerikana eto an-toerana.
Fa misy ihany koa ny tsikaritra saingy mbola tsy be hieritreritra loatra : ny fanambarana ofisialy hatramin’izao. Marina fa izay no ambara ampahibemaso saingy matetika moa ireny no tsy inoan’ny mpanara-baovao loatra fa mitady fanazavana hafa kokoa izy ireo. Efa tena malaza any amin’iny faritra iny tokoa anie ny dahalo e ! ary mahay manangom-baovao ihany koa ry zareo. Vola no tadiaviny ka ametrahany ny olony any amin’ny sehatra fampideran-karena sy fanalana azy araka ny fitenenana. Iray amin’izany ny sehatry ny fivarotan-tena. Eo ihany koa ny mpiasa tsotra sy irakiraka amin’ireny efi-trano fandraisam-bahiny sy fihinanan-kanina ary fandihizana ireny.

Ny hafa ankoatra izay voalaza izay dia mety ho fahasarotam-piaro na fanehoan-kerin’ny hafa ihany koa. Mampalaza an’Ilakaka amin’izao fotoana izao manko ny halatra sy ny famonoan’olona. Betsaka ihany ireo olona vaovao miditra amin’ny tanàna mitondra sipa no misy miteny avy hatrany ny hodiany raha tsy te-ho fatifaty foana fa vitan-dry zalahy efa mipetraka any ny maka ny sipan’ny hafa amin’ny alalan’ny famonoana ilay miaraka amin-dravehivavy. Ary ravehivavy koa etsy andaniny dia efa takalon’aina tsy fidiny fa sahiny ajedaka ihany koa raha mitady ny handositra eo. Marina fa efa mpakany an-toerana ranamana nefa na dia izany aza ny fialonana tsy fantatra hoe hatraiza ny heriny eo amin’ireo manodidina azy any.

Ny lalànan'ny fahaizana

2007-01-30T11:10:00.000+03:00

Omaly no notontosaina ny filankevitry ny minisitra voalohany niarahana tamin’ny Jeneraly Rabemananjara ho praiminisitra. Fantatra moa fa “vaovao” avokoa ireo mpikambana ao amin’ny governemanta amin’izao fotoana izao. Tsy maintsy misy ihany ny fifandimbiasan-toerana, ny fanendrena olona vaovao hisahana andraikitra ambony any anivon’ny departemanta tsirairay any. Tapaka ary fa voatendry ny governora vaovao hitana ny Banky foiben’I Madagasikara. Efa hisotro ronono angaha I Shaolin ka dia tendrena ny olona handimby azy. Noho ilay anarana tsy tadidy no sady tsy fantatra rahateo ny andraikitra nosahaniny teo aloha dia tsara kokoa ny hanonona anarana amimpisalasalana: Ranarison Frédéric no tadidy nefa mety ho diso io anarana io, ny fanampin’anarana kosa aloha marina na dia izany aza.

Ankoatra izay dia tapaka fa atao tolotr’asa avokoa ny fitadiavana ny toeran’ny sekretera Jeneraly sy ireo asa tena ambony hafa isaky ny departemanta rehetra. Tsy ho masontsivana na oviana na oviana ny fihaviana na finoana fa ny fahaizana irery ihany. Izany hoe tsy hiditra mihitsy ny politika amin’ny fanendrena avy amin’ny filankevitry ny minisitra na governemanta. Ho zakan’ny mpanao politika ve izany fanapahan-kevitra izany? Sa miafina ao ambadika ihany ny loko politikan’ny tsirairay?

Ankoatra izay dia nisy tokoa ny olona nantsoina ho minisitra saingy nandà hatramin’ny farany ny hiantsoana azy. Nanontaniana ny antony handavany ny fiantsoana. Tsy nanontanian’ny mpanao gazety fa nanotanian’ny mpiara-miasa aminy ihany ka novaliany hoe tsy misy toerana mitsingilahila tahaka ny toerana mahaminisitra. Mety ho iray volana ihany dia mitsingidina nefa mety hiantraika betsaka amin’ny toe-tsaina izany. Raha azo atao dia aleo tsy manao minisitra mihitsy. Ny tranga sahala amin’izany no mety ho nanahirana ny mpiantso ka mety nahatonga ny fanapahan-kevitra hoe karazana tolotr’asa indray no atao manomboka izao. Izany hoe ireo antsoina tsy mety moa ny miandry antsoina tsy azoazo loatra. Mety ho fomba ihany koa anefa hialana olana ilay tolotr’asa raha toa ka fantatry ny maro ohatra fa avy amin’ny fanoherana io olona noraisina hitana andrikitra lehibe io.

Fanampiny: rehefa nahita ny anarana Frederic Rasamoely tao amin'ny midi izay senatera avy amin'ny vondrona tim aho dia mieritreritra fa mety ho izy io indrindra ilay lasa governora vaovao. Anarana fohy manko no tadidiko dia ny fanampin'anarana. Na izany aza ny gazety rahampitso no manamarina na mandiso izay lazaiko.

Fahasahiana

2007-01-29T11:40:00.000+03:00

Misy zavatra telo no azo lazaina ao anatin’io teny hoe fahasahiana io amin’ny lahatsoaratra avoaka androany.

Ny gazety Ny vaovaontsika

Sambany araka ny fahalalako azy no nanoratra nitsikera ny mpiasan’ny fivondronana ity gazety fantatra fa ny manam-pahefana lehibe indrindra eto Madagasikara no tompony. Asa efa neken’ny tonian-dahatsoratra matoa tafavoaka ny lahatsoratra. Tao Anosibe tsena andrefan’Antananarivo no niseho ny raharaha. Noraofin’ny mpiasan’ny fivondronana manko ny voankazo mbola tao anaty sobika maromaro an’ireo mpivarotra an-tsisin-dalan’Anosibe. Sady mandraoka ny varotry ny olona ry zalahy no mamely ka nisy ny naratra vokatr’izany fanao mamohehatra izany. Saiky safotra tsy nahatsiaro tena ranamana vokatr’ny ny daroka nataon’ny mpiasan’ny fivondronana.

Soa ihany fa nisy ramatoa (izay heveriko fa olona akaikin’ny ao amin’ny mbs group) nitondra ilay maratra tany amin’ny hopitaly ka voatsabo haingana ihany ranamana. Nilaza ny tsy hametraka fitoriana ranamana maratra satria mbola hifanena matetika amin’ireo mpiasan’ny fivondronana ireo ka tsy fantatra ny kakay miandry azy fa ilay ramatoa nitondra ny maratra kosa no tsy nanaiky fa tsy maintsy hitory ireo mpiasan’ny fivondronana ireo. Amin’ny ankapobeny dia maman’aliny na aman’hetsiny ariary isaky ny mandraoka entana no azon’ireo mpiasan’ny fivondronana ireo fa tsy misy sahy mitory eny amin’ny manam-pahefana mihitsy izay tratrany satria miaina ao anatin’ny rafitra tsy ara-dalàna manko ry zareo. Tsy nahazo toerana mihofa isam-bolana manko ry zareo.

Ny governemanta Rabemananjara

Vao nandray ny fitantanana ny governemanta ny lehilahy dia sahy niteny izay tsy hahafaly vondron’olona maromaro eto amin’ny tanàna. Nitsidika ny tra-boina teny amin’ny faritra maro teto Antananarivo ny mpikambana sasany tao ami’nny governemanta ary dia tsy mitambitamby ny kabarin’ny praiminisitra. Ankoatra ny fahalalany fa misy ny tsy tra-boina akory dia nilaza izy fa be ny toerana tokony tsy onenana intsony fa tokony akarina ny haavo’ny tany farafaharatsiny. Be araka izany ny toerana efa tokony hialana ary na ny trano tsy zarizary aza dia efa nokianiny mivantana teo anatrehan’ireo tra-boina. Marina ny zavatra nolazainy fa ny fiantraikany any amin’ny olona no tsy fantatra. Ny malagasy manko, ny tena izy hatramin’izao tsy ny zavatra lazaina no tena zava-dehibe aminy fa ny fomba filaza azy. Ary rehefa izy no sosotra indray mandeha tahaka ny mitana an-dolom-po izany matetika.

Nitovy hevitra laloha izahay tamin’iny indray mitoraka iny ary mety hahafinaritra ny fomba fiasany raha sahisahy tahaka izany izy. Ny hany olana dia tokony hiaraha-midinika ihany koa ny vahaolana noho ny fahasahiranan’ny olona sy ny fahaterentsaina mbola manjaka ihany. Ampiana izy na tenenina mivantana amin’ny fampakarana ny haavon’ny tany. Izaho koa mahita fa na ny lalana any anebakebany mankany amin-dry zareo aza dia tsy maintsy mirobo-drano isaky ny avy ny orana. Ny eny an-tahalaka no tena tiako lazaina. Tamin’ny gazety moa no nahitako ny teny hoe vinavinian’ny governemanta ny hamindra ny olona eny amin’ny farotra iva saingy ny fahazarana anie mbola manjaka ary ny trano eto Antananarivo tsy maharaka ny isan’ny mponina ao aminy.

Halatra nataon’ny mpitsara baolina.

Amin’ny mahapolitika fanorona ity vohikala ity dia tsy maintsy miresaka lalao sy fanatanjahantena koa aho fa tsy hianina amin’ny politika eto fotsiny. Na dia avy aza ny orana dia mbola nijery ny lalao nihaonan’ny as Adema sy ny anse reunion aho. Fitiavana angamba izany. Nahavariana fa betsaka ny mpijery niaritra izany orana izany. Manana filalao mahafinaritra kosa aloha ny Adema na dia izany aza e !

Fa nahasorena tanteraka kosa ny nataon’ny mpitsara ny ny mpilalao Seisheloà. Na ny baolina lavalava aza mbola vitsy lalao mijanona noho ny lalao omaly. Ny atsasaky ny fotoana mahery dia lany tamin’ny fijanonana sy ny fitsaboana ny maratra vahiny teny ambony kianja. Ny dokotera moa dia mitetika ny hamakivaky ny kianja amin’ny fandeha miadana ka telo minitra mbola tsy tafavoaka ihany. Ny fitondrana marary sasatry ny entina eny ambony kianja fa tsy mandeha amin’io izany mihitsy ry zareo. Ny mpitsara moa dia ny mibahambahan ny mpilalao gasy tsy mahazo mikitika ny maratra no ataony.

Nahatafiditra baolina roa ny malagasy fa nolavin’ny mpitsara anjorony avokoa izany. Ny baolina maty voalohany anefa dia baolina avy eny ampin’ny mpiandry harato fa dia nolazainy fa lasa aloha loatra indray ny mpanafika malagasy…Olona iray nampiseho ny karany sy ny mombamomba azy mipetraka any Seychelles no niteny fa ilay mpitsara anjorony nanda ny baolina tafiditry ny malagasy ny Maorisiana mpivezivezy (mba tsy hilazana hoe mipetraka) any Seychelles). Raha vitsy indrindra dia 12 ny baolina tokony ho tafiditry ny malagasy ary raha nisy dia nisy dia baolina iray ihany no natahorana ny an’ny vahiny. Vavolombelona nahita ny lalao manontolo aho ka mahita tsara fa toa mifanaraka ambadika amin’ny handaniana fotoana amin’ny tsy misy dikany ny mpitsara sy ny ekipa vahiny. Tsy nifandanja mihitsy ny lalao fa dia nisaraka samy tsy nisy nitoko moa no niafarany. Mazava loatra fa ny hahatafakatra azy amin’ny fomba rehetra no tadiavin’ny vahiny na tsy mendrika azy aza izany !

Araka ny re ihany koa moa dia nahatafiditra baolina roa tahaka izany koa ny ekipan’i Ajesaia tany Maorisy fa nolavina avokoa ireo baolina tafiditra ireo. Nahatafiditra baolina iray kosa Starlight ary dia neken’ny mpitsara soa aman-tsara izany. Amin’ny lalao miverina moa no hahitana ny tena haavom-pahaizan’ireto Maorisianina ireto fa izaho manokana tsy nanantena be loatra intsony ny Ajesaia…

Rafitra lany andro ny fokonolona

2007-01-25T09:51:00.000+03:00

Niteny aho omaly fa tsy namoaka vaovao atoandro ny mbs omaly atoandro. Gaga aho ny alina fa toa fandaharana miverimberina no hitako. Vita ny vaovao dia resaka momba ny zazakely no nandeha. Vita izay dia nisy horonantsarimetsika nampihomehy iray izay. Vao vita io horonantsarimihetsika io dia niverina indray ilay fandaharana momba ny zazakely vao nolazaiko teo. Ahoana ary ity fandaharana miverimberina ity ? hoy aho anakampo. Hay moa ka niatrikasa ry zareo omaly tontolon’ny andro. Teny amin’ny serana Tangaina no nanaovany izany atrikasa izany. Ny vondrona Mbs manontolo mihitsy moa no niatrikasa tamin’izany. Tao amin’ny gazety ny vaovaontsika nivoaka androany no nahitako izany vaovao izany. Ny tsikaritra tao amin’ny filazana dia naharihary tao ny maha an’ny Mbs ny radio fahazavana izay noheverina ho radio fjkm. Amin’izay fotoana izay dia tokony tsy ho radio fjkm intsony ny radio fahazavana mba tsy ho voagejan’ny safidin’olo-tokana. Na farafaharatsiny tsy tokony hotononina ho radion’ny fjkm io radio io na dia hampanjaka ny hiram-piderana sy fandaharana evanjelika isan-karazany aza.

Fa hitodika amin’ny adi-hevitra tiako aposaka aho amin’izao fikasana hamerenana « amin’ny toerany » ny rafitra fokonolona izao. Tao amin’ny gazety voalazako ery ambony io ihany no tiako idirana. Ao amin’ny pejy fahatelo misy ny lahatsoratra nosoratan’i Rivonala Razafison mamaritra fa ny fokonolona ihany no fokontany. Nosoratany ary fa ny rafitra fokonolona no nahafahan’Andrianampoinimerina nitondra fandrosoana lehibe teto Madagasikara tamin’ny taonjato faha-18. Ny asam-pokonolona no nahafahana nihady ny lakan-dranon’Andriantany sy nanajary ny lemaky Betsimitatatra. Io rafitra io ihany koa araka ny filazany no nametrahana ny rafitry ny tsena ka nampisy fidiram-bola be teo amin’ny fanjaknaa tamin’izany fotoana izany. Nangina teo izany rehefa tonga ny fanjanahantany ka nangina teo ny fampandrosoana nianga mivantana avy tamin’ny vahoaka. Nolazainy ihany koa fa noho io rafitra io saiky haverin’ny Kolonely Ratsimandrava hovelomina indray no nahafaty azy. Ary mety noho io ihany koa no saiky nampisy ny fikasana hifofo ny ain’ny filoha Ravalomanana tamin’ny fotoam-pitsarana nanaovana fianianana teo sy ilay fikasan-dratsy hanapahana ny jiro avy tany Andekaleka. Nolazainy aza fa noho ny rafitra niainga tamin’ny Kaominina teo no mety nahasavoan-danitra ny fampandrosoana teo. Voafintina tahaka izay ny filazany.

Andeha ekena ny fahamarinan’ny filazana fa raha tsy ny asam-pokonolona tsy voajary iny lemaky Betsimitatatra iny. Avy amin’izay fanajariana izay ihany koa no nahatonga ny anaram-paritra teny avaratr’Antananarivo ankehitriny hoe « Laniera ». Lanieran’ny be sy ny maro tamin’izany fotoana izany fa atsahatra ilay fanajariana tany amin’io faritra io satria tsy zakan’ny herintsandry nitambatra ny nanajary azy. Io laniera tsy vita io no notohizan’ny filoha Ratsiraka ary rehefa vitany dia nireherehany mihitsy tamin’ny andron’ny revolisiona. Eo aloha izany voalohany indrindra dia efa napetraka ho dokambarotra politika ny teny Laniera nefa toa mametraka ankolaka ihany koa fa misy fetrany sahady io lazaina fa rafitra io…afa-tsy raha hoe ifaneken’ny rehetra ny hanao zavatra na hanajanona zavatra. Tsarovy ihany koa anefa fa izay tsy nanaiky hanao zavatra, ohatra ny famonjena ny fefiloha vaky, tamin’izany fotoana izany dia miafara tamin’ny fanapahan-doha (famonoana moa no tena marina) tsy misy antra mihitsy. Marina fa nisy fiaraha-nanapa-kevitra niraisana teo fa efa tsy amin’izao vanim-potoana izao intsony no hanamparana ny didin’ny maro an’isa. Avy amin’io fiaraha-nanapa-kevitra io ihany koa no nipoiran’ny teny hoe « mpanoha-riana » satria nanohitra ny hevitry ny be sy ny maro ary niteraka ny teny hoe fahavalom-bahoaka ihany koa. Tahaka ny hoe tsy mahazo maneho hevitra izany izay manana hevitra tsy mitovy amin’ny be sy ny maro. Eo dia efa tsara dinihina hoe mbola tsara averina tokoa ve ny rafitra fokonolona ? ary raha averina dia hatraiza no hamerenana azy. Haverina indray ve izany ny asam-pokonolona nampandroso tamin’ny taonjato faha-18 nefa isika ity efa taonjato faha-21 ?

Na ny tantara maoderina aza dia nahitana fa niteraka mpangoron-karena kely be dia be ny famatsiana natao teny amin’ny fokontany. Nanjaka ny hala-danja sy ny hala-patra…ary niroborobo tsy nisy toa azy ny varo-maizina tamin’izany fotoana izany. Izay komitim-pokontany dia lasa mpanankarena vetivety. Ny rafitra fokonolona tian-kajoro angamba dia rafitra tokony hahaleo tena ara-toe-karena isaky ny faritra misy azy. Izay rahateo no efa nolazaiko ny momba vatoeka tao amin’ny lahatsoratra mitondra ny lohateny hoe Ratsimandrava-bis. Mandraka ankehitriny dia toa fangatahan-javatra no tena ifotoran’ny fametrahana ilay rafitra. Hampita ny olana mivantana any amin’ny prezidansa, hoy ny filoha. Rehefa miresaka olana dia sarotra ny hidify ny resaka vola sy ny tsy fahampiana eo am-pelantanana. Dia ho volabe mikararana indray no holaniana nefa toa mihamavesatra ilay rafitra eo ankilan’izay. Sady mavesatra no ho maisatra. Mila fitadiavam-bola indray hanodinana ny rafitra « vaovao ». Hetra inona indray no hoforonina sa afindra toerana ? Raha fintiniko izay voalaza teo dia ho fitadiavam-bolan’ny sasany indray io rafitra fokonolona io fa ahiana tsy hisy fampandrosoana ho vanona akory !

15 taona izay ny 10 aogositra 1991

2006-08-10T12:02:00.000+03:00

Feno 15 taona androany tokoa ilay diaben’ny fahafahana niainga avy teo amin’ny kianjan’ny 13 mey ka tapaka nanoloana ny lapam-panjakana teny Iavoloha. Sahabo 12 kilaometatra eo ho eo izany halavirana izany izay marihina fa notontosaina an-tongotra avokoa. Olona an-hetsiny ny namakivaky iny lalam-pirenena faha7 iny vao maraina. Nisatroka kasikety sy nivimbina akanjo maivana sy sakafo azo entina toy izany ihany koa.

Efa nitaintaina ny maro tamin'ity andro ity. Andro vitsivitsy mialoha ity diabe ity manko dia heverika fa nitovitovy tamin'ny tao an-trano avokoa ny tany an-tokatranon'ireo nandray anjara tamin'ny fandravana ny mandan'i Jerikao. Nifamaly ny mpivady, ny ray aman-dreny sy ny zanaka, ny mpinamana na ny mpifankatia ny amin'ny tokony handehanana any na tsia. Mahatsapa avokoa ny rehefa fa ity no tena andro sarotra indrindra tamin'ny tolona nodiavina rehetra. Roa andro mialoha dia nandà tanteraka ny amin'ny handehanana any ny raiko. Ny reniko kosa niteny fa toy ny mivadika amin'ny mpiara-mitolona izy raha amin'io andro io indray vao mijanona. Nahare ihany koa anefa aho any an-kafa fa nisy fifamaliana tahaka izany tany amin-dry zareo.

Rehefa tonga anefa ilay andro dia tsy fantatro fa niova hevitra tampoka teo ny raiko. Namela indray izy izay te-handeha. Izaho sy ny reniko ihany no nandeha ny tao an-trano fa nisy zanak'anabavin'i dada mirahalahy avy any Antsirabe ihany koa tonga teto Antananarivo noho io daben'ny fahafahana io fotsiny. Efa-mianaka izany izahay no niainga avy ao an-trano. Feno hafatrafatra niala ny trano. Na dia efa fantatra mialoha aza izay mety hitranga dia miramirana hatrany namonjy an'Analakely amin'ny fiakanjo handeha hitsangatsangana.

Rehefa tonga teo Analakely, tsindrian-daona avokoa ny rehetra. Tsy misy maheno izay kabarin'i Voaibe izany intsony fa ny handeha ihany no masaka ao an-doha. Efa velona ny hirahira. Noho izaho mbola tao anatin'ny fanompoam-pirenena ivelan'ny tafika dia tsy nanana namana na fikambanana iaraha-mandeha loatra aho. Ny tany amin'ny iray asa amin'ny reniko noho izany no nandehanako sady izaho ihany koa no tsy maintsy miahy azy amin'ny dia izay hatao. Ho lavitra ny lalana saingy toa tsy ketraka mialoha tamin'izany ny rehetra indrindra fa ny vehivavy.

Natao tamin'izay ny fifandaminana ka ny Reny Hery Velona no natao hitari-dalana. Ny vehivavy mba hilazana fa hifampidinika no handehanana any fa tsy hanongana hiady. Hametraka ny petra-kevitra ny amin'ny tokony hialan'ny filoha nitondra tamin'izany fotoana izany. Izay vao manaraka ny sokajin'asa sy fikambanana hafa rehetra. Raha ny tokony ho izy dia anisan'ny nialoha lalana nanaraka ny Reny Hery Velona ny sokajin'asa nisy ny reniko saingy tsy nety handeha mialoha izy. Naleony tany amin'ny faramparany ihany araka izay azo atao. Na izany aza dia 150 metatra niala ny lohany no nisy anay rehefa tonga teo amin'ny barazy voalohany teo Ankadimbahoaka izahay.

Teo Ankadimbahoaka no nisy ny sakana avy amin'ny mpitandro ny filaminana voalohany. Raha mbola nifampiraharaha teo ny mpitarika (Razafindramiandra Moks raha tsy diso aho) sy ny mpitandro ny filaminana dia iny ny angidim-by iray avy eny Iavoloha nitsirika ireto vahoaka be sy ny habetshany angaha. Horaka ny an'ny olona nihevitra hoe fa handositra angaha? Nilaza ary ny mpitandro ny filaminana fa hatreo ny anjara asan'izy ireo fa raha mihoatra io lalamby io ny mpilahatra dia efa samy tompon'andraikitra amin'ny tenany izay.

Tampotampoka teo, indreny nisy andian-jatovo nitoraka ny nihazakazaka nandrava ny sakana. Tsy naka sarotra ireto miaramila sady tsy te-haratra fa nosokafany nidanadana ny lalana. Niezaka ihany ingahy mpitarika nibaiko ireo zatovo ireo hiverina no sady nilaza fa tsy mety ny ataony fa lasa ihany izao. Nizotra indray ny dia arahin-kira moa mazava loatra. Hiram-pivavahana kristiana avokoa no natao. Nafana dia nafana ny andro ka maro ireo tokantrano teny an-dalana no nanondraka rano ny mpanao diabe. Izahay kosa manalavitra ny lohany hatrany. Any amin'ny 500 metatra na 1 kilaometatra miala ny lohany no misy anay nefa ny any aoriana dia tsy hita mihitsy ny farany.

Teny akaikin'ny Magasin M taloha teo Tanjombato izahay no nosongonan'ny Pasitera mpitari-tolona. Notehafan'ny rehetra moa izy tamin'izay satria mbola natoky azy ny maro tamin'izany fotoana izany. Indraindray izahay no mitsirika mijery ny any aloha sy mijery ny afara indrindra fa rehefa mba mahazo tampon-dalana. Tsy hita intsony na ny mpitarika ny dia any aloha na ny mpamarana ny dia any aoriana. Tsy mbola nisy tahaka izany aloha talohan'izany fotoana izany.

Tafajanona indray ny dia rehefa teo akakin'ny sampanan-dalana ho any Ambohijanaka misy ny faran'ny zotra iny indrindra izahay. Izany hoe afaka metatra vitsivitsy avy teo. Tafajanona ny dia. Tsy nahita izay nitranga tany aloha tany izahay. Iny indray ilay angidim-by fa nandalo teo amboninay. Rehefa niverina nahita ny halavan'ny filaharana angaha izy dia nandatsaka ny mananasy mamono amin'izay. Satria moa hita ny fandatsahany ireo mananasy ireo dia natao izay nialana azy haingana.

Teo no nanomboka nisaritaka ny olona. Nisy ny namonjy nidina teny an-tanimbary. Mbola tsy nihevitra ny hiverina loatra ny olona tamin'izay fa nanao fialana fotsiny. Kanjo tampotampoka teo injay ny feom-basy nitatatata tany ho any. Mbola "miaramila" aho tamin'izany ka haiko tsara ny atao hoe feom-basy sady tsy mila fahaizana be vao mahalala ny feony. Izay vao nanomboka nisaritaka tanteraka ny olona. Indreny koa fiara maromaro niverina feno maratra avy tany alohaloha tany. Rapa tanteraka ireo olona ireo. Ra fotsiny no nameno ny tenan'izy ireo manontolo. Tena nihosona tanteraka. Sady tena tezitra ny olona no nitodi-doha niverina. Ilay angidim-by ihany koa tsy nitsahatry ny niverimberina.

Ny nahagaga ahy dia izay toerana rehetra avy nidifianay dia nilatsahan'ny mananasy avokoa. Tahaka ireny hoe noenjehina manokana ireny i jentilisa sy ny fianakaviana kely nadeha tay ka misy azy. Niteny ny reniko tsy hanarahana arabe intsony, nanaiky aho tamin'ny voalohany fa avy eo hitako fa ny niala arabe aza no tena nisy nanenjika. Izay nahazoana arabe indray no noezahina. Efa ho atsasa-kilaometatra niala izany arabe izany anefa no nisy anay. Endrika vinitra sy tezitra, nalahelo nahita ireo maratra no hitanao eran'ny lalana. Nisinisy amin'izay ireo lehilahy nitaky fitaovam-piadiana fa hoe tsy rariny izao. Tsy nahita izay Antandroy izahay fa ny oronantsary no nahitanay azy ireny. Ny hitanay koa dia nisy ireo nihazakazaka teny an-tanimbary no tratran'ny "mines" ka napoakany mihitsy. Hitako maso kosa io.

Tsy tadidy intsony na efa nohanina na tsia ny sakafo maivana nentina fa ny lalana mody no nasiana olona. Ozona tsy ozona no nataon'ny olona. Noho ny famonjena aina ve fa na dia hantsana heverina ho tsy ho voatsambikina amin'ny fotoana mahazatra izao aza dia vita. Toy ny tsy lavitra izany ny lalam-piverenana. Dia maika no nataon'ny olona nanaraka arabe fa tsy nisy loatra izany hazakazaka izany.

Teo Ankadimbahoaka no betsaka indrindra ny mpitsena ny mpanao diabe. Tsy nisy nahatombina tany amin'ny toerana nisy azy intsony ireo izay tsy nandeha tany amin'ny diabe. Nipenipenina nitady ny havany avokoa ny rehetra na mpanohana na mpanohitra ny fitondrana. Iza tokoa no tsy manan-kavana nandeha tamin'io Diabe io raha ny teto Antananarivo indrindra indrindra? Feno olona ny hopitaly sy ny tranom-paty sao dia misy olom-pantany any ho any. Na ahoana tokoa manko na ahoana, na inona tsy fitovian-kevitra na inona ny olombelona tsy maintsy miahy ny amin'ny havany hatrany.

Noho ny olo-maro niara-dia angaha fa vita tsy naharenesana havizanana ny dia. Na dia ireny olona efa antitra sy tena fotsy volo ireny aza dia tonga soa aman-tsara tany an-tranony ihany. Tahaka izany i "Bebe" izay olona tsy fantatra fa teo no nanomboka nahalalako azy. Anisan'ny Reny Hery Velona izy. Ireo tena nitari-dalana ihany koa. Nilaza izy fa tena tsy nahahetsika tamin'ny "fiarovan'ny mpiandry ny lapa" ka toy ny babo mihitsy aza, fa noho ireto miaramila nahita fa sady vehivavy izy ireo no sady antitra rahateo dia navelany handeha hody ry zareo. Asa nahatsiaro nahita ny reniny kosa angaha ny miaramila ka antra ireo vaviantitra ireo. Nofeperany anefa ry "Bebe" tsy hiteniteny izany. Na izany na tsy izany dia hitan'i " Bebe" kosa ny maro tamin'ny zava-nitranga.

Tonga tany an-trano tsy nisy maratra izahay efa-mianaka niainga maraina. Tsy tao an-trano intsony i Dada fa efa nijerijery tany amin'ny toerana rehetra mety ho azo nijerena anay. Tsy mbola nisy ny finday tamin'izany fotoana izany ifampitana vaovao. Avy eo moa dia nandeha nankeny Analakely ihany aho hihaino izay vaovao farany. Rehefa tonga ny alina dia mbola nihaino izay holazain'ny tele Iavoloha ihany ny maro toy ireny mbola haka fahasorenana ireny ihany. Mbola nidehadehaka manko ny anao lahy tao anaty vaovao tao. Sa ihany, hoy izy fa tsy nahazo ny tetezana ny "mpanafika niaraka tamin'ny fitaovam-piadiana ( ny baiboly sy fihirana angamba no tiany holazaina)" fa raha tsy izany dia mbola ho ra nandriaka bebe kokoa noho iny no nitranga. Fomba fiteny kosa re izany!

Izay sy izay raha atao ambangovangony ny niainanay tamin'iny 10 Aogositra 1991 iny. Dia mamerina ny fiaraha-miory tamin'ireo izay niharam-boina sy nanana ny maty hatrany aho.

Ilay revy Japoney!

2006-05-16T17:29:00.000+03:00

Somary hisintaka kely any amin'ny tanin'ny Masoandro miposaka any isika anio na dia mbola mafana dia mafana aza ny rivotra politika eto Madagasikara. Tsy natao hanempotra manko ny raharaha eto na dia fantatra aza fa any amin'ny faramparan'ny taona any vao tena hafana izy io. Andeha atao hoe haka rivotra kely isika. Rivotry ny revy ihany koa anefa! mbola vinavina manko ilay izy fa tsy mbola tena hita maso. Vinavina tsy mba kely sy ho an'ny tsy manambola na dia izany aza fa ho an'ireo izay mahasahy manonofy hahavita zavatra hahagaga an'izao tontolo izao sy mety hampiova ihany koa ny firafitry ny trano sy ny tanàna mihitsy aza amin'izao fiandohan'ny taonarivo fahatelo izao.

Isika rehetra izay naharaka na dia kely ihany aza amin'ny tantara na eto an-toerana na any ivelany dia mahatsapa tsara ny lanjan'i Japana eo amin'ny toe-karena. Noheverina ho vao taonjato roa izay no nivoarany...indrindra taorian'ny fivoarana haingana Meiji...saingy efa firenena mandroso sy ikoizana hatrany izy. Nampianarina fahakely fa hala-tahaka no tena nivoarany haingana dia haingana tokoa saingy efa mamorona izy amin'izao fotoana izao. Ny haben'ny tany iainan'ny Japoney dia kely loatra raha miohatra amin'ny isan'ny mponina saingy mbola velona ihany ry zareo. Io fahateren'ny tany io mihitsy moa no nahatonga azy ireo haka tany betsaka araka izay azony nataony ary ny nosy maro isan-karazany no tena nokendreny saingy nilavo lefona moa ry zareo rehefa nanjeran'ny Amerikana Baomba atomika tamin'ny taona 1945. Nionona tamin'ny tany teo aminy izy sisa. Tany kely sy mikitoatoana, be horohorontany, mbola misy volokano velona.

Raha amin'ny finoan'ny olona dia tahaka ny hoe voaozona amin'ny samy olona koa ry zareo. Fa izany ve no ao an-tsain'izy ireo? Tsy nikely soroka ry zareo ary tsy niraviravy tanana ihany koa. Efa manana ny teknikam-panorenan-trano afa-mijoro na dia eo aza ny horohoron-tany sy ny rivo-doza ary ny fanojan-drano (tsunami) manafotra tany tampoka. Raha nahay tantara tokoa dia efa nandre fa ainga nampijoro ny VVS (vy, vato, sakelika) tamin'ny fanjanahan-tany ny lahatsoratra mitohy nitondra ny lohateny hoe " Japana sy ny Japoney" izay nivoaka tao amin'ny gazety-boky "ny Mpanolo-tsaina" taona 1913 naharendrika an'i Titanic.

Zato taona latsaka taorian'izany lahatsoratra izany mbola mampilendalenda hatrany ny fandrosoany ny Japoney. Tsy hala-tahaka intsony fa famoronana vaovao. Voalohany, manorina tanàna ambony ranomasina. Eo amin'ny helo-dranon'i Tokyo izany no kasaina. Reharehan'ny Amerikana tavaratra sy ny Eoropeana tandrefana ny fananana sambo be mpitondra fiaramanidina afa-miriaria an-dranomasina. Ny azy kosa tanàna mihitsy no kasaina hihevaheva ambony ranomasina. Nahavariana ny maro izay nitsidika tany Egypte ny pyramide fasan'ireo mpanjaka nitondra tany tamin'ny androny, ny Japoney kosa hanorina trano-tanàna vaventy in-55 tahaka ny haben'i "pyramide de Kheops". Izany hoe raha heverina dia mihoatra ny iray kilometatra ny halavany (sy ny sakany mitovy ihany) ary tahaka izany ihany koa ny hahavony. Megapyramide no anaran'izany trano-tanàna izany. Mba nanao fikarohana tamin'ny aingam-pikarohana eto amin'ny aterineto ihany aho fa tsy nahita na tamin'ny teny frantsay na tamin'ny teny anglisy momba azy fa dia tamin'ny teny alemana ihany. Mba ny teny malagasy izany no miteny azy fahatelo aorian'ny teny japoney (teny tsy haiko)sy ny teny alemana(teny tsy haiko) raha ny fiheverako azy aloha hatramin'izao.

Fa ataony inona koa izany trano-tanàna izany? araka ny efa voasoratra teo ihany dia tery ny tany any amin-dry zareo. Lasa lafo dia lafo ny vidin-tany any. Ambony ranomasina sisa mazava ho azy no vaha-olana akaiky indrindra ho famahana olana raha mbola tsy takatra ny hanorina tanàna any an'habakabaka. Trano-tanàna tsy natao honenana loatra ilay izy fa natao hametrahana ny tsena, ny birao ary ny karazan'asa rehetra hatramin'ny fanofanana ka hatramin'ny fitsaboana. Saingy tanàna voalohany tsy hisy fiarakodia mifamezivezy ihany koa. Ny fiaran-dalamby sy ny karipetra misosa hijoroan'ny olona ihany no ifamoivoizana ao.

Fa izao ihany koa, ao amin'io trano-tanàna io ihany koa no hisy izany tranoavo mihantona izany (toy ny ramanavy mihantona ka any ambony indray no fototra). Tsy azo tanterahina ve hoy ianao? Haika ho azy izany. Raha mijery ny sary iray isika dia hahita toy ny tsivalam-by mifanohinohy. Eny amin'ny fihaonan'ireny tsivalam-by ireny no misy boribory natao ho fototry ny tranoavo sasany ( fa tsy ny trano rehetra kosa tsy akory). Amin'ireny toy ny tsivalam-by ireny indray no ifamezivezena na lalam-pifamoivoizan'olona sy fiaran-dalam-by moa no marina kokoa. Tsy vy anefa no anorenana ny trano fa ny nanocarbone. Io manoratra amin'ny pensilihazo io izany ho an'izay tsy mahafantatra loatra izany nanocarbone izany. Maivana io nefa matanjaka noho ny vy voasedra, hoy ny manam-pahaizana manokana amin'izany taranja izany. Marihina kosa fa tsy mikatona fitaratra akory io tanàna io fa misokatra tsara kosa.

Mba aiza kosa ary ny herin'aratra hamelona azy ity ary ampy ho azy ve izay eo? efa noeritreretina fa ny lomotra, ny masoandro ary ny rivotra no hakana angovo hanazava azy sy hampandeha ny raharaha rehetra ao aminy. Efa mandros dia mandroso tokoa ny fahaizan'olombelona fa izay fahaizana efa fantatra rehetra dia heverina hampiasaina ao avokoa. Efa hanana fiarovana amin'ny horohorontany sy ny rivo-doza ary ny safo-drano io trano-tanàna io. Olana manakana ity tanàna natao hahazaka olona hatramin'ny 750 000 isan'andro hifamezivezy ao sisa dia raha sanatria misy ny fahamaizana ao anatin'ny trano. Mbola somary sarotsarotra ihany ny hahatafavoaka izany isan'olona izany ao anatin'ny fotoana fohy. Raha voavaha io dia mety hatombony amin'izay ny fanorenana azy. Isika amin'io mitsiriritra sisa atao fa tsy hahavita izany aloha.

FLM Ambatovinaky nitsangatsangana

2006-04-20T19:38:00.000+03:00

Anisan'ny tsy mba foiko mihitsy ny fitsangatsanganana isaky ny Paska faharoan'ny FLM Ambatovinaky. Izany manko ny filazany ny alatsinainin'ny Paska araka ny fahafantaran'ny maro azy. Fomba fanaon'ny fiangonana isan-taona rahateo io fitsangatsanganana io.

Ny antony tsy amoizako azy aloha voalohany dia tsy mba mandiso fotoana tahaka ny fanaon'ny malagasy mifamotoana izy. Rehefa hoe amin'ny fito sy sasany no miainga dia amin'ny fito sy sasany tokoa izay no manomboka mitanjozotra ny fiara rehetra miala eo (amin'ny "square poincaré") anoloan'ny CEG Antanimbarinandriana ny fiara rehetra dia mamonjy ny lalana mankany amin'ny toerana lazainy fa handehanana.

Ny fomba nizarana ny olona hahay hanaja fotoana tahaka io dia tena fiaran-dalam-by mihitsy, indrindra tamin'ny andro mbola nandehanany, no nandehanan'ny fiangonana tany ampiandohana nanapahan-kevitra hisian'ity fitsangatsanganana ity. Mazava hoa azy fa na niantsinanana na nianatsimo hatrany ny dia rehefa nitsangatsangana tamin'izany fotoana izany. Avy eo vao navadika ho fiara lava amin'izay fa efa nampitandremana tsara izay handeha fa oran-damasinina ny fiaingana ka tsy misy fiara ho an'izay tara intsony. Efa zatra ny oran-damasinina tsy mamela mivalo tokoa ny olona ka mihazakazaka aok'izany raha vao fantany fa mety tsy ho tratrany ny ora, na mandray fiarakaretsaka mihitsy aza ny sasany. Lasan'eritreritra aho tamin'izany ka nisento hoe raha mba toy izany hatrany moa ny fanaovan'ny malagasy fotoana?

Manaraka izany dia tsy hoe mipetrapetraka ny olona rehefa tonga any fa samy manana ny sahaza azy avokoa. Samy manana ny kilalaony sy ny fialam-boliny avokoa. Ny mpiandry entana isam-pianakaviana ihany no mipetrapetraka na matoritory eny amin'izay faritra nofidiany hialokalofany sy ihinanany sy sakafo atoandro rehefa tonga ny fotoana. Alohan'izany rehetra izany aloha dia mandeha aloha ny fotoam-pivavahana ho fisaorana an'Andriamanitra, famakiana ny teny voalahatra ho amin'ny andro alatsinainy, ny toriteny fohy mifandraika amin'izany ary ny toro-marika vitsivitsy sy fanatsinjarana ny sokajin-taona hilalao. Tamin'ity taona ity moa dia teny Antsororokahitra Imeritsiatosika eo amin'ilay faritra antsoina hoe fialam-boly Soatiana no nandehanan'ny fiangonana. Tamin'ity taona ity ihany koa dia fiangonana telo no somary nifanakaiky ka ny tena akaiky dia ry zareo ao amin'ny FJKM Ivandry firaisana. Ny somary tery ampita andrefana kosa na dia somary aloha kokoa aza dia ry zareo FJKM Ankadifotsy. Ny FJKM Ivandry no tonga taloha teo amin'ny toerana ka somary nahazo ny sisin'ny toerana izahay.

Manaraka izany dia rehefa voatsinjara isaky ny taona ny olona rehetra dia misy ny tompon'andraikitra mandray azy ireny sy manao ny fanentanana ho an'izay vonona ny hilalao sy hiala voly. Na dia ny ankizy vao telo taona aza dia mahazo ny anjarany ihany koa. Misy moa ny reny no tsy miala lavitra an-janany tsy noho ny tahotra sao misy maka ny zananany ihany fa sao dia

mitomany mitady an-dreniny ihany koa ny zaza. Ny mpampianatra Sekoly alahady efa zatra ankizy kely no mandray ireny zaza ireny ary ampian'ny renin'ny zaza ihany koa indraindray amin'ny fampilalaovana.

Dia eo ihany koa ny ankizy 5 - 7 taona, tia ny fihetsika mirindra sy ny hirahira madinika koa dia ampilalaovina tahaka izany ihany koa izy ireo. Tamin'ity indray mandeha ity moa dia niara-nilalao tamin'izy ireo ny pastora Rakotozafy Martin mba mianatra ny ho toy ny zaza ihany koa. mikiakiaka mihitsy ireo ankizy ireo rehefa tena ampoky ny hafaliana izay.

Mitovitovy tahaka izany ihany koa ny zokon'ireo izay vondron'ny 8 - 10 taona izay mbola tsy tafala aminy ny fitiavana mihetsiketsika ary dia ampianarina mitadidy izay rehetra natao ihany koa amin'ny alalan'ny fanalana tsikelikely ny teny fa manohy hatrany kosa ny fomba fihetsika. Izay mandiso moa na tratra miteny any amin'ny fotoana tsy tokony hitenenana dia alefa eny afovoan'ny faribolana ka anaovana hira manokana mba handihizany manala hadisoana.

Fa ny tena nahafinaritra dia izay nataon'ny tanora latsaky ny 15 taona rehetra. Izany no tena hoe tsy lany fika mihitsy ireto tompon'andraikitry ny lalao ireto. Efa hatramin'ny ela hatrany angamba no nanomanan'izy ireo ny lalao kasainy atao amin'ny fotoana tahaka itony fa izay natao tamin'ny herintaona tsy dia miverina loatra ny taona manaraka. Tsy ny mpampianatra sekoly alahady irery tokoa moa no miandraikitra ny lalao sahala amin'itony fa manana ny anjara toerany lehibe tokoa ny skoto izay havanana amin'ny lalao isan-karazany. Sarotra ny hanao fampitahana amin'ny vondrona hafa manomana kilalao tahaka izao fa dia ny fanomanana tsy kitoatoa tahaka izao no tena nanintona ahy tsy hidify araka izay azo atao amin'ny fitsangatsanganan'ny FLM Ambatovinaky.

Tsy mahagaga rahateo raha maro ny tanora tsy avy ao amin'ny fiangonana akory no mpamonjy ny paska faharoan'ny fiangonana. Tahaka ny tsianjery fotsiny ny hoe eo anoloan'ny Mahamasina ny fotoana dia tonga alohan'ny amin'ny fito sy sasany fotsiny . Dia mitady izay mivarotra tapakila avy eo mba ahafahana miditra anaty fiara sy miverina tsy amin'ahiahy.

Na dia ny olon-dehibe ny ny efa nahatratra ny taona fisotroan-dronona aza dia manana ny anjarany ihany koa araka ny efa nolazaiko tamboalohany ihany. Tsy ankifidy ny fitadiavana kilalao. Na dia izay natao fahakely aza mety mbola hiverenana ihany satria tsy ary hahita lalao vaovao hatrany tsinona fa izay efa tsy natao ela no averina indray na dia somary efa mivoatra kokoa aza ny fepetran'ny lalao sy ny fizotrany. Hehy hatrany amin'ny ankapobeny no mameno ny lalaon'ny rehetra amin'izany fotoana izany.

Na dia eo aza izany rehetra izany dia misy ihany koa ireo efa nifidy ny hiala voly manokana amin'ny alalan'ny hirahira ambany kininina sy ny fanatanjahan-tena isan-karazany toy ny baolina fandaka sy ny volley-bala ary ny basket-ball. Manana ny kianja antonona izany rahateo ity toerana nandehanana ity.

rehefa samy nahavita ny fialam-boliny maraina ny sokajy rehetra dia manomana ny karazam-mpampisehoany avokoa nony avy eo. Omanin'ny rehetra araka ny sokajin-taona izany mandra-pahatongan'ny ora fisakafoanana. rehefa vita avokoa ny sakafo sy ny filana torimaso madinika dia mamonjy ny sehatra izay nivavahana tamboalohany ny rehetra hijery izany nomanin'ny olona nilalao. samy mahazo karazam-pahatsiarovana avokoa moa ny rehetra nilalao maraina ho mariky ny fahaiza-niara-nientana. Saingy tamin'ity taona ity dia tsy tontosa hatramin'ny farany ny lanonana tolakandro fa nadrahona be ny andro. Voatery natao ny fivavahana famaranana ny fotoana reheta tonga ny tamin'ny telo ora tolakandro. Samy namonjy ny fiara nandehanany ny maraina avokoa ny rehetra avy eo. Hira hatrany no mandravaka ny lalana eny an-dalana na nadroso na ny niverina. Na dia izany aza dia nisy ihany koa ny nanao zavatra hafa tahaka ny nilalao karatra ohatra na niresaka sy nampiresaka tsotra izao. Tratran'ny fitohanam-pifamoivoizana izahay raha vao naianga kely fotsiny ny fiara. Nefa efa zatra izany avokoa ny rehetra. Tratra alina izahay vao nigadona indray teo anoloan'ny vavahadin'i Mahamasina. Samy afa-po na dia izany aza. Amin'ny faran'ny taona indray ny fanaovana sasak'alina raha tsy te-handihy fa hilalao amin'ny "fomba mihaja" sy hanala andro ary dia ao amin'ny akanin'ny fiagoanana hatrany no fanaovana izany. Ireo no fotoana roa ampiavaka an'Ambatovinaky rehefa amin-javatra sahala itony.